Imëpis kuyëkänantsikmi willapäkïnintsiktaqa
1 Jehovapa testigonkunaqa hinantin Patsapam alleq willapäkushqantsik y tsënöpa nunakuna bautizakuyänampaq, y 1992 watapita patsëmi willapäkorqontsik mil millón hörapitapis masta. ¡Alläpam kushikuntsik tsë llapan rurëcho noqantsikpis yanapakonqantsikta! (Mat. 28:19, 20.)
2 Kë llapantaqa rurëkantsik Jehová yanapamashqallam, pëllatam agradecikuntsik aja o ‘sasa cawaqui tiempucunacho’ willapäkunapaq yanapëkämanqantsikta (2 Tim. 3:1). Tsëpenqa, ¿imataraq rurashwan kuyashqa willapäkïnintsik mana ushakänampaq?
3 ¿Imanirtaq willapäkuntsik? Reinopitaqa willapäkuntsik, Diosta y nuna mayintsikta kuyarmi, hina Diosman dedicakonqantsikta cumplita munarmi (Mat. 22:37-39; 1 Juan 5:3). Kuyakurninmi imëkanöpapis alleq willapäkïta munantsik (Luc. 9:23).
4 ¿Imanöraq rurashwan? Chikimaqnintsik Diabloqa, imëkatapis ruranqam willapäkïcho qelanänapaq. Mana wiyakoq nunakunawan, mundopa tukï rurëninkunawan, tukï rurakïnintsikman yarparëwan y saludnintsik ushakanqanwanmi, Satanasqa willapäkïnintsikcho qepätsimënintsikta munan.
5 Tsëmi alleq sinchikunantsik, willapäkïta kuyanqantsik mana ushakänampaq. Diospita yachakïtaqa puntamanmi churanantsik, tsë ninanqa Diospa Palabranta leinan, y leinqantsikman alleq yarpakachänanmi, tsënöpam “mäcoq, mäcoq, cumplidu sirweqnin” qomanqantsikpita yachakïkäshun (Apo. 2:4; Mat. 24:45; Sal. 119:97).
6 Jehová nenqan cumplikanqanmi rikätsimantsik, mana allikuna ushakäyänan witsan këllachöna këkanqanta (2 Ped. 2:3; 3:10). Këkunata musyarmi alleq willapäkushwan mana qelanashpa, tsënöpam willapäkïcho alleq tsarakïkantsik, y nunakuna bautizakuyänampaq yanapëqa manam ushakanraqtsu.