“Llapan shonqiquicunawan cushi cushilla sirwiyë”
1. ¿Imanötaq Diospita yachatsikushwan?
1 Jehovätaqa manam qelanëkartsu servinantsik. Tsëmi “Diosta sirwirpis, llapan shonqiquicunawan cushi cushilla sirwiyë” nir Biblia atikamantsik (Rom. 12:11). Tsënö karpis, Diosta kushishqalla servinata imallapis qelanäratsimashwanmi. ¿Imataraq rurashwan Diospa Gobiernompita yachatsikurnin kushishqa kanqantsik “mana ushacänanpag”? (2 Tim. 1:6, 7. NTCN)
2. ¿Imachötaq yanapamäshun Bibliapita alli estudianqantsik?
2 Kikintsikmi Bibliata alli estudianantsik: Alli yachatsikoqqa Diospa leyninkunatam kuyan, y manaraq musyanqankunata yachakurpis alläpam kushikun (Sal. 119:97). Bibliata estudianqantsikchö manaraq musyanqantsikkunata yachakushqa, ¿manaku shonquntsik alläpa kushikun y más yachatsikïta munantsik? Tsëqa, Diosta más alabëtam munantsik, shutimpitam willakïta munantsik y pëta kuyarninmi wakinkunatapis yachatsita munantsik (Heb. 13:15). Tsëmi alli willakïkunata nunakunaman kushishqa chätserqa, yachakonqantsikkunata alläpa kuyanqantsikta rikätsikuntsik.
3. ¿Imachötaq yanapamäshun Diospa santo espïritun?
3 Diospa santo espïrituntam mañakunantsik: Alli yachatsikunapaqqa manam kikintsikpa kallpantsiktsu yanapamäshun. Antis Diospa santo espïritunmi yanapamantsik kushishqa yachatsikunapaqqa (1 Ped. 4:11). Tsëmi, ‘imëkata ruraq kallpanta’ Jehová qomänapaq mañakushqaqa, mana mantsakushpa yachatsikunapaq yanapamäshun (Isa. 40:26, 29-31). Yachatsikonqanchö tukïta pasarpis, ‘Dios poderninwan yanapaptin’ alli tsarakonqampaqmi apóstol Pablupis parlarqan (Hech. 26:21, 22). Hina tsënöllam noqantsikpis llapan shonquntsikwan kushishqa yachatsikunapaqqa Jehová santo espïritunwan yanapamäshun. Tsëpaqqa Pëtam mañakunantsik (Luc. 11:9-13).
4. ¿Imachötaq yanapamäshun kushishqa yachatsikonqantsik, pero imatataq yarpänantsik?
4 Diospa Gobiernompita kushishqa yachatsikonqantsikta rikarqa, wakin cristiano mayintsikkuna tsënöllam rurayanqa (2 Cor. 9:2). Hina shumaq y kushishqa yachatsishqaqa, marka mayintsikkunapis masmi wiyaramäshun. Tsëmi shumaq kuyakïllapa yachatsikunantsik (Titu 3:2). Imëpis nunakunata respetanqantsiktam rikätsikunantsik y mälasqa manam yachatsinantsiktsu.
5. ¿Biblia ima nimanqantsiktataq wiyakunantsik?
5 Llapan shonquntsikwan imëpis kushishqa Diospita yachatsikushun. Tsënö yachatsikunarëkur Bibliata alli estudiashun y Diosnintsikman mana haqita mañakushun, tsëqa espïritunwan yanapamäshunmi. Tsënöpam ‘Teyta Diospa poderninwan’ alli yachatsikushun (1 Tes. 1:5).