Imanöraq kikintsikpura willapäkïcho yanapanakushwan
1 Llapantsikmi “wananqantsik hora [shumaq] parlapämashqaqa” agradecikuntsik (Pro. 25:11). Willapäkïcho, ¿imataraq rurashwan wawqi panintsikkunawan parlakïnintsik shumaq kanampaq?
2 Allillatam parlakushwan: Shumaqmi kanqa parlakïnintsik, willapäkïcho Jehovapa kaqpita parlashqaqa (Sal. 37:30). Parlakurishwanmi imanö willapäkunapaq, o willapäkonqantsikcho nunakuna shumaq contestamanqantsikpitapis (Hech. 15:3). Hinamampis, ¿alli yachatsikïta tarishqantsikku Bibliata o mushoq revistakunata leirnin, o mëqan reunionkunaman ewarpis? Hina parlarishwanmi Discursopita Yachakunapaq reunionpitapis.
3 Pipis tapumashqa contestëta mana yachanqantsikqa llakinëpaqmi. Tsëmi wayipita ewkur yanaqintsikwan huk minutokunallapis parlarishwan, yapëpis tsënö pasaptenqa imanöpis contestëta yachanampaq, tsëpaqqa itsa libro Razonamientota rikärishwan. Yanaqintsik willapäkurnin shumaq parlashqa kaptenqa, allim willapäkaramorqonki nirishwanmi, tsëqa más alli willapäkunampaqmi yanaparenqa.
4 ¿Imanöraq yanapanakushwan? Libropita Yachakunapaq reunionman ewaqkunawan, ¿llapanwannaku willapäkoq yarqushqanki? Noqantsikwan willapäkuyänampaq pillatapis nishqaqa, kikintsikpuram “mas callpata qonacur” këkäshun (Rom. 1:12). Precursor regularkuna y auxiliarkunaqa, alläpam kushikuyan qoyalla o tardepëpa willapäkïman yanaqashqaqa, tsë hörakuna wakin publicadorkuna willapäkïman alläpa mana yarquyaptin. Pëkunataqa yanapashun willapäkïman yanaqarmi. ¿Kayanku wawqi panikuna qeshyapäkurnin willapäkïman mana yarqoqkuna? Estudio biblicoman ewanapaq nerqa yanapëkäshunmi (Pro. 27:17).
5 Manam alli willapäkuyaptinraqtsu, shumaqmi willapäkaramorqonki nirishwan, ichik rurayanqampitapis, allim rurëkanki nirishwanmi, tsëqa kushiratsenqam. Këkunata yarpäshun wakinkunawan willapäkurnin, tsënöpa “balorta y callpata qonacur” llapantsik këkänapaq (1 Tes. 5:11).