Manam yanaqintsikkunallatsu kayan
1. ¿Imanötaq apostul Pabluta qatishwan cristiänu mayintsikkunawan yachatsikoq yarqur?
1 Wakin yachatsikoqkunawan cada yachatsikurmi apostul Pabluqa yanaqinkunawan “mas callpata qonacur” yanapanakïta procuraq (Rom. 1:12). Y noqantsikqa, ¿yachatsikur purinqantsik höra yanaqintsikwan kallpata qonakur yanapanakuntsikku? Yanaqilla kanantsikpa rantinqa, ¿imanirtaq alli yachatsikoq kanapaq ima yanapamanqantsikta willarintsiktsu?
2. ¿Imanötaq yanaqintsikkunata mana mantsakuyänampaq yanapashwan, y imanirtaq alläpa precisan?
2 Mana mantsakunapaq yanapanakushun. Wakinkunaqa yachatsikïchö mantsakuyanmi y tsëqa rikakun qaqllankunachö o parlëninkunachömi. Shumaq yanapanakunqantsikqa mana mantsakunapaqmi yanapamäshun. ¿Ima mastaq yanapamashwan mana mantsakunapaq? Congregacionkunata watukaq juk anciänum yachatsikoq yarqurninqa, wawqinkunata willan pëpis höraqa mantsakunqanta y yamë këta qonampaq Jehoväta imëpis mañakunqanta. Juk wawqinam kënö nin: “Mana mantsakunäpaqqa kushishqa kanqämi yanapaman. Peru höraqa alläpa mantsakoq karmi mana mañakurninqa kushishqalla yachatsikïta puëdïtsu”. ¿Imallapis yachatsikïchö mana mantsakunapaq yanapamashqantsikku? Tsëqa allichi kanman yanaqintsikwan tsëkunapita parlarinqantsik.
3. ¿Imakunapitataq yachatsikoq yarqur yanaqintsikwan willanakurishwan?
3 Yachanqantsikkunata willanakushun. ¿Ima palabrallapis o tapukïllapis o ima pasanqanllapis yanapamashqantsikku nunakunawan parlar qallanapaq? ¿“Imanöpis yachatsikunapaq” ninqannölla ruranqëki yanapashurqunkiku? Tsëqa allichi yanaqikita willarinkiman (Prov. 27:17). Jina yachakïta munaqkunaman kutirqa allichi nirishwan imata logrëta munanqantsikta y imanö ruranapaq kaqta. Y juk estudiuta usharirqa allichi yanaqintsikta nirishwan imanir juk yachatsikïta o juk versïculuta alleq entienditsinqantsikta o tsë estudiantita imanir juknöpa yachatsinqantsikta.
4. ¿Imanirtaq yanaqintsikkunata yanapashwan?
4 Punta cristiänukunaqa manam yachatsiyanqan nunakunallatatsu yanapëta procurayaq, sinöqa kikinkunapurapis yanapakuyaqmi (Hëch. 11:23; 15:32). Tsëmi apostul Pablupis Timoteuta yachatsirqan, y yachakunqankunata wakinkunatapis willanampaq nirqan (2 Tim. 2:2). Yachatsikunqantsikchö imakuna yanapamanqantsikta noqantsikpis cristiänu mayintsikkunata willashqaqa, pëkunapis mas kushishqa y alli yachatsikoqmi kayanqa. Peru tsëpitapis masqa ciëluchö Teytantsiktam kushitsishun (Heb. 13:15, 16).