Tapukïkuna kaq
◼ ¿Imanötaq vestikushwan Jehovata servina wayikunaman ëwar?
Hinantin Patsachö Ëllukäna Wayikuna, Asambleakunapaq Ëllukänantsikkuna y sucursalkunam Jehovata adorana wayikuna kayan. Kanan wayikunapitapis, Jehovata adorana wayikunaqa shumaq rurashqa, y limpio wayikunallam kayan, tsë wayikunatanöqa tarintsik Jehovapa markanllachömi. Tsëmi, Jehovata servina wayikunaman ewaqkunataqa, reqiyanman Diosta adoraq nunakunatanö.
Vestikïnintsikchö y shumaq altsapäkïnintsikchömi, cristianokunaqa ‘Diospa sirweqnin canqantsicta ricätsicuntsic’ (2 Cor. 6:3, 4). Hina allim portakushwan. Diospa nunanqa mëcho tsëchöpis vestikushwan y altsakushwan Jehovata serviqnömi, sucursalkunaman o principal oficinankunaman ewarnäqa.
Willapäkunapaq ëwar, y Ëllukäna Wayiman ëwarnimpis shumaqmi altsapäkushwan, y alli limpio vestikushqa ewanapaqmi nimantsik libro Organizados para hacer la voluntad de Jehová. Hina (139 päginapa, 1 pärrafonchönam) nimantsik: “Yarpäshun, Betelqa ‘Diospa Wayin’ ninanmi. Tsëmi, Diosta adoranapaq Ëllukäna Wayiman ëwanqantsiknöllam, kanman vestikonqantsik, altsakonqantsik, y imanö portakonqantsikpis”. Më tsëpita karpis Jehovapa testigonkuna Betelman ewëta munarqa, këtam rurayänëki. Tsënöpam rikätsikunki Diosta kuyanqëkita y respetanqëkita (Sal. 29:2).
Vestikïnintsikchömi reqimashwan Diospa nunannö ‘allicunallata rurëta tïranqantsicta’ (1 Tim. 2:10). Alli limpio shumaq vestikonqantsikta rikarmi, nunakunapis alli parlayanqa Jehovapa adoracionnimpita. Höraqa penqakïpaqmi Jehová adorana wayiman wakin wawqi panikuna ëwayashqa, qarankunapis rikakïkaq y lluta melanëpaq röpankunawan. Kënöqa manam ni mëcho këkarpis cristianokunaqa vestikuyanmantsu. Cristianokunaqa, imëpis “Dios cushicunanpaq caqta yarpacachar” y Diospa leyninta wiyakurmi kawëta munantsik, tsënöpam wakin nunakunapitapis hukläya kanqantsikta rikätsikushun (Rom. 12:2; 1 Cor. 10:31).
Nueva York markachö këkaq principal oficïnankunaman o mëqan sucursalmampis ewëta munarqa, o tsë markachö këkar chëta munarqa, kënömi tapukushwan: “Vestikïnï, altsakïnï, limpio kënï, ¿rikätsikuntsuraq Diospa wayinta respetanqäta? Tsënöpa, ¿Diosta adoranqäta rikätsikïkäku? ¿Tsënö kanqäwan pitapis penqakatsïmantsuraq?”. Tsënö yakakonqantsikpita y shumaq altsakonqantsikpitam, “nunacuna musyayanqa salbamaqnintsic Diospa yachatsiquinin imano shumaq cashqanta” (Titu 2:10).