Jesus ruranqanta qatiyë
1. ¿Imanötaq alli willapäkoq tikrashwan?
1 Yachaq maestrokunapa escuelankunacho mana yachakushqa karpis, manam Jesusnöqa pipis yachatsikorqantsu. Alli ruranqankunaqa allipaqmi kanankamayaq qellqarëkan, alli willapäkoq këta munarqa ruranqantam qatinantsik (1 Ped. 2:21).
2. ¿Imaraq yanapamäshun Cristunö kuyakïwan shumaq yachatsikunapaq?
2 Nunakunatam kuyarqan: Nunakunata llapan shonqunwan kuyarmi willapäkorqan (Mar. 6:30-34). Atskaq nunakunam markantsikchö hipayan, tsëmi wanayan Diospita yachatsinantsikta (Rom. 8:22). Hipakïninkunaman y Jehová pëkunata kuyanqanman yarpashqaqa, más alleqmi willapäkushun (2 Ped. 3:9). Hinamampis nunakuna shumaqmi wiyamäshun, pëkunapaq yarparanqantsikta rikarqa.
3. ¿Mëchöyantaq willapäkorqan Jesus?
3 Mëcho tsëchö këkarpis willapäkoqmi: Mëcho tsëchö këkarnimpis Jesusqa alli noticiapita willapäkorqanmi (Mat. 4:23; 9:9; Juan 4:7-10). Tsënö kaqmi imata rurëkarpis listo këkänantsik Diospita willapäkunapaq. Wakin wawqi panikunaqa imëpis puritsiyanmi Bibliata y wakin publicacionkunatapis, tsënöpam listo këkäyan willapäkuyänampaq trabajayanqanchö, escuelachö viäjepa o rantipakoq ëwayanqancho, etc.
4. ¿Reinopita imanöraq willapäkushwan?
4 Imëpis Reinopitam willapäkïkaq: Reinopita alli willakïtam Jesusqa willapäkorqan (Luc. 4:43). Willapäkurnin, noqantsikpis höraqa manam Reinopita parlartsu qallëkuntsik o Reinom këkunata altsamonqa nishpatsu parlantsik, tsënö kaptimpis Reinota wanayanqantaqa yachatsikuntsikmi. Ushanan hunaqkunachö mana alli kawakï kanqampita parlarpis, ‘alli willaquita willapacunapaqmi purintsic’ (Rom. 10:15).
5. Willapäkïcho alli yachatsikoq kanapaq, ¿imataraq rurashwan?
5 Diospa Palabranllapitam willapäkorqan: Jesusqa llapan willapäkonqancho Diospa Palabranllapitam yachatsikorqan. Kikinllapitaqa manam ni imatapis yachatsikorqantsu (Juan 7:16, 18). Palabrampita yachakïta manam imëpis haqerqantsu, tsëmi diablu ishkitsita munaptimpis alleq tsarakorqan (Mat. 4:1-4). Noqantsikpis alli willapäkoq kanapaqqa, llapan hunaqkunam Bibliata leinantsik y nenqannömi kawanantsik (Rom. 2:21). Willapäkïcho nunakuna tapumashqa, nenqantsikpis Bibliallapitam kanan, y kikin Bibliapitam leipïta tïrashwan. Dios nenqampita parlëkanqantsikta nunakuna rikäyänantam munantsik, manam kikintsikllapita parlëkanqantsiktatsu.
6. ¿Imatataq rurarqan Jesus nunakunapa shonqunman chänampaq?
6 Nunakunapa shonqunyaqmi charqan yachatsikïninwan: Jesusta imanir mana tsariyanqampita principal sacerdotekuna y fariseokuna guardiakunata tapuriyaptinmi, pëkuna niyarqan: ‘¡Manam pipis tse nuna parlanqannoqa parlashqatsu!’. (Juan 7:46.) Jesusqa manam kë kawakïcho pasakonqanllapitatsu yachatsikorqan, tsëpa rantenqa shumaq yachatsikïninwan nunakunapa shonqunyaqmi charqan (Luc. 24:32). Kawëninkunachö reqiyanqantawan igualëkatsiryanmi, Jesusqa nunakunata yachatseq (Mat. 13:34). Mana pishipäyanampaqmi, wallka wallkapa yachatseq (Juan 16:12). Hinamampis Jehovallata kuyayänampaqmi yachatsikorqan. Tsënö kaqllam noqantsikpis alli yachatsikoq kashun, Jesus imanöpis yachatsikonqanta rikar (1 Tim. 4:16).
7. ¿Imanirtaq Jesus alleq tsarakorqan willapäkïcho?
7 Willapäkïcho chikikäyaptimpis y wiyëta mana munëkäyaptimpis alleqmi tsarakorqan: Mëlaya hatusaq milagrokunata rurëkaptimpis manam wiyëta munayarqantsu (Luc. 10:13). Hina wakin kastankunaqa ‘‘Locuyäcurishqam’ nirmi parlayarqan’ (Mar. 3:21). Tsënö nikäyaptimpis, Jesusqa alleqmi tsarakorqan. Rasumpa kaq yachatsikïta katsir y tsëwan nunakunata salvananta musyarmi, imëpis kushi kushi willapäkorqan (Juan 8:32). Noqantsikpis, Jehovapa yanapakïninwan këkarqa, manam imëpis haqishuntsu willapäkïta (2 Cor. 4:1).
8, 9. Jesus ruranqanta qatinapaqqa, ¿imakunatataq rurashun willapäkunantsikrëkur?
8 Willapäkïta puntaman churanampaqmi tukïta rurarqan: Kapoqyoq këtam haqirerqan willapäkunanrëkur (Mat. 8:20). Höraqa tardeyaqmi willapäkorqan mana pishipashpa (Mar. 6:35, 36). Willapäkunan tiempo ushakänanta musyarqanmi. Kanampis “Key tyempo ichikllanam”, tsëmi Jesus ruranqanta qatita munarqa, imëkanöpapis alli disponishwan tiempontsikta, kallpantsikta y kapamanqantsikkunatapis (1 Cor. 7:29-31, QKW).
9 Punta cristianokunapis Jesuspita yachakushqa karmi, alläpa alli willapäkoq kayarqan (Hech. 4:13). Tsënö kaqllam noqantsikpis Jesus ruranqanta qatirqa, más alli willapäkoq kashun (2 Tim. 4:5).