“Ven, sé mi seguidor”
1. ¿Imakunachötaq yanapamäshun Bibliapita yachakunapaq reunión shamoq killakunachö?
1 Mateo, Marcos, Lucas y Juan librokunam, Patsachö Diospa Tsurin imanöpis kawanqanta shumaq willakuyan. Tsëmi ‘yupinta qatinapaqqa’ alli preparakunantsik y wiyakunantsik Bibliapita Yachakunapaq reunionchö, 1 de marzo killapita witsëpa “Ven, sé mi seguidor”a nishqan librota yachakurnin (1 Ped. 2:21, QKW; Mar. 10:21). Pero tsëpitapis masqa, wayin wayin alli yachatsikunapaq Jesus ruranqan yanapamänapaq kaqtam rikäshun.
2. ¿Imanötaq yanapamantsik Jesus tukïta pasarpis alli tsarakunqan?
2 Jesuspita yachakushun. ¿Imanötaq sientikunki wayin wayin yachatsikuptiki mana wiyakïta munayaptin? Jesus kënö ninqanta itsa yarpärinki: “Noqatatsun qatikachayamarqon, tseynowmi, qamkunatapis qatikachayashunki” (Juan 15:20, QKW). Wiyakïta mana munayanqanqa, manam llapantsu qatikachämaqnintsik cuenta. Pero Jesusqa noqantsikpita más imëkata pasarnimpis, Teytan awninqanta yarparmi alli tsarakurqan. Tsënöllam, Jehová Dios yanapamänantsikta musyar y alli tsarakur shumaq kawëta chaskinapaq kaqman yarparqa, mana utinapaq y mana qelanänapaq kallpata tarishun (Heb. 12:2, 3; Pro. 27:11). Imëkanöpapis wayin wayin yachatsikur purishqaqa Jesucristum yanapamäshun (Mat. 28:20).
3. ¿Imanötaq yachatsikïnintsikchö Jesusta qatishwan?
3 “Keypaqmi kachamushqa karqö.” Jesusqa, Diospa Gobiernompita yachatsikïtam kawëninchö puntaman churaq (Luc. 4:43, QKW). Pëqa paqwëmi kallpachakurqan tsëta ruranampaq. Yachatsikï alläpa precisaq kaptinmi, më tsëchöpis Diospa Gobiernompita yachatsikurqan. Noqantsikpis pëpa qateqninmi kantsik. ¿Mëmantaq yupin apëkämantsik? Más tiempo kanqëkikunachö, ¿kayanraqku nunakuna Diospita yachatsinëkipaq? Cristuta kuyanqantsikmi yanapamäshun puëdenqantsikmannö alli willakïta llapanman chätsinapaq (2 Cor. 5:14).
4. ¿Imanötaq yachatsikïnintsikta más alliyätsishwan?
4 ‘Manam pipis tse nuna parlanqannoqa parlashqatsu.’ Jesus yachatsikunqanta rikarmi nunakunaqa äyakashqa quedariyarqan (Juan 7:46; Mat. 7:28, 29). ¿Imanir? ¿Imachöraq alläpa hukläya karqan wakin maestrokunapita? Rasumpa kaqtam yachatsikoq, y yachatsinqan nunakunatam alläpa kuyaq y tukïnöpam yachatseqpis. Alli Maestro ruranqanta qatirqa, noqantsikpis alli yachatsikoqmi tikrashun (Luc. 6:40).
5. ¿Imata ruranapaqtaq kallpachakushwan “Ven, sé mi seguidor”nishqan libro yachakurnin?
5 Këchöqa, Jesus kawanqampita huk ishkë alläpa väleq yachatsikïninkunallatam rikärirquntsik. ¿Ima más alläpa väleq yachatsikïnintaraq tarinkiman? Bibliapita Yachakunapaq reunionchömi ‘Kristupa kuyakiyninta reqinekipaq’ churakänëki, tsënöpa parlanqanta y ruranqanta qatinëkipaq (Efe. 3:19, QKW).
[Päginapa ura kuchunchö willakï]
a Kë librotaqa castellano congregacionkunallam estudiayanqa. Quechuachöqa Dios Yayapa kuyakïninchö librotam estudiar sïguishun.