¿Familiëkiwan alistakïkäyankiku mana ushakäyänëkipaq?
1 Bibliachö nenqankuna cumplikëkanqanmi rikätsimantsik mundopa ushakënin këllachöna kanqanta. Kanan witsan kawëkanqantsikqa, Noe kawanqan witsannöllam (Mat. 24:37-39). “Rasumpa kaq Dioswan purirmi”, apäki tamya shamuptimpis Noëqa ushakarqantsu (Gén. 6:9). Llapan Jehová nenqantachi familianta yachatserqan, tsëmi ushakäyarqantsu. Mana alli nunakunawan mana ushakänapaq, ¿imataraq familiantsikwan rurashwan Noe ruranqannö?
2 Alli kaqta rurayänampaqmi yachatserqan: Cuarenta o cincuenta watam Noëqa mana utishpa yachatsikorqan “allicunata rurar cawayänanpaq” (2 Ped. 2:5). Mana alli angelkunata qatir o kikinkunallapita karpis, marka mayinkuna burlakuyarqanmi Noe yachatsikuptin. Tsënöllam kanan witsampis nunakunaqa burlakuyan y wiyakïtapis munayantsu, tsëmi rikätsimantsik mana alli nunakunapa ushakënin këllachöna kanqanta (2 Ped. 3:3, 4). Pero Noe kawanqan witsampitaqa, kananqa atskaq nunakunam mana utishpa yachatsenqantsikta wiyarnin Jehovapa markanman yëkïkäyämun (Isa. 2:2). Kikintsik y wiyamaqnintsikkuna salvakuyänampaqqa, mana haqirishpam yachatsikunantsik (1 Tim. 4:16). Tsëmi teyta mamakuna, wambrëkikunata yachatsiyänëki Diospita parlë alläpa precisanqanta, parlakïnikikunawan, rurënikikunawampis... ¡tsë ruranqantsikpitam nunakuna salvakuyanqa o ushakäyanqapis! (2 Tim. 4:2.)
3 “Nenqantanöllam rurarqan”: Apäki tamya chämuptin mana ushakäyänampaqqa, Jehová nenqantanöllam Noëwan familianqa rurayänan karqan (Gén. 6:22). Tsënöllam noqantsikpis, mäkoq mäkoq cumplido sirveqninta y Biblia nenqanta wiyakunapaq listo këkänantsik (Sant. 3:17). Jehovapa markanchö yachakonqannölla huk teyta ruranqantam kananyaq yarpäyan wambrankuna. Tsëchö yachakonqanta rurarshi, llapan semänakuna familianwan Bibliapita yachakuyaq, y cada semana ushëshi llapan familianta yachatsikïman apaq. Y cada ëwarshi huknin hukninwan yachatsikoq. Mana utishpa ‘nenqantanölla ruraptinshi’, wambrankuna musyariyänaq yachatsikï puntaman churë alli kanqanta; y hoqta wambrankunam Jehovapa alli sirveqnin këman chäyarqan.
4 Mana alli nunakunapa ushakëninqa illaqpitam chäramonqa (Luc. 12:40). Tsëmi, noqantsikpis Noëpa familiannölla rurarqa y fënintsik alli kaptenqa, manam ushakäshuntsu (Heb. 11:7).