Yachakïta munaqkunaman kutinapaqqa, alleqmi yachakunantsik
1. ¿Imataraq Jesus willakorqan yachatsikïpaq?
1 Jesusqa allim yachatserqan qatiraqninkunata, Reinopita “alli willaquicunata” shumaq yachatsikuyänampaq (Mat. 4:23; 9:35). Palestinallachö yachatsikushqa karpis Jesusqa manaraq ciëloman witsarmi, willakorqan qateqninkunapa yachatsikïnin “jinantin nasioncunapa” chänampaq kaqta (Mat. 28:19, 20).
2. ¿Imataraq rurashwan Jesus mandakonqannölla ruranapaq?
2 Tsë nenqantanölla rurayänampaqqa, yachakï munaqkunaman kutirmi alli willakïkunata yachatsiyänan karqan, tsënöpa Cristu llapan mandanqanta musyayänampaq. Tsëmi, noqantsikpis alli yachakunantsik wiyakoqkunaman kutir shumaq yachatsinapaq.
3. Punta visïtallachö, ¿imataraq rurashwan yachatseq yapë kutinapaq?
3 Imata yachatsikunëkipaqpis pensarïraq: Punta visitallachömi wakin yachatsikoqkunaqa huk tapukïta haqipuyan yachakïta munaqkunapaq, yapë kutirnin contestayänampaq. Kutirninnam Enseña librollapitana tapukonqanta yachatsiyan, tsënöpam estudio biblicota qallariyan.
4. ¿Imanirtaq revista chämunantaraq shuyarashwantsu yachakï munaqkunaman kutinapaq?
4 Huk killachö huk kutilla revista yarqamuptimpis, manam tsëtaraqtsu shuyaränantsik yachakï munaqkunaman kutinapaq. Tsëpa rantenqa, kaponqan revistakunapitam yacharatsishwan más yachakïta munayänampaq.
5. ¿Imapaqtaq musyanantsik imata yachatsikunapaq kaqtapis?
5 Musyanëkim imanö yachatsikunëkipaqpis: Imanö parlapar qallanëkipaqpis, yachakïta munaqkunaman manaraq kutirnin registrochö qellqanqëkita rikapäri; itsa haqinqëki publicacionpita parlapärita munanki o parlayanqëkipita yachatsikoq publicacionta haqipïta munanki. Visitanqëkichö tapukïta haqishqa karqa, itsa tsëta contestarïta munanki. Texto nenqampita parlarqa kikin Bibliapita leirapï.
6. ¿Imarëkurtaq yachakï munaqkunaman kutinantsik?
6 Bibliapita yachakuyänantam munantsik: Estudio biblicota qallëta munarmi nunakunaman kutintsik. Huk nunam, wawqintsik estudio biblicota qoyta munarnin kutiptin chaskerqantsu. Tsënam huk hunaqna, tsëraq chämushqa revistawan kuterqan, y kënö nerqan: “Këkunapa purikäyämonqällatam Bibliapita nunakuna tapukuyanqanta yachatsikïkäya”. Nïkurnam contestananta shuyararqan, y tsëpitanam Bibliapa huk textonta y yachatsikunapaq publicacionpa huk pärrafonta leiraporqan. Tsënö ruranqampitam huk estudiota qallarerqan.
7. ¿Imataraq chaskishun yachakïta munaqkunaman kutirqa?
7 Yachakï munaqkunaman kutinapaq shumaq yachakushqaqa, alläpa allim kanqa: kushikushunmi ruranqantsikpita, hinamampis itsa yanaparishwan ‘wiñe cawe munaqcunata’ alli kaq näniman chäyänampaq (Hech. 13:48).