¿Imanöraq yachatsishwan leita mana alläpa yachaqkunata?
1. ¿Imanö nunakunatataq yachatsikonqantsikchö höraqa tarintsik?
1 Wayin wayin yachatsikonqantsikchöqa leita mana alläpa yachaq nunakunatam höraqa tarintsik, tsënö karpis Diospita yachakïta munayanmi. ¿Pëkunata yanapashwantsuraq? Awmi.
2. ¿Imanirtaq respetanantsik mana alläpa leita yachaq nunakunata, y imanötaq rurashwan?
2 Respetakoq kanqëkita rikätsikï: Jehoväqa nunakunapa shonquntam rikan, manam ëka wata estudiayanqantatsu (1 Sam. 16:7; Pro. 21:2). Tsëmi pëpita yachakur, nunakunata despreciantsiktsu mana alläpa leita yachayaptimpis. Hinamampis respetanqantsikta y pacienciayoq kanqantsikta rikarqa, itsa yachakïta munayanqa (1 Ped. 3:15). Yachatsir qallarqa, itsa huk textota o pärrafota leimï nishunraqtsu. Bibliapa shumaq yachatsikïninkunata más yachakorqa, itsa kikinna alli leita munarenqa, tsënöpa Diospa Palabranta leinqanman ‘paqasta y hunaqta pensanampaq’ (Sal. 1:2, 3).
3. ¿Imanötaq yanapashwan mana alläpa lei yachaqkunata?
3 ¿Imanötaq yachatsikushwan? Dibüjokunaqa yanapamantsik alli yachatsikunapaq y yachatsenqantsikta mana qonqayänampaqmi. Puntataqa rikäratsi dibüjota y imata rikëkanqantapis niramunampaq tapuri. Y, contestayänampaqnölla tapuri yachëkätsinqëkita mana qonqayänampaq. Tsëpitana yachëkätsinqëkipaq parlaq textokunata leirapï. Dibüjokunapis yanapakunmi yachakonqanta yarpätsinëkipaq. Imam sïqa: ama alläpa atskataqa yachatsitsu. Tëmata y huk ishkë precisaq yachatsikïkunata kutin kutin yachatsi, librochö mana këkaq yachatsikïkunataqa ama yachatsitsu. Kikin Bibliapita textokunata leipï y alli yachakïkanqanta musyanëkipaq tapuri. Itsa rasumpa Biblia yachatsikonqankunata musyëta munar, kikinna más alli leita munanqa.
4. ¿Imanöraq Bibliapita yachakïkaqkunata yanapashwan alli leiyänampaq?
4 Imatataq rurayanman más alli leiyänampaq: Huk nuna mana alläpa leita yachar o pipis mana yanapaptin alli leita mana yachakushqa karpis, wiyayanqantaqa yachakuyanmi y manam qonqayantsu. Tsëqa, ¿publicacionkunapita grabayanqanta wiyayänampaq imanirtaq ninkitsu? Itsa más alli leita yachakunman grabacionchö wiyanqanta papelchö qatir o shimin rurinllacho qatirqa. Hina Qellqeta y leita yachakunëkipaq follëtopis yanapanmanmi. Wakin markakunachöqa anciänokunam congregacionchö patsätsiyashqa leita yachatsikuyänampaq. ¿Tsënö rurayanqëki yanapayäshunkimantsuraq? Kë llapan yachakonqantsikkunawan “Diospa palabranta” leir shumaq yachakuyänampaq yanapakïtam munantsik, tsënöpa musyaq tikrayänampaq y salvakuyänampaq (2 Tim. 3:15).