¿Imanötaq yanapashwan ichiklla leyita yachaqkunata?
1. ¿Imanirtaq sasaraq ichiklla leyita yachaqkunata Bibliapita yachatsinan?
1 Wakin nunakunaqa Diospita masllam yachakïta munayan, peru leyita mana alläpa yacharmi, Bibliata y wakin librukunata leyita mantsayan. Tsëmi, itsa allitsu kanman qallananllachöqa Yachatsikun libruta qorinqantsik. ¿Imanötaq Diospa kaqchö yanapashwan tsënö nunakunata? Ishkë chunka nacionkunachömi yachaq publicadorkunata tsëta tapuyashqa, tsëmi imanö ruranapaq kaqta musyatsikuyarqan, tsëkunata rikärishun.
2. ¿Ima alli yanapakïkunataq kan ichiklla leyita yachaqkunata yanapanapaq?
2 Juk estudianti ichiklla leyita o mana yachaptinqa, Diosta wiyakï o Diosta wiyakï imëyaqpis kawakunëkipaq follëtuwan estudiu qallëta puëdishwanmi. Estädus Unïdus nacionchömi juk precursor, nunakunata kë ishkan follëtukunata rikäratsir tapurin mëqanwan yachakïta munanqanta. Kenia nacionchö sucursalmi willakun kë publicacionkunaqa alläpa yanapakunqanta, porqui Africachöqa nunakuna yachakuyan manam tapukïkunawan respuestakunawantsu. Estudiashqa nunapaqqa itsa fäcil-lla leyinampaq y tapukïta contestanampaq kanqa, peru ichiklla leyita yachaqpaqqa itsa fäciltsu kanqa. Mëtsikaq publicadorkunam estudianti ichiklla leyita yachaptinqa, Diospa alli willakïninkuna o Diospa amigon kashwanmi follëtukunawan o Bibliapita willakïkuna willakoq librömi neq libruta utilisäyan.
3. ¿Imatataq cuentaman churashwan leyita mana yachaqkunata shumaq yachatsinapaq?
3 Kallpata qoy. Itsa leyita mana yachaqkunaqa penqakuyanqa y mana precisäyanqanta pensayanqa. Estudianqantsik höra alli sientikunanta yanapanqantsikmi, Bibliapita mas yachakunampaq yanapakunqa. Mëtsikaq mana leyita yachaqkunam raslla yachakuriyan. Tsëmi, respëtuwan y kuyëpa tratanëki (1 Pëd. 3:15). Kallpachakuyanqampita y Diospa kaqchö poqïkäyanqampita imëpis felicitë, tsëmi yanapanqa yachakur sïguiyänampaq.
Itsa leyita mana yachaqkunaqa penqakuyanqa y mana precisäyanqanta pensayanqa. Estudianqantsik höra alli sientikunanta yanapanqantsikmi, Bibliapita mas yachakunampaq yanapakunqa
4. ¿Imanötaq animashwan ichiklla leyita yachaqkunata preparakuyänampaq?
4 Estudianti ichiklla leyita yachaptimpis, preparakunampaq animë. Sudafricapita wakin publicadorkunaqa, estudiantinkunatam niyan preparakur yanapayänampaq leyita yachaq familiankunata o amïgunkunata mañakuyänampaq. Gran Bretañachönam juk publicador, estudiantinkunata yachëkätsirnin wakin pärrafukunachöqa librunta mañarin, preparakunqanta rikar estudiantin, respuestata mas fäcil-lla tarina kanqanta cuentata qokunampaq y pëpis preparakïta yachakunampaq. India nacionpita juk wawqim, estudiantinkunata shamoq semänachö yachakuyänampaq kaqpita dibüjukunata rikäratsin y manaraq kutiptin tsëman yarpachakunampaqmi nirin.
5. ¿Imanötaq pacienciayoq kashwan estudiuta dirigirnin?
5 Pacienciayoq kë. Utilisëkanqëki publicacionpa precisaq yachatsikïninkunata estudiantita shumaq entiendinampaq yanapë. Qallananchöqa itsa mas alli kanqa 10 a 15 minütulla yacharatsinqëki. Ama atskata yachatsita procurëtsu, sinöqa juk ishkë pärrafukunallata yacharatsi. Estudianti leyita demoraptinqa pacienciayoq kë. Jehoväta kuyanqanmi yanapanqa, mas alli leyita yachakunampaq. Tsëmi Jehoväta mas kuyanampaqqa, yachatsir qallanqëkipita patsë reunionkunaman invitanëki.
6. ¿Imanötaq leyinampaq pitapis yachatsishwan?
6 Estudiantiqa Diospa kaqchö ras poqunqa, alleq leyita yachakurmi (Sal. 1:1-3). Mëtsikaq publicadorkunam estudiuta cada usharir, Qellqeta y leita yachakunëkipaq neq follëtuwan juk rätu yanapayan. Estudianti qelanaptinqa, itsa yanaparinkiman wakin rurëkunachö alli yachakunqankunata yarpätsir. Kallpachakunqanta Jehovä bendicinampaq kaqta niri y yanapakïninta mañakunampaq animari (Prov. 16:3; 1 Juan 5:14, 15). Gran Bretaña nacionchö wakin publicadorkunanam estudiantinkunata animayan rurëta puëdiyänampaqnö rurëta churapakäyanqampaq. Tantiyarinapaq, letrakunata yachakïta, Bibliapa versïculunkunata tariyänampaq y leyiyänampaq, y tsëpitana fäcil-lla entiendina publicacionkunata leyiyänampaq. Höraqa leyinampaq pitapis yachatsirqa, leyita munanampaqmi yanapanantsik.
7. ¿Imanirtaq ichiklla leyita yachaqkunata Bibliapita yachatsir jaqishwantsu?
7 Jehoväqa precisaqpaqmi churan ichiklla leyita yachaqkunata (Job 34:19). Shonqunkunachö ima kanqantam pëqa rikan (1 Crön. 28:9). Tsëmi jaqinantsiktsu ichiklla leyita yachaqkunata Bibliapita yachatsita. Mëtsika yanapakïkunam kan yachatsir qallanapaq. Tiempuwanqa, Yachatsikun libruwannam yachatsir qallëkushwan, tsënöpa estudianti Bibliapita mas alleq entiendinampaq.