¿Imanöraq tapumashqa contestashwan?
1. Pipis tapumashqa, ¿imanirtaq Jesusnölla contestëta tïrantsik?
1 Jesusta tapukuyaptin alli contestanqantaqa, kanan witsanyaqmi pënöqa manam pipis yachatsikushqatsu niyan nunakuna. Tsëmi Diospita yachatsikonqantsikchö tukïta tapumashqa alli contestanapaqqa pëpita yachakushwan (1 Ped. 2:21).
2. ¿Imataraq rurashwan pipis tapumashqa alli contestanapaq?
2 Puntataqa wiyanantsikllaraqmi: Nunakuna imanir tapuyanqanmanmi Jesusqa puntata pensaq. Tsënöllam tapumaqnintsik imata pensëkanqanta musyarinapaqqa noqantsikpis tapurinantsik. “¿Qamkunaqa Jesusman creiyankiku?” nir pipis tapumarnintsikqa, itsa Navidad fiestata imanir mana celebranqantsikta musyëta munar tapumashwan. Tapumaqnintsik imata musyëta munanqantapis cuentata qokurqa, shumaqmi yacharatsishun (Luc. 10:25-37).
3. ¿Imakunaraq yanapamashwan pipis tapumashqa alli contestanapaq?
3 Bibliawan yachatsikushun: Tapukuyanqampa respuestanta kikin Bibliachö imëpis rikätsikonqantsikmi más alliqa (2 Tim. 3:16, 17; Heb. 4:12). Razonamiento libro, y Traducción del Nuevo Mundo de las Santas Escrituras Bibliachö “Temas bíblicos para consideración” neqmi yanapamäshun ashikanqantsik textota tarinapaq. Biblia nenqanta mana kaqpaq churaq nunawan parlarpis, shumaqllam rikäratsishwan imata yachatsikonqantapis. Unë tiempokunapitana nunakunata yanapanqanmanmi pensatsishwan. Jesusnö yachatsikushqaqa, “qellëpita shumaq rurashqachö churaraq öropita manzänanömi” tapumanqantsikta contestanqantsik kanqa: alli, shumaq y yanapakoq (Pro. 25:11).
4. ¿Llapan tapumanqantsiktatsuraq contestëta tïrashwan?
4 ¿Tsë höratsuraq contestëta tïrashwan? ¿Ima ninkimanraq tapuyäshuptiki mana contestëta yacharqa? “Manam musyätsu, pero yachakaramurmi contestanaqpaq yapë kutiramushaq” nirinqëkim más alliqa kanman. Claro kaqta parlakurinqëkita y rasun kaqta yacharatsïta munanqëkita rikarqa itsa yapë kutinëkitapis munarenqa. Pero chikimarnintsik plëtukïllata ashiptenqa, Jesus ruranqannölla qampis mastaqa parlapënatsu (Luc. 20:1-8). Hina, pipis Diospita manana yachakïta munëkar tapupäshuptikipis witikurinkimanmi, tsënöpa yachakï munaq nunakunatana ashinëkipaq (Mat. 7:6).
5. ¿Imatataq Jesuspita yachakurerqontsik nunakuna tapumashqa contestanapaq?
5 Clärom këkan, Jesusqa allim musyarqan yachakïta munar tapuyaptin ‘rason caqta willacunampaqqa’ Jehoväpa yanapakïnintaraq wananqanta (Juan 18:37). ¡Imanö shumaqmi ‘wiñe cawe munaqcunata’ yanapanapaq Jesuspita yachakushqaqa! (Hech. 13:48.)