Chacracunacho miquicuna elluyänequipaq poqurishqanam
1. ¿Ima precisaq trabäjotaq kanan witsan rurakëkan?
1 Samaritäna warmita yacharatsïkurmi, qateqninkunata Jesus kënö nirqan: “Alleq cäyiyë. Chacracunacho miquicuna elluyänequipaq poqurishqa[nam]” këkan (Juan 4:35, 36). Imëka cosecha ëlloq cuentam Diospita yachakï munaq nunakunata ëllïkäyarqan, y pëqa tsë llapan rurakänampaq kaqta musyëkarqannam. Y kanampis ciëlopitam tsë cosecha ëllupakïchö yanapakïkämun (Mat. 28:19, 20). ¿Imataq rikätsimantsik nunakuna yachatsichö imëpitapis más trabajo kanqanta?
2. ¿Imanötaq musyantsik hinantinchö cosecha imëpitapis más këkanqanta?
2 Hinantin Patsapa cosecha. 2009 watachömi, más de 276.233 publicador mirëkurqantsik hinantin Patsachö. Y yachatsikuyänanta michäkuyanqan nacionkunachönäqa más de 1.359 mirëkuyarqan. Cada killam 7.619.000 estudio biblicota informayarqan, tsëqa llapan publicadorkunapitapis más atskam y pasaq wata informayanqampitapis medio millón masmi. Më tsëchö yachatsikoqkuna más pishiyaptinmi, misionërokunata más mañakïkäyan. Atska nacionkunachömi huk idioma parlaq nunakunatapis ëllïkäyan. Clärom këkan, cosecha ushakanqanmannömi Jehoväqa más nunakunata ëllïkätsin (Isa. 60:22). Y ¿qamqa chakrachö mikï ëllïpaq cuenta nunakuna këkäyanqantaraqku rikanki?
3. ¿Imataq niyan wakinkunaqa imëka cosechaq cuenta nunakunata ëllïpaq?
3 Territoriontsikchö cosecha. Itsa höraqa pipis kënö ninman: “Territoriochöqa mananam nunakuna yachakïta munayannatsu”. Y tsëqa rasunmi, wakin territoriokunachöqa manam wakinkunachönötsu nunakuna Diospita yachakïta munayan, tsëmi wakin wawqikuna y panikunaqa yachakïta munaq nunakuna manana kayanqanta, y imëka trïgota pallapaq cuenta huk ishkë quedaqkunallatana ëllupëkänata pensayan. ¿Pero tsënötsuraq?
4. ¿Imanötaq yachatsikïta rikänantsik y imanir?
4 Qallanampita ushanqanyaqmi cosëchachöqa alli trabajantsik. Rikäri Jesus kënö ninqan alläpa precisanqanta: “Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq” (Mat. 9:37, 38). Jehovämi duëñoqa, pëmi musyan imë y mëchö cosecha kanampaq kaqtapis (Juan 6:44; 1 Cor. 3:6-8). Y noqantsiktaqa, ¿ima rurëtaq tocamantsik? Kikin Biblian kënö nin: “Qoyapa murïkita murï, y tardeyanqanyaq makikita hamatsitsu” (Ecl. 11:4-6). Pero cosechaq cuenta nunakunata ëllïqa avanzakëkannam ¡tsëmi qelanänantsiktsu!
5. ¿Imanirtaq ganas gänaslla yachatsikïkänantsik mana wiyakïta munëkäyaptimpis?
5 Cosëchaqa manam ushakanraqtsu. Congregacionpa territorionchö mëtsika kutina yachatsikushqa kar, y nunakuna mana wiyakïta munayaptimpis, precisanmi ganas gänaslla mana qelanashpa yachatsikunantsik, ¿imanir? (2 Tim. 4:2.) Porque kë mundochö imëka mana allikuna pasakoqta rikarmi nunakunaqa puntatanönatsu kayan, y alli kawakïta munarmi hukläyana pensayan. Jövenkunapis winayanqanmannömi shonqunkunachö alli y yamë kawakïta munayan. Hina imëpis mana haqishpa yachatsikunqantsikta rikar itsa wakinkunaqa espantakuyanqa y puntata mana wiyamënintsikta munaqkunapis, itsa wiyaramäshunna. Hina paqwë mana wiyakïta munaq nunakunapis yachatsikïnintsikta musyayänan precisanmi (Eze. 2:4, 5; 3:19).
6. ¿Imataq yanapamäshun ganas gänaslla yachatsikunapaq?
6 Territoriontsikchö mana wiyakïta munayaptimpis, ¿Imataq yanapamäshun ganas gänaslla yachatsikunapaq? Wayin wayin yachatsikurpis rantikuyanqan citiokunachö o telëfonopapis Diospita yachatsikunqatsikmi. Hina huknöpapis rurashwanmi, nunakunata ima llakitsinqankunapitam parlapärishwan. Qoyakunapa, tardekunapa o hasta ampipapis wayinkunachö kayanqan höram yachatsikoq yarqushwan. Itsa más nunakunata yanapanantsikrëkur huk idiömatapis yachakushwan. Precursor regular karnäqa Diospa kaqchö mastam rurashun. Hina más alliqa kanman ichiklla publicadorkuna kayanqan citiokunaman yanapakoq ëwanqantsikmi. Jehová rikanqannö noqantsikpis yachatsikïta rikarninqa, imëkanöpapis tsë ëllupakïchö yanapakushunmi.
7. ¿Imëyaqraq cosechaq cuenta nunakuna ëllïchö yanapakushun?
7 Murukoqkunapaqqa ichikllam tiempo kan cosechapakuyänampaq, tsëmi mana hamarishpa ni mana qelanashpa ushayanqanyaq alli trabajayan. Tsaq tsënöllam hina Jehoväpita yachakïta munaq nunakuna ëllunampis alläpa precisan. ¿Imëyaqraq kë rurëchö yanapakushun? “Ushakë chäramunqa[nyaq]” y hasta kë “patsapa usheninyaq[mi]” (Mat. 24:14, NM; 28:20). Teytan mandanqanta Jesus ushaq ruranqannöllam, noqantsikpis mandamanqantsikta rurar ushanantsik (Juan 4:34; 17:4). Tsëmi yachatsikïnintsiktaqa ganas gänaslla y kushishqa kë mundopa ushëninyaq ruranantsik (Mat. 24:13). ¡Imëka cosechaq cuenta nunakunata ëllïqa manam ushakanraqtsu!
[2 kaq päginachö ninqan]
Qallanampita ushanqanyaqmi cosëchachöqa alli trabajantsik