“Actsicoq cuenta [...] cawacuyë”
1. ¿Imayoq kanqantsiktaq alläpa kushikïpaq?
1 Intipa o Rupaypa shumaq atsikyëninqa Patsa waranqampita Patsa ampinqanyaqmi shumaq atsikyar Jehoväta alaban. Pero Jesusqa manam tsë aktsiyoq kayänampaqtsu qateqninkunata nirqan, sinöqa ‘kawey aktsiyoq’ kayänampaqmi (Juan 8:12, QKW). Tsë aktsiyoq kanqantsikqa alläpa kushikïpaqmi, pero manam noqantsikllapaqtsu katsikunantsik. ¿Imanir? Jesusmi kënö nirqan: “Aktsitsun aktsikikuna nunakunapa nowpanchow”. Tsëta nirmi rikätsikurqan tsë aktsiwan nuna mayintsikkunata yanapanantsik alläpa precisanqanta (Mat. 5:16, QKW). Diospa kaqta mana musyaq nunakunaqa paqaschö cuentam kakïkäyan, tsëmi aktsichö kayänampaq yanapanantsik imëpitapis más precisan. ¿Imanötaq noqantsikpis Cristunö aktsintsikta atsikyätsishwan?
2. ¿Imanötaq Jesus rikätsikurqan nunakunaman aktsita chätsinan alläpa precisanqanta?
2 Yachatsikurnin. Jesusqa tiemponta, kallpanta y kapunqankunatam utilizarqan aktsi cuenta rasumpa kaq yachatsikïta llapan nunakunaman chätsinampaq, tsërëkurmi ëwarqan wayinkunaman, pläzakunaman, hirkakunaman y më tsëmampis. Pëqa musyarqanmi aktsi cuenta Diospa yachatsikïnin nunakunata alläpa yanapanampaq kaqta (Juan 12:46). Hinamampis, tsë aktsi më tsëman chänanrëkurmi, qateqninkunata yachatsirqan ‘que patsacho imeca actsi cuenta nunacunapaq cayanampaq’ (Mat. 5:14). Pëkunaqa aktsinkunata allim aktsïtsiyarqan nuna mayinkunapaq allikunata rurar y Diospa kaqta yachatsirnin.
3. ¿Imanötaq rikätsikushwan aktsi cuenta rasumpa kaq yachatsikïta alläpa kuyanqantsikta?
3 Diospa sirveqninkunapaqqa alläpam precisan ‘actsichonona cawacuyanqanta’ rikätsikuyänan, tsëmi llapan nunakunata yachatsiyan Diospa aktsimpita (Efe. 5:8). Escuëlachö o trabäjochö hamë hora wakinkuna rikäyänanchö Bibliata o wakin publicacionkunata leinqantsikmi yanapakun pillatapis Bibliapita yacharatsinapaq. Tsënö rurarmi huk pani huk estudio biblicota qallarqan y 12 estudiaq mayinkunata librota qararqan.
4. ¿Imanötaq alli portakunantsik alläpa precisan aktsintsik rikakunampaq?
4 Allikunata rurarnin. Hina aktsiyoq kanqantsiktaqa rikätsikuntsik alli rurënintsikkunawanmi (Efe. 5:9). Trabäjochö, escuëlachö o mëchö tsëchö këkarnimpis alli portakunqantsikqa rasmi rikakurin, y tsëmi yanapamantsik Bibliapita yachatsikurinapaq (1 Ped. 2:12). Tsënömi pasarqan 5 watayoq wambrawan, alli portakunqanta rikarmi teytankunata profesöran qayatsirqan. Y kënömi nirqan: “Pënö alli kaqta y mana alli kaqta alli bueno musyaq wambrataqa manam imëpis rikashqätsu”. Tsëqa rasunmi, yachatsikunqantsik y alli portakunqantsikqa nunakunata yanapanqam ‘kawey aktsita’ tariyänampaq y tsënöpa Diosnintsikta alabayänampaq.