Cällekunachö yachatsikïqa alläpa allim
1. ¿Imanötaq Jesus ruranqanta qatishwan?
1 Jesus kë Patsachö kanqan witsanqa, nänikunachö y nunakuna kayänan sitiokunachömi imëpis yachatsikurqan (Luc. 9:57-61; Juan 4:7). Pëqa munarqan tsë alläpa precisaq willakïta llapan nunakuna musyayänantam. Hina kanan witsampis tsënöllam, cällekunachö yachatsikïqa alläpa alli Diospa kaqta pï mëman chätsinapaq (Pro. 1:20). Kë ruranqantsikqa más alli yarqapamäshun, nunakunawan parlëta tïrashqa y yachëpa rurashqam.
2. Cällekunachö yachatsikur, ¿imanirtaq nunakunata parlapaq kikintsik witinantsik precisan?
2 Parlapäkïta tïrë. Tëkanqantsikman o shëkanqantsikman nunakuna shayämunanta shuyaränapa rantinqa, kikintsik witïkur parlaparinqantsikmi más alli kanqa. Kushi kushilla rikarëkar parlapë. Wakin publicadorkunawan yachatsikïkarqa, más alliqa kanman huk huk rakikärir nunakunata parlapëmi. Hinamampis, pillapis alli wiyakuptinqa, yapë parlakuriyänëkipaqmi mëchö täranqanta musyëta tïranëki. Yachakïta munaqnö kaptinqa, parlapëta ushaqnö këkar shumaqlla tapuri yapë parlakuriyänëkipaq mëchö tarinëkipaq kaqta. Wakin publicadorkunaqa imëpis yachatsikuyanqan cällellamanmi kutiyan, tsënöpam parlayanqan nunakunallawan imëpis tinkuyan y yachatsiyan.
3. Cällekunachö yachatsikurnin, ¿imanirtaq imë y imanö yachatsikunapaq kaqta musyanantsik precisan?
3 Musyë imanö y imë yachatsikïta. Alliraqmi pensanëki cällepa më lädonchö shakunëkipaq kaqta y pita parlapänëkipaq kaqtapis. Manam llapan pasaqtatsu parlapänëki. Alliraqmi rikänëki. Apurädo ëwakïkaqkunataqa haqiri pasakuyänanta. Hina negociokunapa punkunkunachö yachatsikurninqa yachëllapa yachatsikï dueño mana piñakunampaq. Höraqa más alli, negociokunapita nunakuna yarqayämuptin yachatsinqantsikmi. Pimampis witirninqa ama illaqpita mantsakätsitsu. Hina alläpam precisan pikunata publicacionkunata haqipunapaq kaqta musyanantsikpis. Pipis yachakïta mana alläpa munaqnö kaptinqa, itsa huk tratädon qorinkiman revistapa rantin.
4. ¿Imanirtaq alläpa alli y shumaq cällekunachö yachatsikï?
4 Cällekunachö yachatsikïqa yanapakun Diospa yachatsikïninta wallka tiempollachö pï mëman chätsinapaqmi (Ecl. 11:6). Itsa cällechö yachatsinqantsik nunakunaqa wayinkunachö mana imëpis tarinqantsikkuna kayanman. Tsëqa, ¿imanirtaq cällekunachö yachatsikunëkipaq tiempïkita patsätsinkitsu? ¡Tsëta rurëqa alläpa alli y shumaqmi!