Cällikunachö yachatsikïqa kananqa mas shumaqmi
1. Congregacionpa territoriunkunachö mëtsikaq nunakuna puriyänan sitiukuna kaptinqa, ¿imata rurayänampaqtaq niyashqa?
1 Congregacionkunapa territoriunchö mëtsikaq nunakuna puriyänan sitiukuna kaptinqa, mësakunata y mostradorkunata churëkur cällikunachö yachatsikunapaqmi niyashqa. Mostradorkunata utilisëkarqa juk publicadorllapis tsëchömi këkanman. Mësata utilisarnam ishkaq publicadorkuna këkäyänan. Llapankunam shumaq tratakoq y kushi kushilla kayänan. Pillapis mostradorman witiriptinqa, juk kaq publicadormi kënö nir parlar qallarinman: “¿Imëllapis tapukurqunkiku kë yachatsikïpita Biblia ima ninqanta?”. Tsëyaqnam, mostradorpa amänunllachö juk o ishkë publicadorkuna këkäyänan, tsëpa pasaq nunakunata yachatsiyänampaq.
2. Mostradorkunawan cällikunachö yachatsikï imanö yanapakunqanta, juk pasakunqanwan willakaramï.
2 Cällikunachö yachatsikïmi yanapakushqa mëtsikaq nunakuna Bibliata estudiar qallayänampaq. Tantiyarinapaq, universidächö estudiaq shipashmi Jehoväpa testïgunkunapita juk willakïta qellqëta munarqan, peru Jehoväpa testïgunkuna Yachatsikuyänan Wayita manam tarirqantsu. Juk sëmana pasariptinnam, universidäninchö atska publicacionyoq mostradorta rikärirqan. Bibliata yachakurmi qallëkurqan, kananqa bautisakushqanam y cällikunachö yachatsikurninmi yanapakïkan.
3. ¿Ima niyantaq cällikunachö yachatsikur yanapakoqkuna?
3 Cällikunachö yachatsikur yanapakoq juk panim kënö nirqan: “Wakinkunaqa cada killa yarqamoq revistakunata apayänampaqmi witiyämun. Y wakinkunanam Jehoväpa testïgunkunapitaqa imëpis wiyayashqatsu. Kë mushoq yachatsikïwanqa mëtsikaq nunakunamanmi chëta puëdintsik”. Juk panipis kënömi nirqan: “Tsënö yachatsikïqa alläpa jukläya y shumaqmi, porqui nunakunam musyëta munar noqantsikman shayämun”.
4. ¿Imanirtaq mas alliqa kanman mostradorkunata tsë junaqlla, tsë sitiullachö y tsë höralla churanantsik?
4 Mas alliqa kanman mësakunata y mostradorkunata tsë junaqlla, tsë sitiullachö y tsë höralla imëpis churayänanmi. Nunakuna rikäyänanllaman churashqaqa mas fäcilmi kanqa tapukuyänampaq o publicacionkunata mañakoq witiyämunampaqpis. ¿Congregacionnikiqa imallatapis rurayashqaku cällikunachö yachatsikuyänampaq? Kallpachakushun kë shumaq yachatsikïchö, “Diospa mandaquinincho imano canantsicpaq caqta” yachatsikur yanapakunapaq (Lüc. 9:60).