¿Wambrëkikuna listoku këkäyan?
1. ¿Imanirtaq alläpa precisan wambrëkikuna listo këkäyänan?
1 Ichikllachönam escuëlachö cläsekuna yapë qallarinqa. Tsëqa itsa tukï pruëbakunapa jövenkuna pasayanqa, tsënö kaptimpis, ‘rason caqta’ yachatsikuyänampaqmi tiempo karinqa (Juan 18:37). Y wambrëkikunaqa, ¿listonaku këkäyan?
2. Wambrëkikuna listo këkäyänampaq, ¿imatataq musyayänan?
2 ¿Wambrëkikuna alleqku musyayan bandërata saludë, himno nacionalta cantë y tukï fiestakunata celebrë mana alli kanqanta? Y, ¿imanir mana alli kanqanta musyayanku? ¿Universidadta ëwayänampaq tukïta niyaptin alli tsarakuyänampaq listoku këkäyan? Chölokunawan o chïnakunawan purikuyänampaq, alcoholta upyayänampaq o drögakunata utilizäyänampaq niyaptin, ¿ima rurëtapis musyayanku? ¿“Religionnïmi permitimantsu” niyanllaku o musyayanku imanö yacharatsiyänampaq kaqta? (1 Ped. 3:15.)
3. ¿Imanötaq Familiachö Diosta Adorayänan Hörachö wambrakunata teytankunawan mamankuna yachatsiyanman?
3 Familiachö Diosta Adorana Hörachö yachakuyë. Itsa tiempo pasanqanmannö tukï problëmakunata altsëta yachakuyanqa. Pero tsë problëmakunapita puntallapitana parlariyaptikiqa, más kushishqam colegioman kutiyanqa. ¿Imanirtaq maslla parlariyankitsu cada Familiachö Diosta Adorayänëki Hörakuna? Allichi wambrëkikunata tapuriyankiman escuëlankunachö ima sasakunata pasayänampaq kaqta pensayanqanta. Hina pasaq watakunachö yachakuyanqëkita itsa yapë rikäriyankiman, tsënö rurayaptikiqa más allim yachakuriyanqa (Sal. 119:95). Itsa profesor o estudiaq mayin tukur shumaq yachatsiyankiman. Ima tapukïtapis Bibliawan contestayänampaq yachatsiyë, hina Razonamiento y Los jóvenes preguntan nishqan librokunapita parlayänampaqpis yachatsiyë. Huk cristiänam cada wata cläsekuna manaraq qallaptin wambrankunata yachatseq mushoq profesorninkunata creenciankunapita imanö parlapäyänampaq, y Jehoväpa testïgon kayanqanta willakuyänampaq. (Rikäri 15 de diciembre de 2010 kaq La Atalaya nishqan revistapa 3-5 päginankunata.)
4. ¿Imatataq puntallapitana yachaq teytakunaqa rurayanman?
4 Kë ushanan hunaqkunachö “allapa sasa cawaqui tiempucuna” kaptinmi, jövenkunapa tukï problëmankuna kan (2 Tim. 3:1). Tsëmi wakin teytakunaqa wambrankunata puntallapitana yachatsiyan (Pro. 22:3). Awmi, wambrëkikunataqa cläsenkuna manaraq qallaptinmi alli yachatsiyänëki.