¿Escuëlaman ëwanëkipaq listonaku këkanki?
1. ¿Ima rurëtataq escuëlachö qonqanëkitsu?
1 ¿Kanan wataraqku escuëlaman yëkunki, o atska watanaku estudiëkanki? Tsëraq o unëna yëkushqa kaptikipis, escuëlachöqa cristiano kanqëkirëkur tukïtachi pasanki, hina imëkatapis niyäshunkichi. Pero manam qonqanëkitsu escuëlaqa ‘rason caqta willacunëquipaq’ alläpa alli kanqanta (Juan 18:37). ¿Yachatsikunëkipaq listonaku këkanki?
2. ¿Imanirtaq escuëlaman ëwëta yarpachakunëkitsu?
2 Alli pensaptikeqa, Jehová, mäkoq mäkoq cumplido sirveqnin y teytëkiwan mamëki allinam yachatsiyäshorqunki, tsëmi ni imatapis yarpachakunëkinatsu (Pro. 1:8; 6:20; 23:23-25; Efe. 6:1-4; 2 Tim. 3:16, 17). Itsa musyankina escuëlëkichö imëkakunata pasanëkipaq kaqta. Y Bibliapita alli yachakushqana këkarqa, yachatsikunëkipaq alistakïkëllana (Pro. 22:3). Punta kaq y qepa kaq Los jóvenes preguntan librokuna yachatsikonqanta lei, y joven mayikikunapaq ¡Despertad! revistachö yachatsikonqantapis.
3. ¿Imanöraq escuëlachö yachatsikunkiman?
3 Escuëlëki yachatsikunëkipaq alläpa alli kanqanta y tsëchö tukïnöpa yachatsikunëkipaq kaqta yarpë. Imanö vestikonqëkita, imanö altsakonqëkita, imanö parlanqëkita y imanö kanqëkitapis llapanmi rikëkäyanqa. Profesornikikunata y estudiaq mayikikunata respetanqëkita, alli nötakunata hipinqëkitapis rikëkäyanqam. Hina imatapis alli rikëkur-raq ruranqëkita cuentata qokuyanqam. Tsëqa, ¿manatsuraq imanir llapampita hukläya kanqëkita tapuyäshunki? (Mal. 3:18; Juan 15:19.) Tsëllanam Diospita yacharatsinkiman (1 Tim. 2:9, 10). Y cläsekuna ushanqanyaqqa bandera saludë, himno nacional cantë, y imëka fiestakunapis mëraq kanqa. Imanirtaq tsëkunata rurankitsu nir tapuyäshuptikeqa, ¿ima ninkiraq? ¿“Jehoväpa testïgonmi kä, tsëmi rurätsu” ninkillatsuraq? ¿O hinan höratsuraq Kuyakoq Diosnikipita yacharatsinki? Estudiaq mayikita, profesornikita o pita karpis yachatsinëkipaq listo kanëkipaqqa, alli yachakonqëki y Jehovämi yanapashunki (1 Ped. 3:15).
4. ¿Imanirtaq escuëlaman ëwëta mantsanëkitsu?
4 Itsa escuëlaman ëwëta mantsapëkanki, pero yarpäri, atskaqmi alli kanëkipaq yanapayäshïnikita munayan. Hinamampis, ¿escuëlachö alli yachatsikunëkipaq kaqta yarpë manaku alläpa kushikïpaq? Tsëqa, ¡ama yarpachakïtsu! ¡Escuëlapaq listonam këkanki!