Ama mantsakïtsu
1. ¿Imë y mëchö këkartaq yachatsikunëkipaq valorta wananki?
1 ¿Imëllapis qampita burlakuyanqanrëkur escuëlachö Diospita yachatsikïta mantsakushqankiku? Mantsakoq karninnäqa alli valortaran wananki. Rikärishun mä imash yanapashunkiman.
2. ¿Imanirtaq escuëlachö yachatsikunëkipaq alliraq rikänëki?
2 Imë höra yachatsikunëkipaq kaqta alliraq rikë. Escuëlëki yachatsikunëkipaq alli territorio kaptimpis, yarpë, manam wayin wayin yachatsikunqëkinötsu llapankunawan Bibliapita parlanëki. Alleqran rikänëki imë y pikunata parlapänëkipaq kaqtapis (Ecl. 3:1, 7). Itsa tarëata ruranqëkichö creinqëkikunapita parlarinkiman. O itsa estudiaq mayiki tapurishunkiman fiestakunaman y wakin celebracionkunaman imanir mana ëwanqëkita. Wakin cristiänokunaqa cläsenkuna qallanqan hunaqpitam Jehoväpa testïgon kayanqanta profesorninkunata willayashqa y creenciankunapita parlaq publicacionkunata haqipuyashqa. Wakinnam publicacionkunata mësankunaman churayan, tsënöpa estudiaq mayinkuna rikarnin tapupäriyänampaq.
3. ¿Imanötaq escuëlachö Diospita yachatsikunëkipaq yachakunkiman?
3 Puntallapitana yachakï. Puntallapita yachakurqa manam mantsakunkitsu (1 Ped. 3:15). Tsëmi imata tapuyäshunëkipaq kaqman, y imanö contestanëkipaq kaqman pensanëki (Pro. 15:28). Allichi Bibliata, Los jóvenes preguntan, Razonamiento librokunata y Dios llapanta kamanqampaq parlaq wakin publicacionkunatapis apankiman. Hinamampis Familiachö Diosta Adorayänëki Hörachö tsëkunapita yachakuyänëkipaq teytëkikunata niri.
4. ¿Imanirtaq alli kanqa escuëlachö yachatsikunëki?
4 Ama llakinëtsu. Diospita yachatsikuptiki estudiaq mayikikuna burlakuyänampaq kaqta alläpaqa ama mantsakïtsu. Itsa wakinkunaqa mana mantsakushpa parlanqëkita rikäyanqa y wiyariyäshunkimampis. Pero mana wiyayäshuptikiqa ama llakinëtsu. Yachatsikïta munanqëkitaqa Jehová alläpam kushikunqa (Heb. 13:15, 16). Y “mana mantsacushpa” yachatsikunëkipaq Diosman imëpis mañakï (Hech. 4:29; 2 Tim. 1:7, 8). Yarpakurkï, ¡imanöraq pillapis wiyarishuptiki kushikïkunki! Tsënö yachatsikuptikiqa, itsa Jehoväpa sirveqnin mëqanllapis tikrarinqa.