Nunakunata yanapashun Diosta wiyakuyänampaq
1. ¿Ima follëtokunatataq chaskirqantsik “Llapan nunacuna Mandadiquicho catsun” neq Jatun Asamblëachö, y imanirtaq alläpa yanapakun?
1 “Llapan nunacuna Mandadiquicho catsun” neq Jatun Asamblëachömi chaskirqantsik Diosta wiyakï imëyaqpis kawakunëkipaq follëtota, y Diosta wiyakï wallkalla letrayoq follëtotapis. Wallkalla letrayoq kayaptinmi sasatsu juk idiömakunaman tikratsiyänan. Tsëmi, tsë witsampaqqa, Diosta wiyakï imëyaqpis kawakunëkipaq follëtota 431 idiömakunaman tikratsiyänampaq autorizashqana karqan.
2. ¿Pikunatataq yanapan tsë ishkan mushoq follëtokuna?
2 ¿Pikunatataq tsë follëtokuna yanapanqa? Rikärishun entero Patsachö pasanqankunata:
• Juk publicador parlapanqan nuna o watukaq kutinqan nunam leita yachantsu o ichiklla yachan.
• Juk publicador yachatsikunqan territoriochö täraq nunakunapaqmi idiömankunachö kantsu publicación o wallkalla kan. Jina capazchi wakin nunakunaqa yachayanmantsu leita idiömankunachö qellqashqa publicacionkunata.
• Juk publicadormi territorionchö wiyëta mana puëdeqkunata sëñaschö yachatsin.
• Leita manaraq yachaq wamrantam juk teyta Bibliapita yachatsita munan.
3. ¿Imanötaq Diosta wiyakï folleto?
3 Follëtokuna imanö kayanqan. Diosta wiyakï follëtoqa juk ishkë letrakunayoqllam. Página ushanankunachömi wallkalla yachatsikï y tsëpita parlaq texto yurin. ¿Imarëkur? Këman pensari, pipis qorishunkiman mana reqinqëki letrakunawan qellqashqa juk idiömachö follëtota. Shumaq dibüjokunayoq kaptimpis, ¿entiendinkimantsuraq? Capaz mana. Jina tsënöllam atska letrakunayoq publicacionkunaqa leita mana yachaqkunata yanapantsu. Tsëmi kë follëtochöqa mëtsika dibüjokuna kan, y alli pensëkur churashqam. Fácil-lla yachakuyänampaqmi juk dibüjopita qateqnin kaq dibujo mëqan kanqanta takshalla señalkuna willakun.
4. Willakaramï Diosta wiyakï imëyaqpis kawakunëkipaq folleto imanö y imapaq kanqanta.
4 Diosta wiyakï imëyaqpis kawakunëkipaq follëtopa dibüjonkunapis Diosta wiyakï follëtopa dibüjonkunanöllam. Kë follëtoqa rurakämushqa ichiklla leeqkunapaq o tsëraq yachakïkaqkunapaqmi. Diosta wiyakï follëtowan pitapis yachatsirqa, maslla entienditsinantsikpaq utilicëta puëdentsikmi Diosta wiyakï imëyaqpis kawakunëkipaq follëtota. Cada ishkë päginakunachömi juk yachatsikï kan. Cada yachatsikïpa umanchömi izquierda kaq lädochö juk tapukï yurin y ishkan päginankunachömi respuestan këkan. Cada dibüjochömi juk willakï kan, y wakin willakïchöqa Bibliapita textokunam yurin. Wakin päginakunapa jawan esquïnakunachöqa, precisaq yachatsikïkuna y textokunam juk recuadrochö yurin. Yachayanqanmannömi tsëkunatapis utilicëta puëdentsik.
5. ¿Imë y imanötaq kë mushoq follëtokunawan yachatsikushwan?
5 ¿Imanötaq utilizashwan? Wayin wayin yachatsikoq ëwarpis kë ishkan follëtokunata utilicëta puëdentsikmi, tsë killachö tsë follëtokunawan yachatsikunapaq mana niptimpis (rikäri “¿Imanötaq yachatsikushwan?” neq recuadrota). Yachakïta munaqkunaman kutirqa, “qampaqmi këta apëkämö” nirllam follëton qorishwan.
6. ¿Imanötaq estudio biblicota qoshwan ishkan mushoq follëtokunata utilizarnin?
6 Diosta wiyakï follëtochöqa manam qellqashqa tapukïkuna kantsu, tsëmi Yachatsikun librowannötsu estudio biblicota qoshwan. Më tsë marka nunakunatam unë pasanqankunata wiyëqa gustan. Tsëmi dibüjokunata utilizar Bibliapita willakïkunata cuentaqnölla yachatsishqaqa gustayanqa. Dibüjokuna imata yachatsikunqanta rikätsi. Kushi kushilla yachatsi y parlakaramunanta procurë. Päginakunapa ushananchö textokunata leiyë y imata yachatsikunqanta rikäyë. Tapukïkunata rurë entiendikanqanta o mana entiendikanqanta musyanëkipaq. Diosta wiyakï imëyaqpis kawakunëkipaq follëtowan pitapis yachatsirqa, leiyë cada dibüjopaq parlaq willakïta y textokunata.
7. ¿Imanötaq Bibliapita estudiëkaqkunata yanapashwan Diospa kaqchö más poquyänampaq?
7 Yachakïkaqkunata yanapashun Diospa kaqchö más poquyänampaq. Bibliapita yachatsinqantsikqa nunakunata yanapanqa Jehoväta más reqiyänanrëkur leita yachakuyänampaqmi (Mat. 5:3, NM; Juan 17:3). Tsëmi Diosta wiyakï follëtowan pitapis yachatsirqa, tiempowanqa capaz puëdenkiman leita yachatsita, y nïkur Diosta wiyakï imëyaqpis kawakunëkipaq follëtowanna yachatsita. Kë ishkan follëtokunapita mëqanwampis yachakïta usharirpis, bautizakunampaqqa Yachatsikun librowan o juk publicacionwanraq estudianan Bibliapita alli yachakunampaq.
8. ¿Imanirtaq alläpa agradecikuntsik kë mushoq follëtokunata katsinqantsikpita?
8 Imëyaqpis kawakïta munaq nunakunaqa Ciëlochö y Patsachö Autoridadyoq Diostam wiyakuyänan (Isa. 55:3). Jehoväqa “llapan nunacuna”, leita mana yachaqkunapis, pëta reqiyänanta y wiyakuyänantam munan (1 Tim. 2:3, 4). ¡Alläpam kushikuntsik Diosta wiyakuyänanrëkur nunakunata yanapanantsikpaq kë mushoq follëtokunata katsinqantsikpita!
[3 kaq päginachö recuadru]
¿Imanötaq yachatsikushwan?
Follëtopa 2 y 3 kaq päginanta rikäratsir kënö tapuri: “¿Kënö shumaq Patsachö kawakïta munankimantsuraq? [Shuyäri contestashunëkita.] Bibliaqa nimantsik Dios ichikllachöna kë Patsata juk shumaq huertaman tikratsimunampaq kaqtam, tsëchöqa mananam kanqanatsu imatapis mantsë, waktsayë ni qeshyakunapis. Rikärishun tsëchö täränantsikrëkur imata ruranantsikpaq kaqta. [3 kaq päginapa umanchö këkaq willakïta leiri y nïkur Isaías 55:3 textopita yacharatsi.] Këchöqa nin Diosta wiyakunantsik precisanqantam. Pero ¿imanötaq Diosta wiyakuntsik?”. 4 y 5 päginakunata ashi, y yachakuyë respuestanta. Tiempon mana kaptinqa, follëtota qori y yapë kutiptiki yachakuyänëkipaq niri.