Diospa alli willakïninkuna mushoq follëtota imanö utilizänapaq
Yachakï munaqkunaman kutinapaq y estudio biblicota qallanapaqmi rurakämushqa
1. ¿Ima publicaciontaq yachakïta munaqkunaman kutinapaq y estudio biblicota qallanapaq “Shonquta cuidashun” nishqan asamblëachö yarqamurqan?
1 ¡Imanömi kushikïkurqantsik “Shonquta cuidashun” neq tïtuloyoq Jatun Asambleachö, yachakïta munaqkunaman kutinapaq y estudio biblicota qallanapaq juk mushoq publicacionta chaskirirnin! Diospa alli willakïninkuna follëtoqa shuyaran follëtopa rantinmi, kë mushoq follëtochöqa ichiklla y fäcil-lla yachatsikïninkuna kaptinmi punkunkunallachö estudio biblicota qallanapaq yanapamäshun. Shuyaran follëtoqa cristiänokuna imanö kawayänampaq kaqtam yachatsikoq, tsëmi yachakïkaqkunapaqqa sasaraq entiendinan karqan. Pero, kë mushoq follëtoqa Bibliachö alli willakïkunapaqmi masqa parlan (Hech. 15:35).
2. ¿Imanirtaq Alli willakïninkuna neq folleto rurakämushqa?
2 ¿Imanirtaq mushoq folleto rurakämushqa? Entero Patsachö cristiano mayintsikkunam mañakïkäyarqan nunakuna fäcil-lla yachakïta munayänampaqnö juk publicacionta, y tsënöpa Yachatsikun librota estudiëta animayänampaq. Mëtsika nunam juk librowan estudiëtaqa qelanäyan, pero juk fäcil-lla publicacionwanqa munayanmi. Jinamampis, mëtsika idiömakunamanmi follëtotaqa tikratsita puëdiyan .
3. ¿Imachötaq kë folleto estudianapaq wakin publicacionkunapita jukläya?
3 Folleto imanö kanqan. Bibliapita yachakunapaq casi llapan publicacionnintsikkunaqa nunakuna leir y kikinkunalla Bibliapa rasumpa yachatsikïninta entiendiyänampaqnöllam rurakämushqa. Pero kë follëtoqa alläpa jukläyam, juk yachatsikoq yanapanantaran wanan. Tsëmi pitapis qorninqa, más alli kanqa juk o ishkë pärrafokunata yacharatsinqëki. Wallkalla kaptinmi nunapa punkunllachö o trabajanqan sitiokunallachö yacharatsita puëdintsik. Punta kaq yachatsikïnin estudiota qallanapaq alli kaptimpis, casi llapan yachatsikïninkunam yanapakun.
4. ¿Imanötaq kë folleto yanapamantsik estudiantekunata Bibliapita directo yachatsinantsikpaq?
4 Casi llapan publicacionnintsikkunachömi tapukïkunapa respuestankunaqa pärrafonchö këkan. Pero kë follëtochöqa tapukïninkunapa respuestankunaqa Bibliapa textonkunachömi këkan, porque mëtsikaqmi publicacionnintsikkuna ninqampita yachakïta munaqnötsu kayan, pero Bibliapita directo yachakïtaqa munayanmi. Tsëmi, casi ni mëqan textopis copiashqa pärrafochö yurintsu. Más alliqa Bibliapita leinqantsikmi kanqa. Tsënöpam estudiantekuna musyariyanqa yachakïkäyanqakunaqa Diospita shamunqanta (Is. 54:13).
5. ¿Imanirtaq llapan yachatsikoqkuna cada tëmapaq alli preparakuyänan?
5 Kë follëtoqa manam Bibliapa llapan textonkuna ima ninan kanqanta pärrafonchö musyatsikuntsu. Tsënöqa rurakämushqa estudiantekuna tapukuyänampaq y publicadorkuna musyayanqanmannö yachatsikuyänampaqmi. Tsënöpam cada yachatsikïpaq alli preparakunantsik. Pero yarpäshun, ama alläpaqa parlashuntsu yö. Bibliapa textonkuna ima ninan kanqanta yachatsi gustamashqapis, más alliqa kanqa kikin estudiantekuna ima ninan kanqanta entiendiyanqanta nimanqantsikmi. Alli pensëkur y respëtowan tapukïkunata rurarninqa ichikllapa ichikllapam alli kaq yachatsikïman apëkäshun (Hech. 17:2).
6. ¿Imanötaq kë follëtota utilizashwan a) Diosman ni Bibliaman nunakuna mana creiyanqan sitiokunachö? b) wayin wayin yachatsikurnin? c) estudio biblicota directo qallarnin? d) yachakïta munaqkunaman kutirnin?
6 Yachakuyänampaq wakin publicacionkunatanöllam kë follëtotaqa imëpis qarakïta puëdintsik, tsë killa tsëwan mana yachatsikunantsik kaptimpis. Mëtsikaqtam kë follëtowan punkunkunallachö estudio biblicota directo qallë gustayan. Jinamampis, Jatun Asamblëachö niyämunqannömi, “kë follëtoqa rasumpam yanapakun Bibliata yachakï munaqkunaman kushishqa kutinapaq” (rikäri 5-7 päginakunachö recuadrokunata).
7. ¿Imanötaq kë follëtota utilizashwan estudio biblicota dirigirnin?
7 Estudio biblicota dirigirnin imanö utilizänapaq. Yanarëkaqchö tapukïta rurarninmi qallarishwan y nïkurnam qateqnin kaq pärrafota leirishwan. Tsëpitanam ashirishwan kinkisharëkaq leinapaq textonkunata, y tapukïkunata rurarmi nunakuna entiendiyänampaqnö shumaq yanapashwan. Y qateqnin kaq yachatsikïman manaraq pasarmi, yanarëkaq tapukïta yapë tapurishun entiendinqanta o mana entiendinqanta musyarinapaq. Visitar qallarninqa quizá más alliqa kanqa juk o ishkë tapukikunallapita yacharatsinqantsik. Tiempowannam más tapukïkunapita yacharatsishwan hasta juk yachatsikïta ushanqantsikyaq.
8. ¿Imatataq cuentaman churashwan juk textota leirnin y imanir?
8 Lei ninqan palabrapa lädonchö kinkisharëkaq textokunam yanarëkaq tapukïpa respuestanta claro contestan. Bibliapa textonkunata leikarninqa manam “apóstol Pablum kënö qellqarqan” o “profeta Jeremías ninqanta rikë” nishwantsu, porque tsënö nirqa nunakuna niyanqanllata leikäpunqantsiktam yachakïkaqkunata entiendiratsishwan. Tsëpa rantinqa, “Diospa Palabranmi nin” o “rikäri Biblia imata willakunqanta” nirishwanmi.
9. ¿Pärrafochö llapan textokunataku leirapushwan?
9 ¿Llapan yureq textokunataku leishwan o “lei” ninqan kaq textokunallataku? Tsëqa qampita y estudiantepitanam kanqa. Pärrafochö textokunaqa manam Bibliapita yachatsikunqanta rikätsikunanllapaqtsu, sinöqa precisaq yachatsikïkunam cada textochö këkan. Tsënö kaptimpis, estudiantepa tiempon mana kaptin, yachakïkanqan mana gustaqnö kaptin o leita mana allilla yachaptinqa, quizá más alliqa kanqa “lei” ninqan textokunallata leirapunqantsik.
10. ¿Imëtaq Yachatsikun libroman pasarishwan?
10 Imëtaq Yachatsikun libroman pasarishwan. Seguïdona estudiaptinqa allichi Yachatsikun libromanna pasaratsishwan o follëtowan estudiatsir usharatsishwan. Imë pasanampaq kaqtaqa kikin publicadornam rikänan. Y Yachatsikun libroman pasaratsirqa, ¿punta kaq capïtulompitatsuraq yachatsir qallashwan? Manam imanö ruranapaq kaqqa alli patsätsishqa kantsu, porque cada nunam jukläya kayan. Pero estudiëkaq nuna wakimpita Yachatsikun librowan masta yachakunqanqa allipaqmi kanqa.
11. ¿Imanirtaq kë mushoq follëtota alli provechanantsik?
11 Mana alli noticiakuna kanqan mundochöqa alläpam kushikuntsik llapampitapis más alli kaq noticiata willakurnin: Diospa Gobiernon mandakïkanqanta y ichikllachöna Patsa mushoqyänampaq kaqta (Mat. 24:14; 2 Ped. 3:13). Awmi, kë willakïta puritseqkunaqa alläpam kushikuyan kë texto ninqanta cumplirnin: “Imanö shumaqmi jirkakunachö alli willakïta apamoq nunapa chakinkunaqa, alli pasakïta willakoqpa, imapitapis más alli kaq willakïta apamoqpa, salvacionpaq willakoqpa, Sionta kënö neqpa: ‘¡Diosnikim rey këman chashqa!’” (Is. 52:7). Tsëqa, Diospa kaqchö yakunëkaqkunaman aparnin alli provechashun kë mushoq follëtota.
[5 kaq päginachö recuadru]
Diosman ni Bibliaman mana creeqkuna täräyanqan sitiochö utilizänapaq
● Wakin sitiokunachöqa Diospaq y Bibliapaq parlaqta wiyarllam nunakunaqa paqwë ni imata musyëta munayantsu. Tsë sitiokunachöqa, nunakunata más llakitsinqankunapaqmi parlapashwan, alli gobiernota necesitanqantsikta, familiapaq consëjokunata mëchö tarinapaq kaqta y shamoq tiempochö imakuna pasanampaq kaqta. Nunawan atska kutina parlashqa kar y Dios kawanqanta y Palabran markäkïpaq o yärakuypaq kanqanta yachatsishqa karqa, Alli willakïninkuna follëtotam rikäratsishwan.
[6 kaq päginachö recuadru]
Wayin wayin utilizänapaq
● “Mëtsikaqmi tapukuyan nunakunata Dios imata ruranampaq kaqta, tsëta fäcil-lla musyanan kanqantam rikäratsïnikita munä. Këta tapurishqëki, ¿sufrimientokunata Dios ushakäratsita munantsuraq? ¿Ima ninkitaq? [Shuyäri contestashunëkita.] Kë follëtom Bibliëkichö kë tapukïpa respuestanta taririnëkipaq yanaparishunki. [Follëtota entregarir juk kaq yachatsikïpa qallanan kaq pärrafota leirapï, nïkurna Jeremías 29:11 textota leiri.] Këchö ninqannöpis, ¿manaku shamoq tiempochö shumaq kawakunata Diosqa munan? [Shuyäri contestashunëkita.] Kë follëtoqa qampaqmi, yapë kutimuptïnam qateq kaq pärrafochö sufrimientokunata Dios imanö ushakätsinampaq kaqta yachakurishun.” Nunapa tiempon kaptinqa qateqnin kaq pärrafotam yachakuriyankiman y kiman textokunatapis leiriyankimanmi. Kutirnin qateqnin tapukïpita yachakuyänëkipaq niri.
● “Mëtsika kutim Diosman mañakuntsik, y problëmayoq karninnäqa masran ¿aw? [Shuyäri contestashunëkita.] ¿Llapan mañakïkunatatsuraq Dios wiyan o wakinllatatsuraq? ¿Ima ninkitaq? [Shuyäri contestashunëkita.] Bibliachö tsë tapukïpa respuestanta tarinapaq yachatsikoq follëtotam apëkämö. [Entregarirnin, 12 kaq yachatsikïpa qallanan kaq pärrafota estudiayë, ‘lei’ neq textokunatapis leiyë.] Alläpam kushikuntsik mañakïnintsikwan pë kaqman witinapaq Dios invitamanqantsikpita, pero shumaq mañakïnintsik kanampaqqa alliraqmi Diosta reqinantsik. [Ishkë kaq yachatsikïman ëwarir subtïtulonkunata rikäratsi.] Munaptikiqa kë follëtota dejapurishqëki, y kutimuptïnam kë tapukïkunata Biblia imanö contestanqanta yachakurishun.”
● “Shamoq tiempopaq nunakuna alläpa yarpachakuyanqanta musyarninmi watukakïkäyä. ¿Kë mana alli tiempokuna altsakanqatsuraq? ¿Ima ninkitaq? [Shuyäri contestashunëkita.] ¿Musyarqëkiku Bibliachö alli noticiakuna kanqanta? Rikë këchö kë tapukïkunata Biblia contestanqanta.” Follëtota entregarir, ushanan päginachö mëqan tapukïpita yachakïta munanqanta tapuri. Tsëpitana, tsë tapukïpa respuestan mëqan päginachö këkanqanman ëwarir rikäratsi y imanö estudiana kanqanta yacharatsi. Qateqnin kaq tapukïta yapë kutirnin estudiayayänëkipaq kaqta niri.
[7 kaq päginachö recuadru]
Estudio biblicota directo qallar utilizänapaq
● “Llapan nunakunatam raslla watukëkäyämö Bibliata estudiayänampaq juk mushoq follëtowan. Kë follëtom 15 yachatsikïninkunachö precisaq tapukïkunapa respuestanta Bibliachö tarinapaq yachatsikun. [Rikäratsi follëtopa qaranta y ushanan kaq päginata.] ¿Imëllapis Bibliata alli entiendita munarqunkiku? [Shuyäri contestashunëkita.] Yachatsikïninkuna fäcil-lla kanqanta rikäratsishqëki. [Kima kaq yachatsikïman ëwarir, kima kaq tapukïnimpa punta kaq pärrafompita yacharatsi. Nïkurna Apocalipsis 21:4, 5 textota leirapï. Wiyakoqnö kaptinqa qateqnin kaq pärrafota y “lei” neq textonkunata leirapï.] Kë follëtoqa qampaqmi. Juk yachatsikïllatapis yachakunëkipaqmi animariyaq. Gustashuptikiqa sïguinkimanmi. Yapë kutiramuptinam punta kaq yachatsikïninllapita yachakurishun.”
[7 kaq päginachö recuadru]
Yapë watukaq kutirnin utilizänapaq
● “Kushikömi yapë taririnqaqta. Pï më tapukuyanqanta Bibliawan contestaq follëtotam qampaq apamurqö. [Follëtota entregarirnin ushanan kaq päginaman ëwanampaq niri.] ¿Këpita mëqampitataq yachakïta munankiman? [Contestashunëkita shuyäri y akranqan kaq yachatsikïman ëwari.] Kë follëtowan rikäratsishqëki tsë tapukïta Biblia imanö contestanqanta.” Juk o ishkë pärrafokunata leirnin y “lei” neq textonkunata leirnin rikäratsi imanö estudiana kanqanta. Juk estudio biblicota qallëqa tsënö fäcil-llam. Follëtota dejapurirnin kutinëkipaq awniri. Tsë yachatsikïta usharirnin, yachakïta munanqan yachatsikïman ëwë o qallanan yachatsikïpita qallëkur yacharatsi.