Mana mantsakunëkipaq yanapakïkuna
1. ¿Imanirtaq wakinkunaqa estudio biblicota dirigiyänampaq awnikïta mantsayan?
1 ¿Mana alli yachatsikoq kanqëkita pensarku mantsanki estudio biblicota diriginëkipaq awnikïta? Diosta unë witsan sirweqkunapis wakinkunaqa pensayarqan Dios mandanqanta rurëta mana puëdeyänampaq kaqtam, tsëmi pasarqan Moisestawan Jeremïasta (Éx. 3:10, 11; 4:10; Jer. 1:4-6). Hora höraqa noqantsikpis pëkunanömi sientikuntsik. ¿Imaraq yanapamäshun mana mantsapakunantsikpaq?
2. ¿Imanirtaq wayin wayin yachatsikurllaqa purishwantsu?
2 Puntataqa këta yarpäshun, Jehoväqa manam mañamantsiktsu rurëta mana puëdinqantsiktaqa (Sal. 103:14). Awmi, Jesuspa qateqnin kayänampaq nunakunata ashita y yachatsita puëdinqantsiktaqa musyanmi, tsëmi mandamantsik (Mat. 28:19, 20). Manam yachaqkunallatatsu Jehoväqa mandashqa tsë precisaq rurëta rurayänampaq (1 Cor. 1:26, 27). Tsëmi, wayin wayin yachatsikurllaqa purishwantsu, sinoqa yanapakunantsikmi estudio biblicota dirigirnimpis.
3. ¿Imanötaq estudio biblicota diriginapaq Jehová yanapamantsik?
3 Jehovämi yachatsimantsik. Kikin Jehovämi yachatsimantsik Jesuspa qateqnin këman chäyänampaq nunakunata imanö yanapanantsikpaq (2 Cor. 3:5). Markanwanmi musyatsimarquntsik, kë mundochö yachaq nunakuna mana musyayanqan rasumpa kaq yachatsikïkunata (1 Cor. 2:7, 8). Bibliachömi rikantsik Alli Yachatsikoq Jesus imanö yachatsikunqanta. Jina congregacionkunachöpis yachakïkantsikllam imanö yachatsikunapaq kaqta. Jinamampis, Bibliapita rasumpa kaqta shumaq y entiendipaqnö yachatsikoq publicacionkunapis kapamantsikmi, jukqa Yachatsikun librom. Awmi, ¡estudio biblicota dirigiqa manam alläpa sasatsu o ajatsu!
4. ¿Imanirtaq markäkuntsik Jehová yanapamänantsikpaq kaqman?
4 Jehová yanapaptinmi Moiseswan Jeremïasqa rurayänampaq kaqta cumpliyarqan (Éx. 4:11, 12; Jer. 1:7, 8). Tsëmi Jehová yanapamänantsikpaq mañakushwan. Chipyëmi markäkuntsik pë yanapamänapaq kaqta, porque estudio biblicota dirigirninqa pë munanqantam rurëkantsik: pëpitam rasun kaqta yachatsikïkantsik (1 Juan 3:22). Tsëmi estudio biblicota dirigita procuranantsik. Tsëta rurarqa alläpam kushikushun y mëtsika bendicionkunatam chaskishun.