¿Alli yachatsikoq kämanku?
1. ¿Ima ruranantsiktaq kapamantsik Diospa Gobiernompita yachatsikoqkunapa?
1 Jehoväta servirnin llapan ruranqantsikpitapis, nunakunata estudio biblicota qoymi masqa kushitsimantsik. Rasumpa kaqta musyëta munar mallaqaq cuenta këkaqkunata tarinö, Diospita shumaq yachakïkäyanqanta rikënö, ciëlopa Patsapa Autoridadninman witiyänampaq yanapënö y kawëninchö hukläyana portakuyänampaq y pensayänampaq yanapënöqa manam ni imapis kantsu (Sant. 4:8). Diospa Gobiernompita llapan yachatsikoqkunaqa, tsëta rurayänampaqmi churakäyänan (Mat. 28:18, 20).
2. ¿Imanirtaq wakinkunaqa estudio bíblico qoyta mantsapakuyan, y imataq yanapanman tsënö mana kayänampaq?
2 Jehová yanapashunëkiman markäkï o yärakï: Unë witsankunachöpis Dios mandanqanta mana rurëta puedeqnö nunakuna kayarqanmi. Moises, Jeremias, Amos y wakimpis lluta nunakunallam kayarqan, tsënö karpis Jehoväman markäkur o yärakurmi mana mantsapakïpa llapan Jehová nenqanta rurayarqan (Éxo. 4:10-12; Jer. 1:6, 7; Amós 7:14, 15). Kikimpaq y yanaqinkunapaqmi apóstol Pablu kënö nerqan: “Rasumpa kaqtam parlapäyarqö”, këqa ‘manam ichicllapis mantsacuyarqatsu’ ninanmi. ¿Pipa yanapëninwantaq tsëta rurayarqan? “Diosnintsicmi yanapayämashqa” nerqanmi Pabluqa (1 Tes. 2:2). Noqantsiktapis Jehoväqa yanapamäshunmi, yachatsimäshunmi y kallpatapis qomäshunmi estudio biblicota qokunapaq (Isa. 41:10; 1 Cor. 1:26, 27; 1 Ped. 4:11).
3, 4. ¿Ima yanapakïkunataq kan Diospa Palabrampita alli yachatsikunapaq?
3 Yachatsiyäshuptiki wiyakï: Alli Yachatsikoq Teytantsik Jehová Diosqa, tukïläya reunionkunawanmi yachatsimantsik alli yachatsikoq tikranapaq (Isa. 54:13; 2 Tim. 3:16, 17). Jehoväpa yachatsikïninta chaskikï, y imëkanöpapis Bibliapita alli yachakïta tïrë, tsënöpa yachatsikïnikita más alliyätsinëkipaq. Yachatsikunapaq Diospa Escuëlan y Reinopita Willapäkïta Yachakunapaq reunionkuna Diospita yachatsikunapaq rurashqa kayaptimpis, congregacionchö llapan reunionkunam yanapamantsik Diospa Palabrampita alli yachatsikunapaq.
4 Alli yachakïta tïrë, sasa o aja yachatsikïkunatapis käyiyänampaqnölla o mäkuyänampänölla yachatsikunëkipaq. Tsëpaqqa libro Beneficiesepa 227 päginan nenqanta rurë: “Yachatsikonqëkipita alli musyayänanta munarqa, kikikiraqmi alli yachakunëki”. Hinamampis reunionkunachö comentanqantsikmi yanapamantsik shumaq yachatsikïkunata mana qonqanapaq. Mana mantsakïpa yachatsikunëkipaqqa, alliraqmi yachakunëki.
5. Hina, ¿pikunapitataq yachakushwan alli maestro kanapaq?
5 Unë tiempo cristianokunaqa, yachatsikïcho kikinkunapura rikänakurmi yachakuyaq (Luc. 10:1). Pëkuna rurayanqanta qatirnin, qampis yanaqë alli yachatsikoq publicadorkunata, precursorkunata, ancianokunata y superintendente viajantekunata estudio biblicota qoyaptin. Igualatsikïkunawan, publicacionkunachö dibüjokunawan y huk yanapakïkunawan imanö yachatsikuyanqanta alleq rikë. Alli yachatsikoq kanëkipaqqa, pëkunata niri yanapayäshunëkipaq (Pro. 1:5; 27:17). Tsë llapan yanapakïkunatam rikänëki Diospa yachatsikïnintanö (2 Cor. 3:5).
6. ¿Diospa Palabrampita alli yachatsikoq kanapaq imataraq wanantsik?
6 Jehoväman markäkï o yärakï, y yachatsikïninta ama ichikllapaqqa churëtsu. Jehoväman mañakurnin willë alli yachatsikoq këta munanqëkita (Sal. 25:4, 5). Diospa Palabrampita alli yachatsikoq kayänampaq wakinkunata yanaparqa, kushikïtam tarinki.