Profëtakunapita yachakushun: Jonas
1. ¿Imanö nunataq Jonasqa karqan?
1 ¿Imamantaq yarpätsimantsik Jonaspaq parlashqa? Wakinkunaqa niyan mantsakoq y mana llakipäkoq kanqantam. Tsënö niyaptimpis, pëqa humildi, mana mantsakoq y munëninta mana asheqmi karqan. ¿Imatataq pëpita yachakuntsik? (Sant. 5:10.)
2. ¿Imanötaq Jonaspa humildäninta qatishwan?
2 Humildi. Dios mandanqanta wiyarirmi, Jonasqa juk lädopa qeshpir ëwakurqan. Tsënöqa rurarqan Asiriukuna alläpa mana alli kayanqanta musyarchi. Jina Nïnivitaqa “yawarta ramaq marka” nirmi reqiyarqan (Nah. 3:1-3). Peru Jehoväqa Jonasta qayaparqanmi o piñaparqanmi y wiyakunqanta rikätsikunampaqmi yapë tiempun qorqan, y pëqa tsë tiemputa allim provecharqan (Prov. 24:32; Jon. 3:1-3). Mandayanqanta qallananchö mana rurëta munëkarpis, Jonasqa Diospa munënintam rurarqan (Mat. 21:28-31). Y noqantsikqa, ¿yachatsikur siguikashwanllatsuraq mana allita ruranqantsikpita piñapashqa këkarnimpis o yachatsikunantsik marka alläpa sasa o aja kaptimpis?
3. ¿Imanirtaq precisan yachatsikunantsikpaq mana mantsakoq y munënintsikta mana asheq kanantsik?
3 Mana mantsakoq y munëninta mana asheq. Mana wiyakur ëwakunqanchö marinërukunapa kawëninta peligruman churashqa kanqanta Jonas cuentata qokurirmi, yakuman jitarkuyänampaq mañakurqan (Jon. 1:3, 4, 12). Tsëpitanam, Nïnivichö Jehova mandanqanta rurëkarnin tsë markapa pläzanyaq ëwarqan, tsëchömi juk alli sitiuta ashirqan Jehoväpa juiciumpita parlanampaq. Juk mantsakoqqa manachi tsëtaqa ruranmantsu karqan (Jon. 3:3, 4). ¿Imatataq yachakuntsik? Mana wiyakïta munaq markakunachö yachatsikïkänapaq valorta qomänapaq Diosman mañakïtam (Hech. 4:29, 31). Jinamampis, rikätsikunantsikmi munënintsikkunata dejëkur llapam tiempuntsikwan y kapamanqantsikwan yachatsikïta puntaman churëkanqantsikta (Hech. 20:24).
4. ¿Imanirtaq yarpachakushwan profëtakuna allita rurayanqanman?
4 Diospa profëtankunapaq leyirninmi, pëkuna pasayanqanman noqantsikpis churakashwan. Tsëmi kënö tapukushwan: “¿Imataraq noqaqa ruräman karqan? ¿Imatataq yachatsiman pëkuna imanö kayanqan?” (Heb. 6:11, 12). Diosta mana dejëpa sirwishqa profëtankunapaqmi masta yachakushun shamoq kaq Diospita Yachatsikunapaq kaqchö.