jw.org pägina: wamrakunata yachatsinapaqmi yanapakun
1. ¿Imarëkurtaq jw.org päginachö “Niños” nishqan yachatsikï rurakämushqa?
1 Internetchö jw.org päginantsikqa, llapan edäyoqkunapaqmi rurakämushqa. Tantiyarinapaq, “Niños” neq yachatsikïqa (ëwë españolchö Enseñanzas bíblicas > Niños) yanapakun teytakuna wamrankunawan juknölla kawakuyänampaq y Jehoväwan amïgu kayänampaqmi (Deut. 6:6, 7). ¿Imanötaq kë yachatsikïta provechankiman wamrëkikunata yachatsinëkipaq?
2. ¿Imanötaq musyashwan cada wamrapaqnö yachatsikï kanqanta?
2 Juknöpapis rurë. Manam llapan wamrakunatsu igual kayan (1 Cor. 13:11). Tsëqa, ¿imanöraq musyashwan cada wamra wananqanmannö estudianapaq kaqta? Edäninkunata y imakuna gustanqanta musyarninmi. Jina cuentamanmi churanantsik imata y ëka tiempupa yachakïta puëdinqanta. “Mis primeras lecciones de la Biblia” nishqan jw.org päginachö yachatsikïqa, kima watayoq o mas llullulla wamrakunapaqnömi rurakämushqa. Y “De padres a hijos” neq Bibliapita willakïkunaqa, shumaq y entiendipaqnöllam. Mas yanapakïkunata qateqninchö rikärishun.
3. ¿Imanötaq “Ideas para la adoración en familia” neq yachatsikïchö willakïkunata y rurëkunata teytakuna alli provechayanman?
3 Ideas para la adoración en familia. Këchöqa teytakuna wamrankunata imanö yachatsiyänampaq musyatsikïkunam kan. “Descargar” neqchö lapirir, “Guía para los padres” nishqanta leyiri tsëchö willakïkunata y rurëkunata imanö utilisänëkipaq. Llullu wamrakunata yachatsinapaqqa “Actividad ilustrada” neq y pintanapaq dibüjukunata utilisëmi alli kanman. Y mas jatun wamrakunataqa “Proyecto de investigación” neq yachatsikïta rurayänampaqmi yanapashwan. “Guía para los padres” nishqanchöqa, tsëchö yureq willakïllapaqmi llapampis parlan. Tsënöpam, familiachöqa llapankuna parlakurita puëdiyanqa.
4. ¿Imakunatataq tarintsik “Hazte amigo de Jehová” nishqan yachatsikïchö?
4 Hazte amigo de Jehová. Këchöqa tarintsik “Videos”, “Canciones” y “Actividades” neqkunatam, tsëkunam yanapan teytakuna llullu wamrankunata Diospa palabranta yachatsiyänampaq (Deut. 31:12). Wamrakunapaq vidëukuna y “Actividades” nishqan pukllakunaqa wamrakunatam precisaqkunata yachatsin. Yachakunqantsikkunata yarpänapaq yanapakuptin y cäsi llapan wamrakunata cantë gustaptinmi, kë yachatsikïchöqa canticukuna y wamrakunapaq cancionkuna yarqamun.
5. ¿Imanirtaq teytakuna mañakuyanman Jehoväpa yanapakïninta?
5 Teytakuna, Jehoväqa munam llapampis allilla yarqupuyäshunëkitam y wamrëkikunata rasumpa kaqta yachatsiyänëkitam. Tsëmi, imëpis pëta mañakuyë yanapayäshunëkipaq (Juëc. 13:8). Tsënöpam, wamrëkikunata yanapayanki yachaq kayänampaq y Jesucristuman markäkur salvakuyänampaq (2 Tim. 3:15; Prov. 4:1-4).