Yachatsikur utilisäshun jw.org päginata: “Hazte amigo de Jehová”

Internetchö jw.org päginachö “Enseñanzas bíblicas” neqchömi wamrakunapaq “Hazte amigo de Jehová” neq yanapakï yurimun, tsëchöqa kan vidëukuna, cancionkuna y mas yachatsikïkunam. ¿Kë yanapakïta utilisarquntsiknaku Diospita yachatsikunqantsikchö? Mëqan estudiantintsikllapapis wamrankuna kaptinqa, ¿imanirtaq tsë yanapakïta rikäratsintsiktsu? Itsa tsë yanaparinqa Internet päginantsikchö këkaq yachatsikïkunata mas ashiriyänampaq.

Juk wawqim, 38 kaq Diospa Gobiernumpita willakïkuna tratäduta wamrayoq warmita qorirqan, warmiqa tsë höram leyir qallëkurqan. Wamrakunapis tsë tratäduchö imakuna kanqantam musyëta munayarqan. Tsëpitanam wawqiqa raslla willarirqan tsë tratädu imapita parlanqanta, y tratädupa ushananchömi rikäratsirqan Internetchö päginantsikta. Y maslla yachakïta munanqanta rikarmi, Calebpita parlaq vidëuta celularninchö rikäratsirqan.

Juk panim jw.org neq päginantsikpita wamrayoq trabajaq mayinta parlapärirqan. Tsë päginantsikchö familiakunapaq precisaq yanapakïkunata tarinampaq kaqtam nirirqan. Tsë warmiqa wamrankunawan juntum tsë päginaman yëkuyarqan. Tsëpitanam, panintsikta willarirqan “Hazte amigo de Jehová” neq yanapakïpita “Predica la palabra” nishqan cancionta wamrankuna wayinchö cantar puriyanqanta.

¿Manaku alläpa precisan jw.org päginantsikchö këkaq yanapakïkuna yarqamoqta altantulla këkänantsik, y vidëukunata, cancionkunata y mas yachatsikïkunata jorqanantsik? Tsëta rurarqa, listum këkäshun yachatsikoq yarqurnin kë precisaq yanapakïkunata utilisänapaq y tsënöpa Teytantsikta esclävunö sirwirnin sïguinapaq (Hëch. 20:19, NM).