Mas alli yachatsikoq kanapaq yanapakïkuna
1. ¿Imanötaq yanapamantsik “Jehoväpa testïgunwan parlëkan” neq yachatsikï?
1 Wakin killakunaqa yachatsikunapaq kaq Täpakoq revistachömi “Jehoväpa testïgunwan parlëkan” neq yachatsikï yarqamun, kë yachatsikïqa yanapamantsik munayänampaqnö Bibliata yachatsikunapaq y wakin yachatsikïkunata shumaq y yachëllapa imanö yachatsikunapaqmi (1 Pëd. 3:15). Rikärishun kë yachatsikïkunata imanö mas alleq provechanapaq.
2. ¿Imanötaq tsë yarqamoq yachatsikïkuna yanapamashwan yachatsikunqantsikchö?
2 Yachatsikunapaqmi yanapakun. Allichi kanman kënö yachatsikïyoq yarqamoq Täpakoq revistakunata guardakunqantsikqa. Tsënöpam, yachatsikunqantsikchö, Bibliapita yachakïkaq o yachakïta munaq imatapis nimashqa o tapumashqaqa, tsë yachatsikïyoq Täpakoqta itsa qorishwan o munaptinqa juntu yachakurishwan. Peru mana kapamashqaqa jw.org. nishqan Internetchö päginapitam jorqarishwan.
3. ¿Imanö yachatsikunqantsiktaq alläpa alli kashqa?
3 ¿Imanötaq tsë yarqamoq yachatsikïkunata utilisashwan? Wakin publicadorkuna Testïgu parlanqantam sinchipa leyiyan y juknin kaqpata leyinampaqnam wiyaqninta niriyan. Creenqantsikkunapita kënö yachëllapa yachatsikunqantsikqa alläpa allim kashqa, porqui wiyamaqnintsikkunaqa mananam alläpa mantsapakuyannatsu (Deut. 32:2).
4. ¿Imatataq yachakuntsik kënö yachatsikïkunapita?
4 Yachakunapaq y yachatsikunapaqmi yanapakun. Kë yachatsikïkunata leyirninqa, tsëchö yarqamoq textukunata leyishun, ejemplukunata, imanö yachatsikunqanta y kuyëllapa imanö parlanqanta alli rikäshun. Nïkurqa, tsënölla yachatsikïta procurashun (Prov. 1:5; 9:9). Juk panim kënö nirqan: “Kë yachatsikïkunata leyirninqa imëpis ima ninampaq kaqta listu këkaq ‘yachaq’ precursorta rikaqnömi sientikö”.
5. ¿Imataraq rurashwan Bibliata yachakïkaqkunata yachatsikoq yarquyänampaq yachatsirnin?
5 Jina Bibliapita yachakïkaqkuna imanö yachatsikuyänampaq yachatsinapaqpis yanapamantsikmi. Itsa pëkunawan leyirishwan, y publicador ninqanta leyiramunampaq nirishwan. Kë ejemplukunawanmi yachakuyanqa creenciankunata respëtuwan y yachëllapa imanö yachatsikuyänampaq (Col. 4:6). Awmi, kë yachatsikïkunaqa mas alli yachatsikunapaqmi yanapamantsik, tsëqa Jehoväpa juk yanapakïninllam (2 Tim. 4:5).