Shumaq utilisäshun pasaq killa kaq revistakunata
Churarätsikushqa o jitarlla ushashqaqa, manam revistakuna yanapakunqatsu, tsëmi nunakunapa (runakunapa) makinchö jaqita procuranantsik. Rasumpa kaqta musyayänampaq y Jehoväpa jutinta parlayänampaqqa juk revistallam yanaparinman (Rom. 10:13, 14, NM). Tsëmi kë qateqninchö yanapakïkuna kan pasaq killakunachö yarqamushqa revistakunata shumaq utilisänapaq.
Höra höralla yachatsikunqantsik territoriukunachöqa, wayinkunachö mana tarirnimpis revistataqa jaqirita puëdintsikmi, peru pureqkuna mana rikäyänanllamanmi churëkushwan.
Paradërukunachö y agenciakunachöqa, shuyarëkaqkunatam kënö tapurishwan: “¿Leyita gustankiku?”. Nïkurnam revistakunata rikäratsishwan akrakunampaq.
Congregacionnintsikpa territoriunchö këkaq clïnicakunachö, postakunachö y edäyashqakunata wätayänan wayikunachöqa shuyaräkuyänan sälachömi juk ishkë revistakunata jaqirishwan. Peru trabajaqkunata rikarninqa allichi permïsuta mañakurishwan jaqirinapaq. Revistakuna churarëkaqta rikarninqa mananam jaqishwannatsu.
Yachakïta munaqkunaman kutirninqa, pensanantsik revistapa mëqan yachatsikïninta leyirita munanampaq kaqmanmi. Itsa wamran kan, viajëta o murupakïta gustan. Pasaq killa revistakunatam rikapärishwan mëqan yachatsikïpis pëpaqnö kanqanta musyanapaq y mana qonqëllatam apapushwan.
Atska killakunapa mana tarinqantsik nunakunawan parlarninqa, mana jaqipunqantsik revistakunatam munaratsishwan.