Profëtakunapita yachakushun: Nahum
1. ¿Imatataq yachakuntsik Nahum librupita?
1 Unë Nïnivi ushakashqa markam rikätsikun Nahum willakunqannö chikeqninkunata Jehovä ushakätsinqanta. Manam ni mas puëdeq chikeqninkunapis vencita puëdiyantsu (Nah. 1:2, 6). Nahum willakunqan profecïachömi tarintsik yachatsikïkunata, tsëkunatam utilisëta puëdintsik yachatsikunqantsikchö.
2. ¿Imanirtaq nintsik yachatsikïnintsik allipaq kanqanta?
2 Shoqakoq y shuyäkïta qokoq willakïta apashun. Nahum libruqa unë Asiria nacionpa Nïnivi markan ushakänampaq kaqtam willakurqan (Nah. 1:1; 3:7). Peru tsë willakïqa Jehoväpa markampaqqa alli willakïmi karqan. Nahum jutiqa “Shoqakoq” ninanmi. Nahumqa judïu mayinkunatam nirqan chikeqninkuna ichikllachöna ushakäyänampaq kaqta. Jina nirqanmi Jehovä ‘sufrimientukunachö tsapäkoq’ kanqantapis (Nah. 1:7). Noqantsikpis yachatsikoq ëwarqa alli willakïkunatam apantsik, y nunakunatam animantsik Jehovächö tsapäkïta ashiyänampaq (Nah. 1:15).
3. Nahumnö kaqpis, ¿imanötaq utilisashwan ejemplukunata y igualatsikïkunata yachatsikunqantsikchö?
3 Utilisäshun ejemplukunata y igualatsikïkunata. Tebas (o No-amon) markata asiriukuna ushakätsiyanqanta utilisarnin, Nïnivi marka imanö ushakänampaq kaqta willakunampaqmi Jehovä Nahumta yanaparqan (Nah. 3:8-10). Satanaspa mana alli mundun ushakänampaq kaqpita nunakunata yachatsirninqa, Bibliachö këkaq profecïakunatam utilisänantsik Jehovä llapan ninqankuna cumplikanqanta rikätsikunapaq. Tantiyarinapaq, J.m.sh. 632 watam babiloniukunapa y mëdukunapa tröpankuna Nïnivi markata ushakätsiyarqan. Alläpa tamyaptinmi Tigris mayu alläpa mirar juk lädupa ramakärir, tsë markapa jatusaq perqankunata juchuratsirqan. Tsënömi, Nïnivi markaqa Jehovä willatsikunqannö ushakarqan (Nah. 1:8; 2:6).
4. ¿Imanötaq cläru y entiendipaqnölla Diospita yachatsikur parlashwan?
4 Cläru y fäcil entiendipaqnölla parlashun. Nahum qellqanqan profecïaqa precïsu, cläru y kushikïpaqmi karqan (Nah. 1:14; 3:1). Tsënö kaqllam, parlënintsikpis entiendipaqnölla kanman (1 Cor. 14:9). Pitapis tsëllaraq visitarqa, imanir visitëkanqantsiktam cläru willarishwan. Y Bibliapita yachakïkaqkunata yanapashun Jehoväman y Palabranman markäkuyänampaq y yachakuyanqan imanö yanapanqanta entiendiyänampaq (Rom. 10:14).
5. ¿Imapita següru kanapaqtaq yanapamantsik Nahum qellqanqan profecïa?
5 Jehovä parlanqankuna imëpis cumplikanqanmanmi Nahumqa confiakurqan, tsëtam rikantsik jutinta apaq libru qellqanqanchö. Satanaspa mundumpa ushakënin chämunqanmannömi, “manam yapëqa sufrimientu kanqanatsu” nir Jehovä änimanqantsikqa shoqamantsik (Nah. 1:9).