¿Alliku estudiu biblicuta dirigintsik?
1. ¿Ima precisaq rurëyoqtaq kantsik llapan publicadorkuna estudiu biblicuta dirigirnin?
1 Manam pipis Jehoväpa sirweqninman chëta puëdintsu pë ‘shonquncho mana cäyitsiptenqa’ (Juan 6:44). Tsënö kaptimpis, noqantsikmi nunakunata yanapanantsik ciëluchö këkaq Teytantsikman witiyänampaq (Sant. 4:8). Tsëpaqqa puntallapitanam alleq preparakunantsik. Bibliata alleq entiendiyänampaq y Diospa kaqchö poquyänampaqqa, manam pärrafukunata leyiyänanllapaqtsu ni tsëchö qellqarëkanqanta contestayänanllapaqtsu nishwan.
2. ¿Imatataq ruranantsik estudiu biblicuta alli diriginapaq?
2 Estudiu biblicuta alli diriginapaqqa, cada publicadormi yanapanan estudiantin këkunata ruranampaq: 1) Biblia yachatsikunqantam entiendinan, 2) yachakunqanmanmi creinan y 3) yachakunqanmannömi kawanan (Juan 3:16; 17:3; Sant. 2:26). Tsëqa manam rastsu pasakunqa, itsa atska killakunaraq pasanqa, peru imanö yanapanqantsikmi precisanqa estudiantintsik Jehoväwan amïgu tikranampaq y sirweqnin tikranampaqpis.
3. Estudiu biblicuta alli diriginapaqqa, ¿imanötaq tapukïkunata ruranantsik y imanir?
3 ¿Imataraq pensan estudianti? Biblia imata yachatsikunqanta entiendinqanta y tsëman creinqanta cuentata qokunapaqqa, noqantsiklla parlanantsikpa rantinmi, parlakaramunampaq nirishwan (Sant. 1:19). ¿Yachakïkanqantsikpita Biblia ima ninqanta alleqku entiendin? ¿Manatsuraq shonqumpita patsë parlakaramunman? ¿Ima nintaq yachakïkanqampita? ¿Bibliapita yachakïkanqan entiendipaqnölla y fäcil ruranan kanqantaku pensan? (1 Tes. 2:13.) ¿Jukläyana kawanampaq kaqta entiendinku? (Col. 3:10.) Estudianti ima pensanqanta musyanapaqqa, alli pensëkurmi tapukïkunata ruranantsik y shumaqmi wiyanantsik (Mat. 16:13-16).
4. ¿Imatataq ruranantsik estudiantintsik entiendita mana puëdiptin o Bibliapita wakin yachatsikïninmannö kawanan sasa kaptinqa?
4 Nunakuna imata pensayanqanta y costumbrinkunataqa shonqunkunachömi katsiyan, tsëmi cambiayänampaqqa itsa tiemputaraq wanayanqa (2 Cor. 10:5). ¿Imataraq rurashun estudiantintsik yachakunqanmannö cambiukunata raslla mana ruraptin? Diospa Palabran y santu espïritun shonqunman charnin yanapanantam pacienciawan shuyaränantsik (1 Cor. 3:6, 7; Heb. 4:12). Biblia yachatsikunqanta entiendita mana puëdiptin o Bibliapita wakin yachatsikïninmannö kawanan sasa (aja) kaptinqa, itsa mas alli kanqa juk yachatsikïman pasanantsik. Pacienciawan y kuyakïwan Bibliapita yachatsishqaqa, itsa tiempuwanqa cambiukunata rurarinqa.