Jehoväta alabanapaq mushoq canticukuna
1 Tsëllaraq rurakashqa llapan watakuna Watch Tower Bible and Tract Society of Pennsylvania reunionqa, 2014 wata 4 de octubri junaqmi rurakarqan, tsëchömi willakuyarqan canticuntsikchö cambiukuna kanampaq kaqta. Tsë noticiaqa ¡alläpa kushikïpaqchi karqan! Jinamampis tsëchö këkaqkunatam yarpätsiyarqan canticukunaqa Diosta adoranqantsikchö alläpa precisanqanta (Sal. 96:2).
2 Peru ¿imanirtaq precisan canticuntsikchö cambiukuna rurakänan? Punta kaqchöqa, kananqa masnam entiendintsik Bibliapa wakin textunkunata, tsëmi canticuntsikpa letrankunaqa itsa cambianqa (Prov. 4:18). Ishkë kaqchöqa, mëtsika idiömachömi Traducción del Nuevo Mundo nishqan Bibliataqa revisëkäyan, tsëmi canticuntsikchöqa wakin palabrakunata cambiayänan precisanqa. Jinamampis, itsa atska cambiukuna kanqa, tsëmi mushoq canticukunata tsëllaman yapayämunqa.
3 ¿Canticuta yapë imprimiyämunantatsuraq shuyaräshun mushoq canticukunata cantar qallanapaq? Manam, shamoq killakunachömi jw.org päginachö këkanqana. Manaraq tsë canticukunata Internetman churayämuptinmi, Diospa Gobiernumpita Yachatsikunapaq reunion ushariptin cantashun. Kë semänapaq progrämachömi canticupa tïtulun yarqamunqa “mushoq canticu” neqyoq.
4 ¿Imanötaq yachakushwan mushoq canticukunata? Mushoq canticukunata yachakunanqa manam fäciltsu. Imanö kaptimpis noqantsikqa salmista kënö ninqantam qatinantsik: “Cantarmi imëkamayaqpis alabashqëki manam upällaqa kakushaqtsu” (Sal. 30:12). Qateqnin kaq consëjukunam yanapamäshun mushoq canticukunata cantar yachakunapaq y shonqupita patsë cantanapaq.
Kutin kutin wiyashun tsë grabashqa müsicakunata, tsëtaqa tarishun jw.org päginachömi. Tsëmi yanapamäshun mas ras yachakunapaq.
Canticupa letran ima ninqanta entiendita y yarpëtam procuranantsik.
Canticukunata kutin kutin cantashun alli yarqapamanqantsikyaq.
Familiachö Diosta Adorana Hörachö tsë canticukunata cantar yachakushun, tsënöpa llapan familiakuna alli cantayänampaq.
5 Shamoq killakuna Diospa Gobiernumpita Yachatsikunapaq reunion ushariptin mushoq canticuta churayaptinqa, puntataqa grabacionllataran congregacion wiyanqa. Tsëpitanam imëpis rurayanqannö cantayanqa.
6 Rasumpa kaqchöqa, reunionkunachö cantëqa juk alläpa shumaq qarëmi, tsënöpam llapantsik juntu cantarnin Jehoväta alabantsik. Tsëmi, reunionkunachö cantanqantsik höraqa juk cösaskunata rurar këkashwantsu.
7 Juk mas rurëkunapis kanmi canticuta precisaqpaq churanqantsikta rikätsikunapaq. Asamblëakunachöqa manaraq qallaptinmi qallanan müsicata wiyantsik. Jehoväta adoranapaqmi më tsëpita cristiänu mayintsikkuna imëka sacrificiuta rurëkur tsë müsicakunata grabayänampaq ëwayan. Patterson (Nueva York) markamanmi watachö ishkë kuti ëwayan y kikinkunam pasäjinkunatapis pagakuyan. Tsëmi, reunionta qallaq wawqi jamakunantsikpaq y tsë müsicata wiyanantsikpaq nimashqaqa, raslla cäsukushwan. Tsëmi yanapamäshun tsëchö yachatsikayämunqanta alli wiyakunapaq y shonquntsikta alistanapaq (Esd. 7:10).
8 Kanan junaq reunionqa usharinqa juk mushoq canticuwanmi tïtulunqa, “¡Que venga el Reino establecido por Dios!” ninmi. Kë canticutaqa llapan watakuna rurayanqan reunionchömi jorqayämurqan, këtaqa rurayämushqan Diospa Gobiernun patsakanqan pachak watata cumplinampaq kaqta yarpänapaqmi.
9 Mushoq canticukunapis Jehovä “allikunata” qomanqantsikmi kayan (Mat. 12:35a, NM). Yachakïta churapakäshun shonqupita patsë cantanapaq. Tsënöpam, llapan shonquntsikwan Diosta alabashun y adorashun (Sal. 147:1).