Cäsukoqkunataqa Dios yanapanmi

Diospa unë willakoqnin Moisesqa musyarqanmi Dios ninqankunata cäsukushqaqa pë yanapanampaq kaqta (Deuteronomiu 10:13; 11:27). Manam castigamänantsikta mantsartsu Diostaqa cäsukuntsik, sinöqa kuyakoq kaptinmi, tsëmi ichikllapis llakitsita munantsiktsu. Y Palabranchömi nimantsik, ‘Diospa mandakïninkunata wiyakïqa mana alläpa sasa o aja’ kanqanta (1 Juan 5:3).

Diosta cäsukunqantsikqa këkunachömi yanapamantsik:

1. MAS YACHAQ KANAPAQ

Isaïas 48:17 nin, ‘Noqam Teyta Diosnikikuna kä. Noqam alli kaqkunata yachatsir munashqänö kawayänëkipaq alli nänipa pushayaq’.

Teyta Jehovä kamamashqantsik karmi musyan alli kawakunapaq imata ruranantsikpaq kaqta y Palabran Bibliachömi mëtsika consëjukunata churatsimushqa. Tsë consëjukuna yanapamänapaqqa Bibliatam leyinantsik y cäsukunantsik.

2. KUSHISHQA KAWAKUNAPAQ

Lücas 11:28 nin: “¡Kushishqaqa kayan Diospa palabranta wiyaqkuna y cäsukoqkunam!”.

Kanan witsan Diospa Palabranta cäsukoq mëtsikaq nunakunam kushishqa kawakuyan. Espäñapita mal geniuyoq nunam, familianta y nuna mayinkunata imëpis mana alli trataq, ¿imaraq yanaparqan cambianampaq? Diospa Palabranshi yanapanaq. Juk junaqshi Diospa unë sirweqnin Josëpaq Bibliachö leyinaq, pëtash wawqinkuna chikir, juk nacionchö sirwipakoq kanampaq rantikuyarqan y tsë nacionchöshi mana kaqpita tumpar prësutsiyarqan. Tsë mana allikunapa pasëkarpis, manash cölerakurqantsu, sinöqa kuyakoq y humildish karqan (Genesis 37-45). Josë tsënö nuna kanqanshi pëtapis yanapanaq kuyakoq, mana ras cölerakoq y humildi nuna kanampaq, tsëshi kananqa familiawan mas alli y kushishqa kawakun.

Diospa Palabranchömi nuna mayintsikwan alli kawakunapaq mas consëjukunata tarintsik. Tsëta maslla yachakurishun.