Diospita kushishqa yachatsikï

¿Qelanankiku Diospita yachatsikoq ëwëta? Mëtsikaqmi tsënö qelanäyan. Itsapis piñashqa nunakunawan parlar, mana allipa parlapämashqa o mana reqishqantsikkunawan parlëta mana puëdir. Tsëkuna pasakunqanmi kushishqa yachatsikunantsikta michämashwan. Peru noqantsikqa kushishqa Diostam adorantsik, tsëmi pëqa kushishqa sirwinantsikta munan (Sl 100:2; 1Ti 1:11). Tsëqa, ¿imanirtaq Diospita yachatsikoq ëwarnin kushishqa sientikushwan?

Porqui alli kawakï kanampaq kaqtam willakuntsik. Tiempu pasanqanmannömi, nunakunaqa kawakï alliyänampaq kaqta mana musyar mas llakishqa këkäyan. Tsëmi, noqantsikqa ‘allipaq kaqta willakur’ shonqunkunata kushitsita puëdintsik (Isa 52:7). Diospita yachatsikurqa, noqantsikpis kushishqam sientikushun. Tsëmi yachatsikoq manaraq yarqurninqa, shamoq tiempuchö Diosnintsik bendicionkunata apamunampaq kaqman juk rätullapis yarpachakushwan.

Jinamampis Diospita yachatsikunqantsikqa, nunakunatam yanapan kawëninkunata cambiayänampaq y Diosman witiyänampaq. Tsërëkurmi mana alli rurëninkunata jaqita y imëyaqpis kawakïta puëdiyanqa (Isa 48:17, 18; Ro 1:16). Nunakunata salvaq kanqantsikman pensarishun, salvakïta munaq nunakunatam ashita procuranantsik, y manam wakinkuna salvakïta mana munayaptinllatsu tsë rurëta jaqirinantsik (Mt 10:11-14).

Y mas kushishqaqa kantsik, porqui yachatsikunqantsikwanmi Jehoväta alabëkantsik. Y tsëtam pëqa alläpa valoran (Isa 43:10; Heb 6:10). Jinamampis, tsëta ruranapaqmi santu espïritunta qomantsik. Tsëmi kushishqa yachatsikunantsikpaq Jehoväta santu espïritunta mañakunantsik (Gäl 5:22). Jehovä yanapamashqam mana mantsakushpa yachatsikïta puëdishun (Hch 4:31). Y nunakuna imata nimashqapis yachatsikunapaq Diosnintsik nimanqantsiktam kushishqa cumplishun (Eze 3:3).

¿IMATAQ YANAPAMARQAN JEHOVÄTA MAS KUSHISHQA SIRWINÄPAQ? NEQ VIDEUTA RIKÄRIR, KË TAPUKÏKUNATA CONTESTARIYË:

• Atska hörakunapa yachatsikurpis, ¿imanirtaq Diospita mas alleq yachakunantsik precisan?

• ¿Imatataq Marïapita yachakuntsik?

• ¿Imë hörakunataq tiempïkita rakinki Bibliata leyinqëkiman yarpachakunëkipaq?

• ¿Imataq mas gustashunki Diospita yachatsikunqëki höra?