Jukkunapita yachakunqämi yanapamashqa

Noqaqa Canadä nacionchö këkaq Quebec markachömi yurikurqä. Tsë markachöqa francestam parlayan. Papänï Louis y mamänï Zeliaqa shumaq kuyamarmi qeshpitsiyämarqan. Papänïqa mana alläpa parlakoq karpis leyitam cösa gustaq. Y noqataqa qellqëmi gustamaq, tsëmi periodista kanäpaq estudiëta munarqä.

12 watayoq këkaptïmi, Rodolphe Soucy jutiyoq nuna y juk amïgun wayïkunaman chäyämurqan. Tsë nunaqa papänïpa trabajaq mayinmi karqan, y pëwan amïgunqa Jehoväpa testïgunmi kayänaq. Jehoväpa testïgunkunapaqqa manam wiyashqallatsu karqä, y imanö kayanqantapis manam musyëta munarqällatsu. Tsënö kaptimpis, yachanëpaq kayanqan y imata tapuyaptïpis Bibliawan shumaq yachatsiyämanqanmi gustamarqan. Y papänïtawan mamänïtapis gustarqanmi, tsëmi Bibliapita maslla yachatsiyämänampaq äniyarqä.

Tsë witsampaqqa catölicukunapa escuëlanchömi estudiëkarqä, y profesornïkunaqa sacerdötikunam kayaq. Höra höraqa Bibliapita yachakunqäkunatam estudiaq mayïkunata yachatseq kä, y tsëtam profesornïkuna musyëkushqa kayänaq. Juk kutim juk profesornïwan tsëpaq parlayarqä, peru mana allita nikanqäta Bibliawan rikätsimänampa rantinmi, llapankuna jananchö “¡rebeldim kanki!” nimarqan. Alli unëran parlar tsaränakuyarqä, y tsëchömi cuentata qokurqä pëkuna yachatsikuyanqanqa Bibliachö ninqannötsu kanqanta. Tsëmi papänïwan y mamänïwan parlarir juk escuëlamanna estudiaq ëwakurqä.

KUSHISHQANAM YACHATSIKOQ KÄ

Bibliapitam yachakur sïguirqä, peru yachatsikur purita mantsarmi shumaqllaqa Jehoväta sirwirqätsu. Y manam tsëllatsu, tsë tiempuqa catölicukunam Bibliapita yachatsikuyänäta michäkuyaq. Jina tsë witsanqa Maurice Duplessismi Quebec-chö respetashqa autoridä karqan, y pëqa catölicukunawan compinchanakushqam karqan. Pë yanapaptinmi catölicukunaqa Testïgukunata maqayaq y imëkata rurayaq. Tsëmi yachatsikur puriyänäpaqqa alli valientiraq kayänä karqan.

Yachatsikur purita manana mantsanäpaqqa, Galaad Escuëlachö kashqa wawqi John Raem yanapamarqan. Mëtsika yacharpis, pëqa humildi y yachanëpaqmi karqan. Juk ishkë kutillam consejamarqan; masqa imanö nuna kanqanta rikarmi pëpita yachakurqä. Francesta mana alläpa parlaptinmi, yachatsikur puriptin yanaqaq kä. Pëmi yanapamarqan 1951 wata 26 de mayu killachö bautizakunäpaq, y tsëpaqqa, chunka watanam pasashqa karqan Testïgukunata reqinqäpita.

Quebec marka congregacionnïkunachöqa precursorkunam masqa kayaq, tsëmi noqapis precursor këta munarqä. Tsë witsanqa, ni librukuna, ni follëtukuna ni tratädukuna mana kaptinmi Bibliallawan yachatsikuyaq kayä. Tsëmi nunakunata rasumpa kaqta yachatsinäpaq Bibliapita alli yachakuyta procurarqä. Tsënö kaptimpis, catölicuchö mandakoqkunam patsätsishqa kayarqan pëkuna permitiyaptinraq pipis Bibliata leyinampaq. Tsëmi nunakunaqa Bibliapita yachakuyta munayaqllatsu.

1952 watachömi, Quebec markapita pani Simöne Patrywan casakuyarqä, y Montreal markatam täkoq ëwakuyarqä. Tsëpita cäsi juk watallatanam warmi wamräkuna Lise yurikurqan. Noqaqa manaraq casakurmi precursor këta dejashqa karqä, peru tsënö karpis, warmïwan noqaqa congregacionchö maslla yanapakuyänäpaqmi ichik tariyanqällawan kawakuyta procurayarqä.

Tsëpita chunka wata pasariptinmi yapë precursor këta yarparqä. 1962 watachömi, creikoqkunata rikaqpura Canadä Betelman juk killa yachakoq ëwayarqä. Tsëchömi Camille Ouellette jutiyoq wawqiwan juntu posadakuyarqä. Warmiyoq y atska wamrayoq këkarpis yachatsikuyta allipa gustanqanta rikarmi noqapis yarpachakurirqä. Tsë witsanqa, wamrayoq wawqikuna y panikunaqa juk ishkëllam precursor kayaq, peru wawqi Camilleqa precursor këtam munarqan. Pëmi yanapamarqan precursor këta procuranäpaq. Tsëpita juk ishkë killakunallatam cuentata qokurirqä precursor këta puëdinqäta. Wakinkunaqa alliraq pensanäpaqmi niyämarqan. Tsënö kaptimpis, Jehovä yanapamänampaq kaqta alli musyarmi yapë precursor tikrarirqä.

PRECURSOR ESPECIAL KAYÄNÄPAQMI QUEBEC MARKAMAN YAPË MANDAYÄMARQAN

1964 watachömi, yurikuyanqä Quebec markachö precursor especial kayänäpaq niyämarqan. Tsëchömi atska wata kayarqä. Tsë witsampaqqa, manam alläpanatsu yachatsikuyänäta michäkuyarqan.

Tsënö kaptimpis, juk säbadu tardim Quebec markapa amänunllachö këkaq Sainte-Marie sitiuchö yachatsikur këkaptï, juk policïa comisariaman apamarqan, y tsëchömi carcelman wichqarkayämarqan. Tsëpita juk ishkë junaqllatam, Baillargeon jutiyoq mantsanëpaq juezman apayämarqan. Pëqa, “¿pitaq abogäduyki kanqa?” nirmi tapumarqan. Tsënam noqaqa “Glen Howmia kanqa” nirqä. Y tsënö niptïmi mantsakarnin “¡amari pëtaqa!” nimarqan. Wawqi Glen Howqa atska kutim wawqi panikunata juiciuchö ganatsishqa karqan. Tsëpita juk ishkë junaqllatanam niyämarqan librina kanqäta.

Quebec markachö yachatsikuyänäta michäkuyaptinmi, juntakäyänäpaq sitiuta tariyaqllatsu kayä. Tsëmi cärruta guardayänan sitiullachö juntakäyaq kayä. Y alläpa alalaptinmi, manaraq reunion qallaptin jatun chiwchita tsaritsiyaq kayä, y tsëwan qoñükoqnömi alli unë parlakoq kayä.

1960 watakuna witsanqa, juk ishkëllam Quebec markachö, Côte-Nord kinrëchö y Gaspë niyanqan sitiuchö congregacionkuna karqan, peru kananqa mëtsika wawqi panikunam tsë markakunachö kayan, y shumaq wayikunachönam juntakäyan. ¡Tsëta rikëqa alläpa kushikuypaqmi!

CONGREGACIONKUNATA WATUKAR YANAPAKUNÄPAQMI CHURAYÄMARQAN

1970 watachömi congregacionkunata watukar purinäpaq niyämarqan, y 1973 watachönam, congregacionkunata watukaqkunata visitar purinäpaq niyämarqan. Tsë witsanqa congregacionkunata watukaqkunapitam allipa yachakurqä, y wakinqa kayarqan wawqi Laurier Saumurb y wawqi David Splanemi.c Cada asamblëa ushariptinmi wawqi Davidwanqa mas alli yachatsikuyänäpaq yanapanakuyaq kayä. Juk kutichömi wawqi David kënö nimarqan: “Leonce, shumaqmi ushanan kaq discursuta ruramurqunki. Imallam sïqa, tsë llapan nimunqëkiwanqa kima (kimsa) discursutachi noqaqa ruramüman karqan”. Y rasun kaqllatam nimarqan, noqa discursarqa jukta juktaran ushëpa ushar parlëkoq kä, tsëmi mas wallkallata parlar shumaq yachatsikunäpaq kallpachakurqä.

Noqapa cargüqa karqan congregacionkunata watukaqkunata visitarnin imallachöpis yanapëmi. Peru Quebec markachö wawqi panikunawanqa allipam reqinakuyaq kayä, tsëmi tsë markachö congregacionkunata watukaqkunata visitaq ëwaptïqa, wawqi panikuna noqawan yachatsikoq yarqïta munayaq. Tsëmi congregacionkunata watukaq wawqita yanapanäpaqqa tiempü tinkoqnatsu. Juk kutim, visitanqä wawqi shumaqlla kënö nimarqan: “Wawqi panikunawan yachatsikur purinqëkiqa allim, peru ama qonqëkullëtsu kë semänaqa noqata masqa yanapamänëkipaq kaqta. Noqalläpis yanaparamänëkitam munä”. Tsënö shumaq nimanqanmi yanapamarqan cargüta mas alli cumplinäpaq.

1976 watachömi juk desgracia pasëkamarqan. Warmillä Simonem alläpa qeshyakurkur wanukuykurqan. Pëqa llapan shonquwanmi Jehoväta kuyarqan y imëkachömi yanapamarqan, tsëmi alläpa llakirqä. Peru yachatsikur ocupädu kanqämi yanapamarqan. Y Jehovätam agradecikü tsë desgraciapa pasaptï tukuynöpa shoqamar yanapamanqampita. Tiempuwannam, pani Carolyn Elliottwan casakuyarqä. Pëqa inglestam parlëta yachaq, y yachatsikur yanapakoqmi Quebec markaman shamushqa karqan. Pëtaqa pï mëmi yachanaq, y mantsallïshukunata y yanasa ashita mana yachaqkunatam shumaq yanapëta yachaq, tsëmi congregacionkunata watukar purinqächö shumaq yanapamashqa.

JUK SHUMAQ WATA

1978 watachömi, Quebec markachö tsëllaraq patsëkätsiyanqan atska junaq reunionchö precursorkunata yachatsinäpaq niyämarqan. Noqapaq y tsë reunionman shamoq precursorkunapaqqa llapan yachakuyänäpaq kaqmi mushoq karqan, tsëmi yachatsikuyta mantsarqä. Peru tsë capacitacionchöqa alli unëna precursor këkaqkunam kayarqan, tsëmi yachatsikoq karpis, pëkunapita alli yachakurqä.

Jina tsë watallachömi, Montreal estadiuchö atska nacionkunapita wawqi panikunapaq juk asamblëa rurakarqan. Tsë asamblëachöqa 80 milpitapis masmi juntakäyarqä, y tsënöqa manam ni imëpis Quebec markachö juntakashqatsu kayarqä. Noqataqa niyämarqan periodistakunata atiendinäpaqmi. Atska periodistakunawanmi parlayarqä, y pëkunaqa allitam Jehoväpa testïgukunapaq parlayämurqan. Veinti hörapitapis masmi pëkunawan parlayarqä, y tsë llapantam radiupa y televisionpa pasatsiyämurqan. Jina mëtsika periödicukunachömi yarqamurqan. Tsënöpam pï më tsë asamblëapaq wiyayarqan.

JUK MARKAMANNAM MANDAYÄMARQAN

Bautizakunqä witsampitam Quebec markallachö yanapakur karqä, y tsëchöqa francestam parlaq kayä, peru 1996 watachöqa, Torontu markata ëwayänäpaqnam niyämarqan, y tsëchöqa inglestam parlayaq. Noqaqa janan jananlla inglesta parlarmi, reunionkunachö yachatsikuyta mantsarqä. Tsëmi Jehoväman mas seguïdu mañakurqä, y pëman mas confiakurqä.

Torontu markachöqa ishkë watam shumaq yanapakur kayarqä. Warmï Carolynmi pacienciawan yanapamarqan ingles parlëta mas yachakunäpaq, y wawqi panikunapis shumaqmi yanapayämarqan. Rasllam mëtsika wawqi panikunawan amïgu tikrayarqä.

Ishkë junaq asamblëa kanqan semänaqa, imëkata alistapakuy kaptimpis tsë viernismi tardipa yachatsikoq yarqoq kä. Itsa wakinkunaqa, “¿imanir-raq imëkapis rurëpaq këkaptin yachatsikoq yarqun?” niyaq. Rasun kaqchöqa, nunakunawan parlë allipa yanapamanqanta rikashqa karmi tsëtaqa ruraq kä. Y kananyaqpis yachatsikoq yarqurqa pasëpa kushishqam kä.

1998 watam, noqatawan warmïta Montreal markachö precursor especial kayänäpaq niyämarqan. Nunakuna mas puriräyänan sitiukunachö yachatsikuyta patsätsinäpaq, y Jehoväpa testïgunkunata manana chikiyänampaq noticia willakoqkunawan parlanäpaqmi niyämarqan, y atska watapam tsëta rurar yanapakurqö. Kananqa, Canadäman juk nacionkunapita chämoqkunatam warmï Carolynwan yachatsiyä, y mëtsikaqmi Bibliapita yachakuyta munayan. Pëkunata yanapëqa alläpam gustayäman.

Bautizakunqäpita 68 watapana Jehoväta sirwinqäta yarpärirqa kushikümi. Diospita yachatsikuyqa allipam gustaman, y mëtsika nunakunatam rasumpa kaqta yachakuyänampaq yanaparqö. Wamrä Lisewan nunanqa, wamrankuna gentiariyäptinmi precursor regular tikrayarqan. Wamrä Liseqa imëpis gustashqam Jehoväpita yachatsikuyta, y tsëqa allipam kushitsiman. Jina Jehoväta alli sirwinäpaq y chaskinqä cargukunata alli cumplinäpaq yanapamaq wawqikunatam llapan shonqüwan agradecikü. Jehovä yanapamashqaqa, ima cargutapis cumplita puëdintsikmi (Sal. 51:11). Jehoväpa jutinta alabar imëkachö yanapakunqäpitaqa manachi ni imëpis agradecikuyta ushashaqtsu (Sal. 54:6).