Teytantsik Jehoväqa kuyamantsikmi

1. ¿Persiachö reywan parlëqa fäcilku karqan?

UNËNA Persia nacionchö kawashqa kanqantsikman y Süsa markachö mandakoq reywan parlëta munar ëwanqantsikman pensarishun. Rey mana qayëkätsimashqaqa warmitapis ollqutapis wanuratsimashwanmi karqan. Tsëta musyarqa manachi ëwashwantsu karqan (Est. 4:11).

2. ¿Imanö rikänatataq Jehoväqa munan?

² Persia nacionchö reynö Jehovä mana kanqampitam kushikuntsik. Mandakoq nunakunapita mas puëdeq këkarnimpis, Jehoväqa munan imë hörapis pëwan parlanantsiktam. Jehovätaqa reqintsik Kamakoqtanö, Llapanta Puëdeqtanö y Ciëluchö y Patsachö Autoridätanömi. Tsënö karpis, Jehoväqa munan kuyakoq Teytantsiktanö rikänatam (Mat. 6:9). Jehoväta kuyakoq Teytantsiktanö rikëqa kushikuypaqmi.

3. ¿Imanirtaq Jehovätaqa “Teytalläkuna” nintsik? Y ¿imakunapitataq yachakushun?

³ Jehovä munaptinmi kawantsik, tsëmi Teytantsik kanqanta nintsik (Sal. 36:9). Teytantsik kaptinmi llapan nimanqantsikkunata cäsukunantsik. Tsëta rurashqaqa mëtsika bendicionkunatam chaskishun (Heb. 12:9). Jehoväpa bendicionninqa ciëluta ëwaqkunapaq y Patsachö quedaqkunapaqwanmi. Jina Jehovä kuyakoq Teyta kanqanta y imëpis mana dejamänapaq kaqtam yachakushun. Tsëpaqqa puntata yachakushun Teytantsik Jehovä wamrantanö kuyamanqantsikta y imanö yanapamanqantsiktam.

JEHOVÄQA SHUMAQMI WÄTAMANTSIK

4. ¿Imanirtaq wakinkunapaqqa fäciltsu Jehoväta Teytankunatanö rikëqa?

⁴ Jehovä Dios Llapanta Puëdeq kaptinmi, nunakunaman mana yarpachakunqanta pï mëpis pensayan, tsëmi wakimpaqqa fäciltsu Teytankunatanö rikëqa. Kawanapaq imëkata rurashqa kaptinmi, Jehoväqa Teytantsiktanö rikänata munan. Atenas markachö këkaq cristiänukunatam apostol Pabluqa kënö nirqan: “Manam noqantsikpita alläpa karuchötsu këkan” (Hëch. 17:24-29). Awmi, imanömi juk wamra mana mantsakushpa kuyakoq teytanta parlapan, tsënöllam Jehovä Diosnintsikpis pëwan parlanantsikta munan.

5. Panintsik pasanqampita, ¿imatataq yachakuntsik?

⁵ Wakinkunaqa teytankuna mana alli tratashqa kayaptinmi, kuyakoq Teytantanö Jehoväta rikëqa fäciltsu kanman. Tsënöpa pasaq panim kënö willakun: “Teytäqa imëpis mana allim tratayämaq, tsëmi Jehoväta kuyakoq Teytätanö rikëqa fäciltsu karqan. Peru Bibliapita yachakunqämi yanapamarqan”. Kë paninöllam noqantsikpis kuyakoq Teytantsiktanö Jehoväta rikänantsik.

6. Mateu 11:27 Bibliachö ninqannö, ¿imataq yanapamäshun Jehoväta kuyakoq Teytantsiktanö rikänapaq?

⁶ Jehovä kuyakoq Teyta kanqantaqa musyantsik, wamran Jesucristu ruranqankunata y ninqankunata Palabran Bibliaman qellqatsinqanchömi (leyi Mateu 11:27). Jesusqa Teytannö kuyakoqmi karqan, tsëmi “Noqata rikämashqa kaqqa, Teytatapis rikashqam” nirqan (Juan 14:9). Jehovä kuyakoq Teyta kanqantaqa atska kutim Jesusqa nirqan y tsëtaqa Mateu, Marcus, Lücas y Juan librukunachömi tarintsik. ¿Imanirtaq tsëläya Teytampaq parlarqan? Tsënöqa parlarqan nunakuna kuyakoq Teytankunatanö Jehoväta rikäyänampaqmi (Juan 17:25, 26).

7. ¿Imanötaq Jehoväqa wamran Jesusta tratarqan?

⁷ Wamran Jesusta Jehovä kuyakuywan tratanqampitam yachakurishun. Jehoväqa wamran Jesuspa mañakuyninkunatam imëpis wiyaq (Juan 11:41, 42). Jina Jesus mana allikunapa pasëkarnimpis, Teytampa kuyakuyninta y yanapakuynintaqa clärum rikarqan (Lüc. 22:42, 43).

8. ¿Imanötaq Jehoväqa Jesusta yanaparqan?

⁸ Jesusqa, Jehovä kamashqa kanqanta y llapan wananqankunachö yanapanampaq kaqtaqa allim musyarqan, tsëmi ‘noqaqa kawä Teytärëkurmi’ nirqan (Juan 6:57). Teytan llapanchö yanapanampaq kaqmanmi Jesusqa següru karqan (Mat. 4:4).

9. ¿Imanötaq Jehoväqa wamranta shumaq wätarqan?

⁹ Jesustaqa Teytanmi tukïnöpa kuyanqanta musyatsirqan (Mat. 26:53; Juan 8:16). Jesusta llapanchö mana yanaparnimpis alli tsarakunampaqmi yanaparqan. Jesusqa musyarqanmi mana allikunaqa pasareqlla kanqanta (Heb. 12:2). Wamranta shumaq wätanqantaqa, ¿imanötaq Jehovä rikätsikurqan? Mañakunqanta wiyarnin, wananqankunata mana pishitsirnin, yachatsirnin y llapanchö yanaparninmi (Juan 5:20; 8:28). Kananqa yachakurishun Jehovä imanö yanapamanqantsikta.

¿IMANÖTAQ TEYTANTSIKQA SHUMAQ WÄTAMANTSIK?

10. Salmus 66:19, 20 Bibliachö ninqannö, ¿imanötaq kuyamanqantsikta Jehoväqa rikätsimantsik?

¹⁰ Jehoväqa mañakushqa wiyamantsikmi (leyi Salmus 66:19, 20b). Jehoväqa munan pëman imëpis mañakunatam (1 Tes. 5:17). Imë y mëchö këkarnimpis pëmanqa mañakuyta puëdintsikmi. Jehovä wiyamanqantsikta musyëqa pëta mas kuyanapaqmi yanapamantsik. Tsëtam salmus qellqaqpis nirqan: “Rowakushqäta wiyamaptinmi TEYTA DIOSTA alläpa kuyä” (Sal. 116:1).

11. ¿Jehoväqa mañakuynintsikta wiyanku?

¹¹ Teytantsik Jehoväqa mañakuynintsikkunataqa wiyanmi. Tsëmi apostol Juanpis, “munëninmannö kaqta imatapis mañakushqaqa, pëqa wiyamantsikmi” nirqan (1 Juan 5:14, 15). Awmi, Jehoväqa mana pensanqantsik höram yanaparamäshun. Y höraqa manam rasllatsu yanaparamantsik (2 Cor. 12:7-9).

12, 13. ¿Imanötaq Jehoväqa noqantsikpaq yarpachakunqanta musyatsimantsik?

¹² Jehoväqa manam imantsikpis pishitsimuntsu. Teytakunata mandanqantaqa kikin Jehoväran puntataqa ruran (1 Tim. 5:8). Jehoväqa shumaq wätamarnintsikmi mikuynintsik y röpantsik pishitsimuntsu, tsëmi tsëkunapaqqa yarpachakushwantsu (Mat. 6:32, 33; 7:11). Jina tsënöllam shamoq tiempuchöpis imantsikpis pishitsimunqatsu.

¹³ Jehoväqa Palabranwanmi yachatsimantsik kikimpita, imata ruramunampaq kaqta, imanö kawanapaq kaqta y shamoq tiempuchö ima pasakunampaq kaqtapis. Noqantsikman yarpachakunqantaqa musyatsimarquntsik teytantsikkunawan y sirweqninkunawanmi. Tsënöllam kanampis creikoqkunata pushaq anciänukunawan y wawqi panintsikkunawan yanapamantsik. Jina reunionkunachöpis yachatsimantsikmi. Tsënömi Teytantsik Jehoväqa noqantsikpaq yarpachakunqanta musyatsimantsik (Sal. 32:8).

14. ¿Imanötaq Jehoväqa yachatsimantsik?

¹⁴ Jehovämi yachatsimantsik. Jutsasapa karmi imallachöpis pantarintsik, tsëmi Teytantsik Jehovä yanapamänata wanantsik. Awmi, “kuyanqan kaqkunatam alli portakuyänampaq yachatsin” (Heb. 12:6, 7). Bibliachö imallatapis leyinqantsik, reunionkunachö yachakunqantsikmi yanapamäshun pishipanqantsikchö mas alliyänapaq. Y creikoqkunata pushaq anciänukunawanmi Jehoväqa yanaparamäshun. Awmi Jehoväqa alli kanata munarmi yachatsimantsik (Jer. 30:11).

15. ¿Imanötaq Jehoväqa yanapamantsik?

¹⁵ Jehoväqa alli tsarakunapaqmi yanapamantsik. Juk kuyakoq teyta wamranta yanapanqannöllam Teytantsik Jehoväqa mana allikunapa pasashqa yanapamantsik. Y pëwan alli kanapaqmi santu espïritunwan yanapamantsik (Lüc. 11:13). Jina mana allikunapa pasashqam shamoq tiempupaq änikuyninkunawan yamë kanapaq yanapamantsik. Musyantsikmi mana allikunaqa pasareqlla kanqanta, peru Jehoväpa bendicionninkunaqa manam ushakanqatsu. Awmi, Teytantsik Jehoväqa llapanchömi yanapamäshun (2 Cor. 4:16-18).

TEYTANTSIKQA MANAM JAQIRAMÄSHUNTSU

16. Adan jutsallakunqampitaqa, ¿imataq pasakurqan?

¹⁶ Adan jutsallakuriptinqa, Jehoväqa mananam pëta ni noqantsiktapis tsurinkunatanönatsu rikämarquntsik (Rom. 5:12; 7:14). Tsëmi yachakushun tsurinkunatanö yapë rikämänapaq Jehovä ima ruranqanta.

17. Adan jutsallakunqampitaqa, ¿imatataq Jehoväqa rurarqan?

¹⁷ Adan jutsallakushqa kaptimpis, Jehoväqa Adanpa tsurinkunata yanapanampaqmi änikurqan. Tsënöpa cäsukoq nunakunata yapë tsurinkunatanö rikänampaq (Gen. 3:15; Rom. 8:20, 21). Kuyamarnintsikmi Diosqa japallan Tsurinta noqantsikrëkur wanunampaq permitirqan (Juan 3:16).

18. Jehoväpita karupakäkurishqaqa, ¿wamrankunatanö chaskimäshuntsuraq?

¹⁸ Jutsasapa kashqapis, Jehoväqa kuyë tsurinkunanö kanatam munan. Itsa höraqa llakitsir karupakäkurishwan, peru pëqa imëpis shuyarëkämäshunmi. Munëninta rurakoq wamrata teytan imanö chaskinqanta Jesus willakunqanchömi, Jehovä kuyamanqantsikta rikantsik (Lüc. 15:11-32). Tsë willakuychöqa teytaqa wamran kutinanta shuyarëkarqanllam. Y wamran kutiriptinqa kushishqam chaskirqan. Tsënöllam noqantsikpis Teytantsik Jehoväta ashishqaqa pëqa kushishqa chaskimäshun.

19. ¿Imatataq Jehoväqa ruranqa mana allikunata ushakätsinampaq?

¹⁹ Teytantsik Jehoväqa, Jesuswan 144.000 nunakunatam akrashqa ciëlupita gobernayämunampaq y mana allikunata ushakätsiyämunampaq. Tsë Gobiernuqa, Mushoq Patsachö nunakuna jutsannaq kayänampaqmi waranqa watapa yanapakunqa. Y tsëpitaqa, wiyakoq o mana wiyakoq kayanqanran musyakänan. Wiyakoq kaqkunaqa mana wanushpanam kawakuyanqa. Tsëqa, ¡imanöraq Teytantsik Jehoväqa kushikunqa tsurinkunatanöna rikar!

20. ¿Imanötaq Teytantsik Jehoväqa kuyamanqantsikta rikätsimarquntsik? ¿Imapitataq qateqnin kaq yachatsikuychöqa yachakushun?

²⁰ Jehovä kuyakoq Teyta kanqantaqa rikätsimarquntsik mañakuynintsikta wiyamarnintsik, shumaq wätamarnintsik y yachatsimarnintsikmi. Jina shumaq bendicionkunatam shamoq tiempupaq änimarquntsik. ¡Manaku tsënö Teytayoq këqa kushikuypaq! Qateqnin kaq yachatsikuychömi yachakushun Teytantsik Jehoväta imanö agradecikunapaq kaqta.