Teytantsik Jehoväta kuyashun

1, 2. ¿Imanirtaq Teytantsik Jehoväqa wamrankunanö kanapaq permitimantsik?

JEHOVÄQA munan llapantsik pëpa familian kanantsiktam, tsëpaqqa pëllatam sirwinantsik y tsurin Jesucristu wanunqanmanmi markäkunantsik o yärakunantsik. Tsënö rurarqa mana wanushpam Patsachö kar o ciëluchö karpis kushishqa kawakushun.

² Kuyamarnintsikmi Jehoväqa noqantsikrëkur Tsurin wanunanta permitirqan, tsënöpa pëpa wamrankunanö kanapaq (Juan 3:16). Tsëmi Bibliachöqa, “chaniyoqchömi rantishqa kayarqunki” nimantsik (1 Cor. 6:20). Tsurin wanunqanmi Teytantsik Jehoväta mas kuyanapaq yanapamantsik. Llapanta Puëdeq këkarnimpis Teytantsiktanö rikänapaqmi permitimantsik. ¡Imanö kushikuypaqmi tsënö Teytayoq këqa!

3. ¿Salmusta qellqaq nunanö yarpachakurqunkiku? (“¿Jehoväqa kuyamantsuraq?” neq recuadrutawan rikäri).

³ Salmus libruta qellqaq nunaqa, “TEYTA DIOS yanapamashqantaqa manam imanöpapis paguëta puëdishaqtsu” nirqanmi (Sal. 116:12). Awmi, noqantsikpis Teytantsik Jehoväpita llapan chaskinqantsiktaqa manam paguëta puëdintsiktsu. Tsënö kaptinmi apostol Juanqa kënö nirqan: “Noqantsikqa kuyantsik, puntata pë kuyamashqantsik kaptinmi” (1 Juan 4:19). Tsëqa, ¿imanötaq Teytantsik Jehoväta kuyanqantsikta rikätsikushwan?

JEHOVÄTA AMA JAQIRISHUNTSU

4. Santiägu 4:8 Bibliachö ninqannö, ¿imanötaq Teytantsik Jehoväman witishun?

⁴ Teytantsik Jehoväqa pëman witinatam munan (leyi Santiägu 4:8). Kuyakoq Teytantsik karmi, imëpis wiyamantsik y pëman mañakunata munan (Rom. 12:12). Tsëmi Diosnintsikta wiyanapaqqa Palabrantawan publicacionkunata imëpis leyinantsik. Jina reunionkunachö wiyakunqantsikmi yanapamäshun. Imanömi juk teyta wamranwan shumaq parlakuyan, tsënöllam noqantsikpis Teytantsik Jehoväman imëpis mañakunantsik.

5. ¿Imanötaq mañakuynintsik kanman?

⁵ Teytantsik Jehoväman mañakushqaqa wiyamäshunmi (Sal. 62:8). Jehoväman mañakurqa manam janan shonqullaqa mañakunantsiktsu. Tsëpa rantinqa, yarpachakuynintsikkunata, kushikuynintsikkunatam Jehoväta willanantsik. Awmi, Teytantsik Jehoväqa kuyamantsikmi, tsëmi alli musyantsik imë hörapis wiyamänapaq y yanapamänapaq kaqta.

6. ¿Imanötaq Jehoväta agradecikunqantsikta rikätsikushwan?

⁶ Salmus 40:5 libruta qellqaq nunaqa, “TEYTA DIOS, atska kutim espantëpaq kaqkunata rurar yanapayämarqunki. Yanapayämashqëkita yupëtapis manam puëditsu. Tukïnöpa yanapayämashqëkita willakurpis llapantaqa manam ushamantsu” nirqanmi. Tsënöllam noqantsikpis parlanqantsikwan y ruranqantsikwan Teytantsik Jehoväta agradecikunantsik. Tsënöpam kanan witsan nunakunapitaqa jukläya kashun. Pëkunaqa kikinkunallamanmi yarparäkuyan y “ushanan junaqkunachöqa” mana agradecikoq kayänampaq kaqtam Bibliachöqa nirqan (2 Tim. 3:1, 2). Tsëmi pëkunanö mana kanapaq cuidakunantsik.

7. ¿Imanirtaq wawqi panintsikkunawan shumaq kawakunantsik?

⁷ Imanömi juk teyta wamrankuna alli kawakuyänanta munan, tsënöllam Teytantsik Jehoväpis alli kawakunata munan. Tsënö kawakunqantsikpitam sirweqnin kanqantsikqa cläru rikakanqa (Juan 13:35). Awmi, imanö kushikuypaqmi wawqikuna y panikuna juk shonqulla juntu kawakuyanqanqa (Sal. 133:1). Wawqi panikunata kuyarqa, Teytantsik Jehovätapis kuyashunmi (1 Juan 4:20). Wawqi Panintsikkunaqa kuyakoq, ankupäkoq y shumaq tratakoqmi kayan. Tsëmi pëkunawan Jehoväta sirwirqa kushishqa sientikuntsik (Efes. 4:32).

TEYTANTSIK JEHOVÄTA CÄSUKUSHUN

8. 1 Juan 5:3 Bibliachö ninqannö, ¿imanirtaq Jehoväta wiyakunantsik?

⁸ Wamrakuna teytankunata cäsukuyänantam Jehoväqa munan, tsënöllam noqantsikpis pëta cäsukunata munan (Efes. 6:1). Teytantsik Jehoväqa shumaq kawanapaqmi imëkata ruramushqa, peru manam tsërëkurtsu cäsukuntsikqa sinöqa kuyarninmi (leyi 1 Juan 5:3). Awmi, Jehoväqa kushikunmi kikintsik munarnin pëta cäsukushqa.

9, 10. ¿Imanirtaq Jehovä munanqannö kawanantsik?

⁹ Warë warantin alli kayänanta munarmi teytakunaqa wamrankunata imanö kayänampaq y imanö portakuyänampaq shumaq yachatsiyan. Tsë cuentallam noqantsikpis Teytantsik Jehovä mandakunqanta wiyakunantsik, tsënömi kuyanqantsikta y respetanqantsikta rikätsikuntsik. Tsënö rurarqa kushishqam kawakushun (Is. 48:17, 18). Peru Jehovä mandakunqanta mana wiyakoqkunaqa imëka mana allikunapam pasayanqa (Gäl. 6:7, 8).

¹⁰ Jehovä llapan mandamanqantsikta wiyakurqa kushishqam kawakushun. Pëqa shumaq kawakunatam munan. Estädus Unïduspita panintsik Auröram kënö willakun: “Jehoväta wiyakurqä imë o mëchö karpis kushishqam kawakushun”. Y noqantsiktaqa, ¿imakunachötaq yanapamantsik Jehoväta wiyakunqantsik?

11. ¿Imanötaq Jehoväman mañakunqantsikqa yanapakun?

¹¹ Teytantsik Jehoväman mañakunqantsikqa, cäsukunapaq fäcil mana këkaptimpis yanapamantsikmi. Y jutsasapa karmi Jehoväta wiyakunapaqqa alliraq kallpachakunantsik. Tsëtam Salmus libruta qellqaq nunapis rogakurqan, “Cäsukuq kanäpaqna käyïkatsillämë” nirnin (Sal. 51:12). Tsënöllam panintsik Deliapis “Teytallä Jehovä qam munanqëkinö kawanapaq yanapëkallämë” nir mañakurqan. Awmi, Teytantsik Jehoväqa mañakuynintsikta wiyanmi (Lüc. 11:9-13).

TEYTANTSIK JEHOVÄTA KUYAYÄNAMPAQ YANAPAKUSHUN

12. Efesius 5:1 Bibliachö ninqannö, ¿imata ruranapaqtaq Jehovä mandamantsik?

¹² (Leyi Efesius 5:1). “Kuyashqa Tsurinkuna” karninmi kuyakoq Teytantsiknö këta munantsik. Teytantsik Jehovänömi kuyakoq, alli y perdonakoq kanantsik. Jehovä munanqannö kawanqantsikta nunakuna rikarqa, Jehoväpitam mas yachakuyta munayanqa (1 Pëd. 2:12). Teytakuna Jehovänö wamrankunata kuyayaptinqa, itsa wamrakunaqa Teytankunatanö Jehoväta rikäyanqa.

13. ¿Imaraq yanapamäshun mana mantsakushqa Jehoväpita yachatsikunapaq?

¹³ Wamrakunaqa kushishqam teytankunapita parlayan. Tsëmi noqantsikpis Teytantsik Jehoväpita kushishqa yachatsikuntsik. Tsëmi rey Davidqa, ‘TEYTA DIOSMAN markäkur o yärakurmi alläpa kushikü’ nir qellqarqan (Sal. 34:2). Wakinnintsikqa mantsakuntsikmi yachatsikuyta. Peru yarpänantsikmi tsëta rurarqa Teytantsik Jehoväta kushitsinqantsikta y tsënöllam yachatsinqantsik nunakunapis kushikuyta tariyanqa. Apostolkuna kawayanqan witsan wawqi panikunata Teytantsik Jehovä yanapanqannöllam, noqantsiktapis valienti kanapaq yanapamäshun (1 Tes. 2:2).

14. ¿Imanirtaq Jehoväpita yachatsikuntsik?

¹⁴ Teytantsik Jehoväqa më tsë nacionpita kayaptimpis shumaq rikänatam munan (Hëch. 10:34, 35). Kuyakoq kanqantsiktaqa rikätsikuntsik nuna mayintsikta Diospa Palabrampita yachatsirmi (Mat. 28:19, 20). Tsënö rurashqaqa kanan y shamoq tiempuchömi wiyamaqnintsikkunaqa alli kawakuyanqa (1 Tim. 4:16).

TEYTANTSIK JEHOVÄTA KUYARQA KUSHISHQAM KAWASHUN

15, 16. ¿Imanirtaq kushishqa kanantsik?

¹⁵ Teytantsik Jehoväqa kuyakoq karmi kushishqa kawanata munan (Is. 65:14). Tsëmi imëkata pasarpis kushishqa kawakunapaq Palabran Bibliawan yachatsimarquntsik (Jer. 15:16). Tsëmi següru këkantsik imëka mana allikunapa pasashqapis yanapamänapaq kaqta. Jina llapan wawqi panintsikkunawan Teytantsik Jehovä munanqannö kawëqa kushikuypaqmi (Sal. 106:4, 5).

¹⁶ Kuyakoq Teytantsik Jehoväqa ichikllachönam llapan mana allikunata ushakätsimunqa. Tsënöpam kuyashqa kastantsikkuna kawarirayämuptin Mushoq Patsachöqa kushishqana kawakushun (Juan 5:28, 29). Awmi, ichikllachönam Teytantsik Jehovätaqa llapan nunakuna respetayanqa, wiyakuyanqa y pëllata sirwiyanqa.