Jehoväta kuyarninmi bautizakunantsik

1, 2. Hëchus 8:27-31, 35-38 Bibliachö ninqannö, ¿imanirtan Etiopïa nacionpita nunaqa bautizakuyta munarqan?

¿JESUSPA qateqnin kanëkipaq bautizakuyta munankiku? Tsëtaqa mëtsikaq nunakunam kuyakoq y agradecïdu karnin rikätsikuyashqa. Tsëpaqqa Etiopïa nacionchö reinapa trabajaqnin nuna ruranqanman pensarishun.

² Nacionninman tsë nuna kutikuykarmi, Diospa willakoqnin Isaïas qellqanqanta leyikarqan. Tsënam Felïpiqa pë kaqman witirir, pëpaq Jesus ruranqankunapita yachatsirqan. Awmi, Diospa Palabran shonqunyaq chäriptinmi kë nunaqa bautizakurirqan (leyi Hëchus 8:27-31, 35-38). Tsëta ruranampaqqa mana alli religionninta jaqishqanam karqan y Jehovä Diospa markanwan sirwita munarmi Jerusalentapis ëwashqa karqan. Awmi, Jehoväta kuyanqanrëkurmi Jesuspa qateqnin kanampaq bautizakurirqan (Mat. 28:19).

3. ¿Imanirtan wakinkunaqa bautizakuyantsu? (Rikäri “¿Ima allpanötaq shonquykiqa?” neq recuadruta)

³ Jehoväta kuyarnin bautizakuyta munarpis, itsa familiëkikunawan amïguïkikuna penqapäyäshunëkita mantsar bautizakunkiraqtsu (Mat. 10:37). Itsapis Dios chikinqan viciuyoq kanki y jaqita mana puëdinëkipaq kaqta pensanki (Sal. 97:10). Y wamra kanqëkipita patsë Jehovä chikinqan costumbrikikunaman yarparëkanki (1 Cor. 10:20, 21). Tsënö kaptinqa, tsë rurëkuna kuyanqëkita o Jehoväta kuyanqëkitam rikätsikunëki.

JEHOVÄTAM KUYANANTSIKQA

4. ¿Imanirtan bautizakushwan?

⁴ Itsa Jehoväpa testïgunkunawan manaraq Bibliapita yachakurqa, Diospa Palabranman y Jesusman creirqëkina. Y Testïgukuna imanö kayanqanqa gustashunki. Tsë ruranqëkikuna alli kaptimpis, Jehovällapaqna kawanëkipaq y bautizakunëkipaqqa manam tsëllatatsu ruranëki. Imapitapis masqa, Jehoväta kuyanqëkim bautizakunëkipaqqa yanapashunki. Pëta kuyaptikiqa manam imapis michäshunkitsu pëta sirwinëkipaq. Awmi, Jehoväta kuyanqantsikqa yanapamäshun bautizakunapaq y pëta imëpis sirwinapaqmi.

5. ¿Imatatan kë yachatsikuychö yachakushun?

⁵ Jesusqa nirqan, Jehovä Diosta llapan shonquntsikwan, kawënintsikwan, yarpënintsikwan y kallpantsikwan kuyanapaqmi (Mar. 12:30). Jesus ninqannö, ¿imanötan Jehoväta kuyankiman y respetankiman? Tsëpaqqa kikin Jehovä kuyashunqëkimanmi yarpachakunëki (1 Juan 4:19). Kë yachatsikuychömi, Jehoväta imanö kuyanëkipaq y bautizakunëkipaq yachakunki.b

6. Romänus 1:20 Bibliachö ninqannö, ¿imanötan Jehoväpita yachakushun?

⁶ Kamanqankunata rikarnin Teytantsik Jehoväpita yachakuy (leyi Romänus 1:20; Rev. 4:11). Plantakunata, animalkunata y kikintsikpis espantakïpaq rurashqa kanqantsikman yarpachakuy (Sal. 139:14). Y mëtsika qoyllurkunapitaqa Inti o Rupaymi mas taksha kaqqa, tsëta Jehovä imanö rurashqa kanqanmi rikätsishunki puëdeq kanqanta (Is. 40:26).c Jehovä kamanqankunaman yarpachakunqëkim respetanëkipaq yanapashunki. Tsënö kaptimpis, Jehovä yachaq y puëdeq kanqanta yachakunqëkim, pëta mas kuyanëkipaq yanapashunki.

7. Shonqupita patsë Jehoväta kuyanëkipaqqa, ¿imatan yanapashunki?

⁷ ¿Ciëluta y Patsata kamaq Diosnintsik, qamman mana yarpachakunqantaku creinki? Tsënö kaptinqa, Jehovä qampaq yarpachakunqantam musyanëki (Hëch. 17:26-28). Davidqa tsurin Salomontam, ‘TEYTA DIOSQA musyanmi imata shonquntsik yarpëkashqantapis’ nirqan. Awmi, pëqa qam reqinëkitam munan (1 Crön. 28:9). Tsëta rikätsikurmi Jesusqa kënö nirqan: “Manam pipis noqaman shamïta puëdintsu [...] Teyta noqaman mana apamuptinqa” (Juan 6:44). Awmi, kikin Jehovä munaptinmi Bibliapitaqa yachakuykanki, pëta reqirnin mas kuyanëkipaq.

8. ¿Imanötan Jehovä kuyashunqëkita agradecikunkiman?

⁸ Jehovä kuyashunqëkitaqa agradecikunki yanapashunëkipaq pëman mañakurninmi. Mañakunqëkikunata Jehovä wiyashuptikim pëta mas kuyanki (Sal. 116:1). Tsënö kaptimpis Jehoväta mas reqinëkipaqqa pëpitam mas yachakunëki y pë munanqannömi kawanëki. Y tsë llapantaqa yachakunki Jehovä Diospa Palabrampita yachakurllam.

9. ¿Imatatan rurankiman Diospa Palabranta kuyarninqa?

⁹ Diospa Palabrampita yachakuy. Bibliallachömi Jehoväpita y pë munanqannö kawanëkipaqqa yachakunki. Diospa Palabranta kuyanqëkitaqa rikätsikunki llapan junaqkuna leyirnin, Bibliapita yachakunëkipaq kallpachakurnin y Biblia ninqanmannö kawakurninmi (Sal. 119:97, 99; Juan 17:17). ¿Diospa Palabranta leyinëkipaq tiempikïta patsätsirqunkiku?

10. ¿Imanirtan Biblia ninqanman markäkushwan o yärakushwan?

¹⁰ Bibliallachömi tarintsik Jesusta reqeq nunakuna, Jesuspa kawënimpita willakuyanqanta. Y Bibliallachömi yachakunki Jesus qamrëkur wanunqanta. Tsëpitanam, Jesus ruranqanta y ninqankunata yachakunqëkimannö pëta mas kuyarnin reqita munanki.

11. ¿Imatan yanapashunki Jehoväta mas kuyanëkipaq?

¹¹ Jesustam kuyanëki. Jesusta kuyarqa teytan Jehovätaqa masmi kuyanki. Tsëtaqa nintsik, señornintsik Jesus rurëninkunachö Teytannö rurashqa kaptinmi (Juan 14:9). Tsëmi Jesuspita mas yachakunqëkimannö Jehoväta mas kuyanki. Jesusqa ankuparqanmi mana alli tratashqakunata, waktsakunata, qeshyëkaqkunata y kallpannaqkunata. Y Jesus munanqannö rurarqa kushishqam kawakunki (Mat. 5:1-11; 7:24-27).

12. Jesuspita yachakunqëkiqa, ¿imachötan yanapashunki?

¹² Jutsëkikunapita perdonashqa kanëkipaq Jesus wanunqanman yarparanqëkim, pëta mas kuyanëkipaq yanapashunki (Mat. 20:28). Y tsënö Jesus ruranqanrëkurmi Jehoväqa perdonashunki (Hëch. 3:19, 20; 1 Juan 1:9). Awmi, Jehoväta y Jesusta mas kuyanqëkimannömi, pëkunata kuyaq nunakunawan mas juntakuyta munanki.

13. Jehoväta kushishqa sirwinapaqqa, ¿pikunawantan juntu këkänantsik?

¹³ Jehoväpa sirweqninkunata kuyë. Itsa familiëki y amïguïkikunaqa musyayanqatsu imanir Jehovällata sirwinëkipaq änikunqëkita y pensayanman pëkunata manana kuyarnin ruranqëkita. Tsënö kaptinqa ama yarpachakuyëtsu, Jehoväqa munan kuyakoq kanata y allikunata ruranantsikpaq juknintsik juknintsik kallpachakunatam. Tsëpaqqa, Jehoväta sirweq nunakunawanmi juntu kanëki (Mar. 10:29, 30; Heb. 10:24, 25). Nunakunapa rikëninchö imëpis alli portakuptikiqa, tsëta rikarmi familiëkipis Jehovä sirwita munariyanqa (1 Pëd. 2:12).

14. 1 Juan 5:3 Bibliachö ninqannö, ¿imanötan Jehoväpa mandakuyninkuna yanapashunki?

¹⁴ Diospa mandakuyninta cäsukuy. Manaraq Jehoväpita yachakurqa munënikimannömi kawakurqëki, peru Jehoväpa mandamientunkunata cäsukurqa kushishqam kawakunki (Sal. 1:1-3; leyi 1 Juan 5:3). Awmi, Bibliachöqa alli y shumaq yanapakuytam casädukunapaq, teytakunapaq y wamrakunapaq tarintsik (Efes. 5:22–6:4). Tsëqa, ¿familiëkichö mas kushishqaku kanki? ¿Jehoväta cäsukurninqa mas alli amïgukunayoqku kanki? ¿Kushishqaku sientikunki? (Prov. 13:20; 1 Cor. 15:33).

15. Bibliapita yachakunqëkimannö kawanëkipaqqa, ¿imatan yanapashunki?

¹⁵ Jehovä munanqannö kawakuyqa manam fäciltsu kanman. Tsënö kaptinqa, Bibliachö alli kaqta y mana alli kaqta yachakunqëkim Teyta Dios munanqannö kawanëkipaq yanapashunki (Heb. 5:13, 14). Kë revistapita yachakunqëkiqa yanapashunki, mas alli kanëkipaq y Jehoväpa sirweqnin kanëkipaqmi.

16. Jehovä Diosnintsikqa, ¿imanötan patsätsishqa sirweqninkunata?

¹⁶ Diosta sirweq markata kushishqa yanapë. Jehoväqa grüpu grüpu sirweqninkuna kayanampaqmi patsätsishqa, tsë llapantaqa Jesuspa cargunmanmi churashqa (Efes. 1:22; 5:23). Y Jesusnam Ciëluchö pëwan mandakayämunampaq kaqkunata, yanapakuyänampaq churashqa. Tsë cristiänukunatam, “sirwipakoqkunata rikänampaq y tiempunchö mikïnin qaranampaq” nir jutitsirqan, pëkunam tiempunchö yachatsiyäshunëkipaq carguyoq kayan (Mat. 24:45-47). Kë sirwipakoqkunaqa, qamkuna alli kayänëkita munarmi yachaq y humildi nunakunata tsë carguman churashqa (Is. 32:1, 2; Heb. 13:17; 1 Pëd. 5:2, 3). Pëkunaqa alli kanëkipaq y Jehoväta mas reqinëkipaqmi yanapayäshunki. Peru tsë llapampitapis masqa, Jehovä Diospita yachatsikunëkitam munayan (Efes. 4:11-13).

17. Romänus 10:10, 13, 14 Bibliachö ninqannö, ¿imanirtan Jehoväpita yachatsikuntsik?

¹⁷ Jehoväta kuyayänampaq yanapakuy. Jesusqa qateqninkunatam mandarqan yachatsikuyänampaq (Mat. 28:19, 20). Kë mandakuytaqa kushi kushim cumplinantsik, tsënöpam apostol Pëdru y Juan niyanqannö nishun: “Manam rikäyanqäkunapita y wiyayanqäkunapita parlëtaqa jaqita puëdiyätsu” (Hëch. 4:20). Jehoväpita nunakuna yachakuyaptin kushikuywanqa manam imapis igualantsu. Etiopïa nunata yacharatsir, ¿imanöraq Felïpi sientikurqan tsë nuna bautizakuriptin? Jehoväpa testïgun kanëkipaqqa, Felïpinömi yachatsikunëki y Jesus mandashunqëkitam cumplinëki (leyi Romänus 10:10, 13, 14). Tsënö rurarqa, Etiopïa nacionpita nunanömi ninki: “¿Imataq michäkun bautizashqa kanäta?” (Hëch. 8:36).

18. Qateqnin yachatsikuychöqa, ¿imapitatan yachakushun?

¹⁸ Bautizakuptikiqa, kawënikipis allipaqmi cambiarinqa. Tsëmi, manaraq bautizakur alliraq yarpachakunëki. Tsëqa, ¿imatatan bautizakuypita musyanëki? ¿Imatataq ruranëki bautizakunëkipaq? Y bautizakurirqa, ¿imatatan ruranëki? Tsëtaqa qateqnin yachatsikuychömi yachakushun.