Imanö kawakunëkipaq kaqtaqa qammi decidinki

3.500 watanönam pasarishqa alli kawakuyta munar imata rurayänampaq kaqta sirweqninkunata Jehovä Dios ninqampitaqa. Kënömi nirqan : “Bendicionta chaskir alli kawayänëkipaq kaqta o maldisishqa kar mana alli kawayänëkipaq kaqta kanan junaq akrayë. [...] Qamkuna y qamkunapita miraqkunapis alli kawakuyänëkipaq kaqta akrayë” (Deuteronomiu 30:19).

Tsë witsan nunakuna alli y kushiqa kawakuyta munarqa, allim decidiyänan karqan. Y noqantsikpis tsënöllam alli decidinantsik. Tsëmi Diosqa Palabran Bibliachö nimantsik alli kawakunapaq imata ruranapaq kaqta. Kënömi nin: “Teyta [Jehovä] Diosta kuyar pë ninqankunata cäsukuyë” (Deuteronomiu 30:20).

¿IMANÖTAN JEHOVÄTA KUYANKIMAN Y WIYAKUNKIMAN?

DIOSPA PALABRAN NINQANTA YACHAKUY. Teyta Jehoväta kuyanëkipaqqa, puntataqa Bibliachö pëpaq ima ninqantam yachakunëki. Bibliachöqa Jehovä kuyakoq kanqanta y alli kawakunëkita munanqantam yachakunki. Y qampaq yarpachakurmi pëman mañakunëkita munan (1 Pëdru 5:7). Jehoväta reqinëkipaq kallpachakuptikiqa Bibliachö ninqannöpis, pëqa qammanmi witimunqa (Santiägu 4:8).

BIBLIACHÖ YACHAKUNQËKIMANNÖ KAWAKUY. Teyta Diostaqa wiyakushun Bibliachö ninqankunata cäsukurmi. Tsëta rurarqa Josuë 1:8 ninqannömi alli kawakunki. Kënömi nin: “Tsënö cumpliptikim llapan ruranqëkikunapis alli kanqa”.