Imanö kawakunëkipaqqa kikikim decidinëki

¿RASUMPAKU IMANÖ KAWAKUNËKIPAQ KAQTA DECIDITA PUËDINKI? Wakin nunakunaqa kawëninkuna destinashqana kanqantam niyan, y wakinnam tsëtaqa Dioslla musyanqanta niyan. Tsëmi munayanqannö imapis mana yarquptinqa, “tsënöchi destïnü karqan” niyan.

Imëka mana allikuna pasakïkanqanta rikar y tsëkuna mana altsakanqanta rikarmi, alläpa llakikuyan. Mas alli kawakuyänampaq imëkata rurëkarpis guërrakuna, wanutsinakïkuna, qeshyakuna y imëka desgraciakuna pasakuptinmi shumaq kawakïtaqa puëdiyantsu. Tsëmi “imapaqnataq imatapis rurashaq” niyan.

Rasumpa kaqchöqa imapis pasakunqanqa, kawënintsikta cambiarinmanmi (Eclesiastes 9:11). Tsënö kaptimpis, kikintsikmi imanö kawakunapaq kaqtaqa decidita puëdintsik. Y Diospa Palabrampis tsëta rurëta puëdinqantsiktam nimantsik. ¿Imanirtaq tsëta nintsik?

Äninqan markaman unë witsan israelïtakuna manaraq yëkuyaptinmi Diosnintsikqa Moiseswan kënö willatsirqan: ‘Kawëtawan wanïta, y bendiciontawan maldiciontam puntëkiman churä; y kawëtam akranëki qam y mirënikikuna kawar sïguiyänëkipaq, Jehovä Diosnikita kuyarnin, ninqanta wiyakurnin, y pëta mana jaqirnin’ (Deuteronomiu 30:15, 19, 20).

‘Kawëtawan wanïta, y bendiciontawan maldiciontam puntëkiman churä; y kawëtam akranëki’ (Deuteronomiu 30:19).

Awmi, Diosqa israelïtakunatam Egiptuchö esclävu kayanqampita librarqan y äninqan markachö kushishqa kawakuyänantam permitirqan. Peru tsë bendicionkunata chaskiyänampaqqa, ‘kawëtam akrayänan’ karqan. Y ¿imanötaq tsëta rurayänan karqan? Diosnintsikta kuyarnin, mandanqanta cäsukurnin y pëta mana jaqirninmi.

Tsënöllam qampis imata karpis akranëki y akranqëkiqa kushishqa kawakunëkipaqmi yanapashunki. Diosta kuyarnin, mandakunqanta cäsukurnin y pëta mana jaqirninqa, mana wanushpa Shumaq Patsachö kawakïtam akrëkanki. Peru ¿imanötaq tsëkunata rurankiman?

DIOSTA KUYË

Diosnintsik yanapaptinmi apostol Juanqa “Diosqa kuyakïmi” nishpa qellqarqan (1 Juan 4:8). Kuyakoq kanqanta musyarmi, mëqan mandamientu mas precisaq kanqanta tapuyaptin Jesusqa kënö nirqan: “Jehovä Diosnikitam llapan shonqïkiwan, llapan kawënikiwan y llapan yarpënikiwan kuyanëki” (Mateu 22:37). Imatapis ruramänata mantsarllatsu manam Diosnintsikpa amïgunqa kanantsik, sinöqa pëta kuyarninmi. Peru ¿imanirtaq Diostaqa kuyashwan?

Juk teyta wamrankunata kuyanqannöllam, Jehovä Diosnintsikpis kuyamantsik. Jutsasapa këkarpis teytakunaqa wamrankunata yachatsiyänampaq, animayänampaq y shumaq corregiyänampaqmi kallpachakuyan. Y tsëtaqa rurayan wamrankuna kushishqa kawakuyänanta munarmi. Y ¿wamrankunapitaqa imatataq teytakuna shuyaräyan? Kuyayänanta, cäsukuyänanta y imatapis niyanqanqa biennimpaq kanqanta entiendiyänantam. Tsënöllam jutsannaq Diosnintsikpis kuyanata, noqantsikpaq llapan ruranqankunapita agradecikunantsikta shuyaran.

MANDAKUNQANTA WIYAKÏ

Bibliata qellqayanqan idiömachö wiyakï neq palabraqa, “cäsukï” ninanmi. ¿Manaku teytakunapis wamrankuna cäsukuyänanta munarninqa, “wiyamë” niyan? Tsënöllam Diosta wiyakunapaqqa, noqantsikpita imata shuyaranqanta musyanantsik y nimanqantsikta ruranantsik. Kanan witsanqa Diosnintsik manam nunakunawan parlantsu. Tsëmi pëta wiyakïta munarqa, Palabranta leyinantsik y leyinqantsikmannö kawakunantsik (1 Juan 5:3).

Diosnintsikta wiyakï alläpa precisanqanta rikätsikïta munarmi, Jesusqa juk kutichö kënö nirqan: “Qellqashqam këkan: ‘Nunaqa manam tantallawantsu kawanan, sinöqa Jehovä llapan ninqankunawanmi’” (Mateu 4:4). Mikunantsikqa alläpam precisan, peru Diospita yachakunqantsikmi masqa. ¿Imanir? Alläpa yachaq rey Salomonmi nirqan yachaq kanqantsikqa kawënintsikta salvanqanta (Eclesiastes 7:12). Awmi, Diospita yachakunqantsikqa imëkapitapis cuidakunapaq y shamoq tiempuchö juk shumaq Patsachö kawakunapaqmi yanapamantsik.

DIOSTAQA MANAM JAQINANTSIKTSU

Jesus juk igualatsikïta ruranqampitaqa parlarqantsiknam, tsëchömi kënö nirqan: “Kawëman chätsikoq näniqa llanum y punkumpis kichkim, y wallkaqllam tsë nänitaqa tariyan” (Mateu 7:13, 14). Shumaq Patsaman chätsikoq nänipa ëwanapaqqa, tsë nänita alleq reqeq juk pushakoqtam wanantsik. Tsë pushakoqqa Diosnintsikmi, tsëmi pëtaqa jaqinantsiktsu (Salmus 16:8). Peru ¿imanötaq pëta mana jaqinqantsikta rikätsikushwan?

Cada junaqmi imëka rurënintsikkuna kan y maskuna rurëtapis munantsikmi. Alläpa ocupädu kar y imëka yarpachakïyoq karmi, Diosnintsik noqantsikpita imata shuyaranqanman pensanapaqqa tiempuntsikpis kannatsu. Tsëchi Diospa Palabranqa këta ruranapaq yarpätsimantsik: “Alleq rikäyë imanöpis portakïkäyanqëkichö upakunanö mana kayänëkipaq, sinöqa yachaqkunanö, tiempïkikunata alleq provecharnin, porqui alläpa mana alli junaqkunachömi kawantsik” (Efesius 5:15, 16). Diosta mana jaqinapaqqa, pëpa kaqkunatam kawënintsikchö mas precisaqpaq churanantsik (Mateu 6:33).

KIKIKIM DECIDINËKI

Unë witsan pasashunqëkitaqa manam cambiëta puëdinkinatsu, peru shamoq tiempuchö familiëkiwan kushishqa kawakuyänëkipaqqa decidita puëdinkim. Palabran Bibliachömi nin, Diosnintsikqa alläpa kuyamanqantsikta y imata ruranantsikta munanqanta. Diospa willakoqnin Miquëasmi kënö nirqan:

“Aw nuna, pëqa alli kaqtam nishurqunki. ¿Imatataq Jehovä yapë mañëkäshunki? ¿Manaku pëta sirwirnin alli kaqta ruranëkita, llakipäkoq kanëkita y humildi kanëkita?” (Miquëas 6:8).

Kawëman chätsikoq Diosnintsikpa nänimpa, ¿purita munankiku? Tsë nänipa purirqa, pë änikunqan bendicionkunatam chaskinki. Peru tsëtaqa kikikim decidinëki.