Jövinkuna, ¿imatatan rurayankiman qamkunaman mas confiakuyänampaq?

1. Bautizakushqa jövinkunaqa, ¿imanötan kayan?

JÖVINKUNA, qamkunaqa imëkachömi yanapakuyta puëdiyanki. Cäsi llapëkim imëkata rurayänëkipaq kallpayoq kayanki (Prov. 20:29). Congregacionchöqa imëkachömi yanapakuyanki. Tsëchi wakinnikikunaqa creikoqkunata rikaqkunapa yanapaqnin këta munayanki. Peru itsa wakinnikikunaqa pensayanki wawqi panikuna wamratanöllaraq rikäyäshunqëkita. ¿Qampis tsënöku pensanki? Jövinllaraq karpis, congregacionnikichö wawqi panikuna qamman confiakuyänampaq y respetayäshunëkipaqqa, kananllapitanam imëkata rurëta puëdinki.

2. ¿Imapitatan këchö yachakushun?

² Këchöqa rey David imakunapa pasanqampitam yachakushun. Asäwan Jehosafat Judäta gobernayanqanchö imakunapa pasayanqampitam yachakushun. Pëkuna imapa pasayanqanta, tsëkunachö imata rurayanqanta y pëkunapita jövinkuna imata yachakuyanqantam rikäshun.

¿IMATATAN REY DAVIDPITA YACHAKUNTSIK?

3. Jövin kaqkunaqa, ¿imanötan edäna wawqi panikunata yanapëta puëdiyanman?

³ Davidqa jövinllaraq këkarmi wakinkunata yanapanampaq imëkata yachakurqan. Jehoväta alläpa kuyanqanqa clärum karqan. Jina müsica toquëtam yachakurqan. Y tsëta yachanqanwanmi rey Saulta yanaparqan (1 Sam. 16:16, 23). Tsënöllam jövinkunapis, yachayanqanwan congregacionchö yanapakuyta puëdiyan. Këllaman pensarishun, edäna wawqi panikunaqa alläpam agradecikuyan, tablëtankunachö y celularninkunachö Bibliata estudiayänampaq y reunionkunapaq preparakuyänampaq jövin kaqkuna yachatsiyanqampita. Tsëkunata utilicëta yacharqa wakinkunata yanapë.

4. ¿Imachötan jövinkunaqa Davidnö kayänan? (Jana qaranchö këkaq dibüjutawan rikäri).

⁴ Davidqa imata ruranqanchöpis confiakuypaqmi karqan. Këllata yarpärishun, wamrallaraq këkaptinmi üshankunata mitsinampaq papänin churarqan. Tsë sitiukunachö mitsikuy mantsanëpaq kaptimpis, pëqa üshankunata alli cuidanampaqmi kallpachakurqan. Atska watakuna pasanqanchönam rey Saulta kënö nirqan: “Teytäpa üshankunata mitsikaptï leonpis ösupis shamur, üshata apakuptinmi, taripëkur shimimpita qocheq kä” (1 Sam. 17:34, 35). Davidqa valienti karmi papänimpa üshankunata imëkapita cuidarqan. Tsënöllam imata rurayänampaq niyaptimpis jövinkunaqa alli cumpliyänan.

5. Bibliachö Salmus 25:14 ninqannö, ¿imata rurayänampaqtan jövinkunaqa mas kallpachakuyänan?

⁵ Jina Davidqa jövin kanqanllapitam Jehoväwan alli amïgu karqan. Y tsëtam, valienti kanqampita o arpata toquëta yachanqampitapis mas puntaman churarqan. Davidpaqqa Jehoväqa manam Diosninllatsu karqan, sinöqa amïgunmi (leyi Salmus 25:14). Jövinkuna, Jehoväwan alli amïgu kayänëkipaqmi masqa kallpachakuyänëki. Tsëta rurayaptikiqa, itsa congregacionchö maslla yanapakuyänëkipaqpis niyäshunki.

6. ¿Imatatan Davidpaq wakinkuna niyaq?

⁶ Davidqa imëkapam pasarqan. Jukqa karqan, pëpaq wakinkuna mana allita parlayanqanmi. Goliatwan pelyaq ëwëta munaptinmi, rey Saulqa “wamrallaraqmi kanki nir munarqantsu” (1 Sam. 17:31-33). Rey Saul manaraq tsëta niptinmi, wawqimpis confiakuypaq mana kanqanta nirqan (1 Sam. 17:26-30). Peru Jehoväqa Davidta alli reqirmi, tsënötsu rikaq. Y amïgun Jehovä yanapanampaq kaqman confiakurmi, Goliat-ta wanutsirqan (1 Sam. 17:45, 48-51).

7. ¿Imatatan David pasanqampita yachakunki?

⁷ ¿Imatatan Davidpita yachakunki? Pacienciayoq këtam. Itsa wamrallaraq kanqëkipita reqishoqnikikunaqa, wamratanöllaraq rikäyäshunki. Jehoväqa manam nunakuna rikäyäshunqëkinöllatsu rikäshunki. Pëqa allim reqishunki y musyanmi imakunata rurëta puëdinqëkita (1 Sam. 16:7). Tsënö kaptinmi, Jehoväwan alli amïgu kanëkipaq kallpachakunëki. Davidpis tsëtam rurarqan. Kamanqankunata rikar y tsëkunapita imata yachakunqankunaman pensarmi, pëwan mas amïgu tikrarqan (Sal. 8:3, 4; 139:14; Rom. 1:20). Jina valienti kanëkipaq Jehoväta mañakuy. Itsa Testïgu kaptiki estudiaq mayikikuna qampita burlakuyanman. Tsënö kaptinqa, alli tsarakunëkipaq Jehoväman mañakuy. Y Bibliapita, publicacionkunapita y videukunapita yachakunqëkinö kawanëkipaq kallpachakuy. Imachöpis Jehovä imanö yanapashunqëkita rikarqa, pëmanmi maslla confiakunki. Y Jehoväman confiakunqëkita rikarninqa, wakimpis qammanmi confiakuyanqa.

8, 9. (1) Gobernanampaq pacienciawan shuyaränampaqqa, ¿imatan Davidta yanaparqan? (2) ¿Imatatan Davidpita jövinkuna yachakuyan?

⁸ Ima maspa David pasanqanta rikärishun. Rey kanampaq Jehovä akrashqa kaptimpis, atska wataraqmi Judächö rey kanampaq shuyararqan (1 Sam. 16:13; 2 Sam. 2:3, 4). ¿Imatan yanaparqan pacienciawan shuyaränampaq? Imatapis mana rurar täkunampa rantin, israelïtakunata chikeq filistea nunakunawan pelyanqanmi. Tsënömi Judä markaman mana yëkuyänampaq cuidarqan (1 Sam. 27:1-12).

⁹ ¿Imatatan Davidpita yachakunki? Wawqi panikunatam puëdinqëkimannö yanapanëki. Wawqi Ricarduta ima pasanqanta rikärishun.b Pëqa wamrallaraq këkarmi precursor regular këta munarqan, peru mana puëdinampaq kaqtam pensarqan. Llakikunampa o qelanänampa rantinmi, Diospita maslla yachatsikunampaq churapakarqan. Pëmi kënö nin: “Diosta mas sirwinäpaq tiempu pasanqan alli kanqantam kananqa rikä. Pillapis Diospita yachakuyta munaptin, alli preparakuykur watukaq kutinäpaqmi churapakarqä. Tsëta rurarmi juk nunata Bibliapita yachatsir qallarqä. Y wayin wayin yachatsikurpis, manam mantsakoqnatsu kä”. Kananqa, creikoqkunata rikaqkunapa yanapaqnin y precursor regularmi Ricarduqa.

10. Chikeqninkuna familianta apakuyaptinqa, ¿imatatan David rurarqan?

¹⁰ ¿Ima maspatan David pasarqan? Juk kutichömi rey Saulpita ratakur o tsinkakur, Davidwan soldädunkunaqa familiankunata jaqïkur guërraman ëwayarqan. Tsëyaqmi chikeqninkunaqa wayinkunata ushakätsiyarqan y familiankunata apakuyarqan. Davidqa itsa unëpana pelyaq kar y alli soldädu kar, alli patsätsipakuykur familianta chikeqninkunapita salvanampaq kaqta pensanman karqan. Peru manam tsëtatsu rurarqan, sinöqa Jehovätam yanapanampaq mañakurqan. Tsëmi sacerdöti Abiatarwan Jehoväta kënö tapurqan: “¿Suwakoq amalequita nunakunapa qepanta ëwakü?”. Jehoväqa, ëwë y llapan apakuyanqantam kutitsimunki nirqanmi (1 Sam. 30:7-10). ¿Imatatan këpita yachakunki?

11. Imatapis manaraq akrarninqa, ¿imatatan ruranëki?

¹¹ Manaraq imatapis rurarnin yanapayäshunëkipaq wakinkunata mañakuy. Papänikikunawan y unëpana creikoqkunata rikar yanapakoq wawqikunawan parlë. Pëkunaqa shumaqmi consejayäshunki. Creikoqkunata rikaqkunataqa Jehovämi churashqa y pëkunamanmi confiakun. Tsënöllam qampis pëkunaman confiakunëki. Pëpaqqa, creikoqkunata rikaqkunaqa alläpa väleqmi kayan (Efes. 4:8). Pëkuna consejayäshunqëkita wiyakurnin y markäkoq o yärakoq kayanqampita yachakurninqa, alli kaqkunatam akranki. Kananqa rey Asäpita yachakurishun.

¿IMATATAN REY ASÄPITA YACHAKUNTSIK?

12. Gobernar qallanqan witsanqa, ¿imanö nunatan rey Asäqa karqan?

¹² Rey Asäqa, jövin karqa humildi y valientim karqan. Papänin Abïas wanuriptinmi pëna mandakur qallëkurqan, y llapan santukunata ushakätsiyänampaqmi mandakurqan. Y Judä nunakunatam nirqan, “unë kastankuna markäkuyashqan Teyta Diosta ashir leyninkunata y mandamientunkunata cumpliyänampaq” (2 Crön. 14:1-7). Tsëpitanam, Etiopïa markapita Zërah jutiyoq nuna juk millon soldädunkunawan Judäta ushakätsita munaptin, Asäqa Jehovä yanapëkunampaq kënö rogakurqan: “Teyta Dios, atska soldäduyuq karpis o wallka soldäduyuq karpis qam yanapamaptikiqa vencishaqmi. Tsëmi qamllaman markäkur conträkunawan pelyaq shutikichö shayämurqü”. Tsënö mañakunqanmi rikätsikun, pëta y markanta Jehovä yanapanampaq kaqman Asä markäkunqanta o yärakunqanta. Jehoväman confiakuptinmi pëqa Etiopïa nunakunata vencinampaq yanaparqan (2 Crön. 14:8-12).

13. ¿Imatan rey Asäta tsëpita pasarqan, y imanir?

¹³ Juk millon soldädukunawan pelyëqa, manachi Asäpaqqa fäciltsu karqan. Peru Jehoväman confiakurninmi Etiopïa soldädukunata ushakätsirqan. Tiempuwannam, Israelpa mana alli reynin Baasä Judäta ushakätsita munaptin, Asäqa alläpa mantsakarqan. Tsëmi Jehoväta yanapëkunampaq mañakunampa rantin, Siriapa reyninta mañakurqan. Tsëta ruranqampitam mana allikunapa pasarqan. Jehovämi willakoqnin Hananïwan, kënö nirqan: “TEYTA DIOSMAN mana markäkushpa ¿imanirtaq Siria nacionpa reyninman markäkurqunki? Kananpitaqa tsë reyta manam imëpis vencinkinatsu”. Tsë witsampitam rey Asäqa, guërrallachö imëpis këkarqan (2 Crön. 16:7, 9; 1 Rëy. 15:32).

14. (1) ¿Imanötan Jehoväman confiakunqëkita rikätsikunkiman? (2) 1 Timoteu 4:12 ninqannö, ¿imanötan Jehovä y wawqi panikuna rikäyäshunki Jehoväman confiakuptikiqa?

¹⁴ ¿Imatatan Asäpita yachakunki? Humildim kanëki y Jehovämanmi confiakunëki. Tsëraq bautizakurninqa Jehovämanmi markäkurqëki o yärakurqëki, y Jehoväqa sirweqnin kanëkipaqmi kuyëllapa chaskishurqëki. Tsëmi Jehovä yanapashunëkipaq kaqman confiakur sïguinëki. Kushikunëkipaq imatapis rurar, imachö trabajanëkipaq kaqta rikar y imata ruranëkipaq kaqta akrarpis, Jehovätam cuentachö katsinëki. Biblia ninqanta ashi y yachakunqëkimannö imatapis rurë (Prov. 3:5, 6). Tsëta ruraptikiqa, Jehovämi kushikunqa y wawqi panikunapis respetayäshunkim (leyi 1 Timoteu 4:12).

¿IMATATAN REY JEHOSAFATPITA YACHAKUNTSIK?

15. 2 Crönicas 18:1 a 3 y 19:2 ninqannöpis, ¿ima mana allikunatatan rey Jehosafat rurarqan?

¹⁵ Llapantsikmi jutsata ruraq kantsik, tsëmi imallachöpis pantantsik. Peru tsërëkurqa llapan puëdinqëkimannö Diosta sirwitaqa manam jaqinëkitsu. Këllaman yarpärishun, rey Jehosafatqa alli nunam karqan. Gobernar qallanqampitam, papäninnölla Diospa mandamientunkunata cäsukurqan. Y Judä markachö Diospita yachatsikuyänampaqmi yanapaqninkunatapis mandarqan (2 Crön. 17:4, 7). Peru alli kaqta rurëta munarpis, höraqa mana allitam rurarqan. Tsëta ruranqampitam Jehoväqa juk sirweqninwan corregirqan (leyi 2 Crönicas 18:1-3; 19:2). Rey Jehosafatpita imata yachakuyta puëdinqëkita rikärishun.

16. Rajeevta pasanqampitaqa, ¿imatatan yachakunkiman?

¹⁶ Pillapis consejashuptikiqa, wiyakunëkim y nishunqëkitam ruranëki. Mëtsikaq jövinkunapaqmi, Jehoväta sirwita puntaman churëqa fäciltsu. Itsa qampis tsëpa pasëkanki, peru ama qelanëtsu. Wawqi Rajeevta pasanqanman pensë. Wamra kanqanta yarparmi kënö nin: “Wamra karqa, manam imata ruranäpaq kaqpita segürutsu karqä. Reunionkunaman y Diospita yachatsikoq ëwanäpa rantinmi, wakin jövinkunatanölla pukllë y fiestakunaman ëwë masqa gustamaq”. ¿Imatan yanaparqan? Creikoqkunata rikaq juk wawqi shumaqlla consejanqantam willakun. Kënömi nin: “Diospa Palabranchö 1 Timoteu 4:8 ninqanman yarpachakunäpaqmi nimarqan”. Rajeevqa tsë consëjuta shumaqmi chaskikurqan. Y imakunata mas puntaman churanampaq kaqmanmi yarpachakurqan. Kënömi nin: “Jehovä Diosta sirwitam mas puntaman churarqä”. Tsënö ruranqan imanö yanapanqantam kënö willakun: “Tsë wawqi consejamanqampita tiempu pasariptinqa creikoqkunata rikaqkunata yanapaq kanäpaqmi churayämarqan”.

JÖVIN, JEHOVÄQA SIRWIPTIKI KUYASHUNKIM

17. Jövinkuna Jehoväta sirwiyaptin, ¿imatatan mayor kaqkuna pensayan?

¹⁷ Jövin, congregacionchö mayor wawqikunaqa pëkunawan juntu Jehoväta sirwinqëkipitam kushikuyan (Sof. 3:9). Niyäshunqëkita kushishqa ruraqta rikäyäshurnikim kushikuyan. Y respetayäshurnikim qamman markäkuyan (1 Juan 2:14).

18. Proverbius 27:11 ninqannö, ¿ima nintan Jehoväqa sirweqnin jövinkunapaq?

¹⁸ Jehovä kuyashunqëkita y qamman confiakunqantaqa ama imëpis qonqëtsu. Jehoväqa willakurqannam kanan witsan mëtsika jövinkuna sirwiyänampaq kaqta (Sal. 110:1-3). Pëqa musyanmi kuyarnin sirwita munanqëkita. Tsëmi pacienciakoq kanëki wakinkunawan y kikikiwampis. Ima mana allitapis rurarninqa, consejayäshunqëkita y corregiyäshunqëkita chaskikuy. Tsënömi Jehoväqa yanapëkäshunki (Heb. 12:6). Imachöpis yanapakunëkipaq niyäshuptikiqa alli rurë. Y masqa, sirwinqëkirëkur Jehovä kushishqa kanampaq kallpachakuy (leyi Proverbius 27:11).