AMA CHIKIKOQ KASHUNTSU

1 | Llapankunata igualpa rikäshun

Bibliachömi nin:

“Diosqa llapantapis igualpa rikanqanta, y më nacionchöpis pëta mantsaqta y alli kaqta ruraqtaqa, pë chaskinqanta” (HËCHUS 10:34, 35).

¿Ima ninantaq tsëqa?

Jehoväqaa manam juk nacionpita, juk color y juk costumbriyoq kanqantsikpita juzgamantsiktsu. Tsëpa rantinqa, imanö kanqantsikta y imanö pensanqantsiktam mas rikan. Bibliachömi kënö nin: “Noqaqa manam shumaqllallan kanqanpitatsu pitapis akrä, sinöqa alli shonquyuq kanqanpitam” (1 Samuel 16:7).

Këta rurë:

Nunakuna shonqunkunachö imanö kayanqanta musyëta mana puëdirpis, Jehovänömi llapankunata igualpa rikëta puëdintsik. Manam llapankunatsu igual kayan, tsëmi wakinkuna mana alli portakuyaptinqa llapankuna tsënö kayanqanta pensashwantsu. Pitapis juk color o juk nacionpita kanqanrëkur chikinqantsikta cuentata qokurirqa, Diosman mañakushun llapankunata igualpa rikänapaq y chikikoq kanqantsikta shonquntsikpita jipinampaq (Salmus139:23, 24). Jehovä Dios yanapamänapaq kaqman confiakushun (1 Pëdru 3:12).

a Jehoväqa Diospa jutinmi (Salmus 83:18).

“Manam imëpis juk yuraq nunawanqa tranquïlu y juntu mikurnin täkushqatsu karqä […]. Kananqa entëru Patsachö Testïgukunawanmi juk familianö kawakü” (TÏTUS).

Imanö cambiayanqanta willakuyanqan (TÏTUS)

Chikikoq këtam dejarqan

Yana color nunakunata sufritsiyanqanta rikäyänampaqmi gobiernukunaqa leykunata patsätsiyarqan, tsëmi Tïtusqa alläpa cölerarqan, y juk grüpu maqakoq nunakunawanmi juntakarqan. Pëmi willakun: “Yana color nunakunata mana chaskiyanqan hotelkunaman y cantïnakunaman ëwëkurmi, yuraq color nunakunawan pelyata ashiyaq kayä”. Tïtusqa alläpa chikikunqantam nin. Kikinmi kënö nin: “Piwampis pleyturqa ollqu o warmi kaptimpis noqam puntata maqaq kä”.

Jehoväpa testïgunkunawan Bibliapita yachakurmi Tïtusqa cambiarqan. Awmi, Bibliata leyinqanmi alläpa yanaparqan. Shumaq Patsachö imanö kawakunapaq kaqta musyanqanmi Tïtustaqa alläpa gustarqan. Bibliachömi kënö nin: “Wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu” (Revelacion 21: 3, 4).

Qallananllachöqa Tïtuspaqqa manam fäciltsu karqan pitapis manana chiki. Y kikinmi kënö nin: “Imanö pensanqäta y imanö kanqäta cambiëqa manam fäciltsu karqan”. Dios llapantapis igualpa rikanqanta Hëchus 10:34, 35 leyinqanmi Tïtustaqa alläpa yanaparqan.

¿Imatan tsëpitaqa pasakurqan? Titusmi kënö nin: “Nunakuna ima color kayaptimpis Jehoväpa testïgunkuna rasumpa kuyanakuyanqanta rikanqämi yanapamarqan, pëkuna rasumpa religionchö kayanqanta musyanäpaq. Y manaraq bautizakuptïmi yuraq color këkarpis juk Testïgu wayinman mikoq invitamarqan, tsëqa mana creipaqmi karqan. Noqaqa manam imëpis juk yuraq nunawanqa tranquïlu y juntu mikurnin täkushqatsu karqä, y mënus wayinchö. Kananqa entëru Patsachö Testïgukunawanmi juk familianö kawakü”.