2 | “Teyta Diospa Palabran shoqamashqa”

BIBLIACHÖMI KËNÖ NIN: “Puntallapitana qellqashqa kaqkunaqa, noqantsik yachakunapaqmi qellqashqa kayarqan, tsënöpa alli tsarakur y Teyta Diospa Palabran shoqamashqa, shamoq tiempuchö Diospita chaskinapaq kaqta shuyarar këkänapaq” (ROMÄNUS 15:4).

¿Ima ninantan tsëqa?

Bibliachö ninqankunaqa shoqamantsik, alli tsarakunapaq kallpayoqta tikratsimantsik y mana imapaqpis välinqantsikta mana pensanapaqmi yanapamantsik. Y llakikunqantsikkuna ichikllachöna ushakänampaq kaqta y manana yarpänapaq kaqtam änimantsik.

¿Imanötan yanapamantsik?

Höraqa llapantsikpis llakikuntsikmi, peru depresion qeshyawan kaqkunaqa cada junaq llakishqalla karmi alliraq kallpachakuyänan. ¿Imanötan Bibliachö ninqankunaqa yanapanman?

Bibliachö ninqankunaqa alli kaqkunaman pensanapaqmi yanapamantsik (Filipensis 4:8). Awmi, Bibliachö ninqanqa yamë këta tarinapaq, tranquïlu kanapaq y controlakunapaqmi yanapamäshun (Salmus 94:18, 19).
Bibliachö ninqankunaqa imapaqpis mana väleqnö sientikunqantsik höram yanapamäshun (Lücas 12:6, 7).
Bibliachö unë Diospa sirweqninkunapita yachakunqantsikmi rikätsimantsik japallantsik mana këkanqantsikta, y Teyta Diosnintsik Kamamaqnintsik kar imanö sientikunqantsikta alli musyanqanta (Salmus 34:18; 1 Juan 3:19, 20).
Teyta Diosqa Palabran Bibliachömi änimantsik kanan tiempu llapan llakitsimaqnintsikkunata manana yarpänapaq kaqta (Isaïas 65:17; Apocalipsis 21:4). Yarpachakurnin llakikunqantsik höram Dios änimanqantsikkunaqa alli tsarakunapaq yanapamäshun.

Bibliachö këkaq consëjukunaqa, ¿imanötan Jëssicata yanapashqa?

Imapa pasanqan

Kënömi nin: “Veinticincu watayoq këkarmi illaqpita nerviösa tikrar y shütëta mana puëdir imanö këta puëdirqätsu, tsëmi depresion qeshyawan kanqäta niyämarqan. Mana allikunapa pasanqäkunatam illaqpita yarpakurkü, tsëkunaman manana pensëta munarpis manam puëdïtsu, tsëmi alläpa sufrï. Doctorkunam niyämarqan unë mana allikunapa pasashqa karnin imëkata mantsanqäta y imëkapaqpis alläpa yarpachakunqäta, tsënöpa depresion qeshyawan këkanqäta. Tsëmi alliyänäpaqqa jampikunata upunä karqan y tsë depresion qeshyata rikaq doctorkunawanmi parlanä karqan”.

Bibliachö consëjukunam yanapaman

“Alläpa llakikunqä höram imanö këta puëdeqtsu kä, y alläpa yarpachakurmi punuytapis puëdeqtsu kä. Tsëmi paqaskunapa imëkapaq yarpachakur alläpa llakikoq kä. Peru Salmus 94:19 textuchö ninqannöpis, Teyta Diosqa alläpa yarpachakur imanö këtapis mana puëdishqam shoqamantsik. Tsëmi cämä lädunchö juk Biblia y textukuna qellqanqä cuadernü kapamarqan, tsëmi animamaq. Mana punuyta puëdirmi Palabranwan Teyta Dios shoqamänanta dejaq kä.

Bibliachömi nimantsik Teyta Diospita yachakunqantsikpa contran pensëkunata mana pensanapaq. Unëqa pensarqä mana imapaqpis sirwinqäta, y pipis mana kuyamanqantam. Peru cuentatam qokurqä tsënö pensëqa Bibliachö ninqampa contran kanqanta. Bibliachöqa Diosnintsik kuyakoq Teyta kanqanta y llakipäkoq kar cada ünupaq yarpachakunqantam nin. Ichikllapa ichikllapam kikïna pensënïkunata controlaq kä y manam pensanqäkunanatsu controlamarqan. Teyta Dios rikämanqannö rikäkunäpaqmi yachakurqö. Tsëmi yanapamashqa mana imapaqpis sirweqnö manana sientikunäpaq.

Alläpam munëkü mana alli pensëkuna y mana alli pasamanqantsikkunata manana yarpänapaq tiempu chämunanta. Shamoq tiempuchöqa alläpa llakikuy qeshyaqa ushakanqam, y tsëta musyanqämi yanapaman qeshyarpis tsë junaq chämunqanyaq alli tsarakunäpaq”.