3 | Bibliachö Diospa sirweqninkunapaq willakunqan

BIBLIACHÖMI KËNÖ NIN: “Noqantsiknö sentimientuyoq nunam” kayarqan (SANTIÄGU 5:17).

¿Ima ninantan tsëqa?

Bibliachöqa willakun warmipis ollqupis imëka yarpachakuykunapa y llakikuykunapa pasayanqantam. Pëkunapaq Bibliachö ninqanta leyirqa tarishunmi mëqampis noqantsiknö pasashqa kayanqanta.

¿Imanötan yanapamantsik?

Llapantsikmi pillapis entiendimänata necesitantsik y masran llakikurnin qeshyanqantsik höranäqa. Bibliachö Diospa unë sirweqninkuna imanö sientikuyanqanta y pensayanqanta leyirqa, cuentatam qokushun noqantsikpis pëkunanö sientikunqantsikta. Këmi rikätsimantsik noqantsiklla mana llakikunqantsikta, yarpachakunqantsikta y mana allikunata pensanqantsikta.

Bibliachömi willamantsik Diosta wakin sirweqkunapis llakikurnin imanö këta mana puëdiyanqanta y kallpannaq sientikuyanqanta. Imëllapis nirqunkiku, “manam aguantänatsu y kënöqa manam kawëta munänatsu” nir. Tsënömi Moises, Elïas y Davidpis sientikuyarqan (Nümerus 11:14; 1 Rëyes 19:4; Salmus 55:4).
Bibliachömi nin Änaqa qolloq kanqanta y nunampa o runampa juknin kaq warmin pëpita alläpa burlakuptin alläpa llakikunqanta (1 Samuel 1:6, 10).
Capaz Bibliachö willakunqan Job nunanö qampis sientikunki. Jobqa Diosman alläpa markäkoq o yärakoq karpis, alläpa llakikurmi kënö nirqan: “Kawënïta melanarmi kawëtapis munänatsu” (Job 7:16).

Kë nunakunaqa mana alli pensayanqantam cambiayarqan. Noqantsikpis pëkunapita yachakurqa mana alli pensanqantsikkunata cambiëta puëdishunmi.

Bibliachö këkaq consëjukunaqa, ¿imanötan Këvinta yanapashqa?

Imapa pasanqan

Kënömi nin: “Cäsi cincuenta watayoq këkaptïmi transtorno bipolar qeshyawan këkanqäta niyämarqan. Höraqa imëka rurëta puëdinqätam pensä, peru höranam mana imapaqpis välinqäta pensar wanuytapis munä”.

Bibliachö consëjukunam yanapaman

“Apostol Pëdru sientikunqannömi sientikü. Pëdruqa mana allikunata ruranqampitam imapaqpis mana väleqnö sientikurqan. Peru, mana allikunata ruranqanman yarparäkunampa rantinmi amïgunkunata ashirqan yanapayänampaq. Transtorno bipolar qeshyawan karmi höraqa alli këkar illaqpita mana allina këkä. Y tsë junaqkunaqa mana allita ruranqäkunallaman yarparmi imapaqpis mana välinqäta pensä. Peru, apostol Pëdrunömi mana alli sientikunqä höra amïgükunata ashï yanapayämänampaq. Pëkunam alli tsarakunäpaq yanapayäman.

Gobernanti David imanö sientikunqanmampis pensämi. Davidqa pasanqankunapita y mana alli ruranqanta yarparmi alläpa llakikoq. Höraqa noqapis mana allita ruranqäkunapita o mana alli parlanqäkunapitam Davidnö llakikü. Tsëmi David qellqanqan Salmus 51 kaq capïtulunta leyinqä yanapaman. 3 kaq versïculuchömi kënö nirqan: ‘Jutsa ruranqätaqa allim musyä y manam qonqëtapis puëdïtsu’. Tsënömi llakishqa kanqä höra sientikü, y imatapis alli ruranqäkunaman pensëqa manam noqapaq fäciltsu. Peru tsë höram 10 kaq versïculuchö David ninqanman yarpäri, kënömi nin: ‘Limpiu shonquyoq kanäpaq yanapëkallämë, imëpis cäsukoq kanäpaq yanapëkallämë’. Tsënöllam Teyta Diosta mañakü ruranqäkunapita kushishqa kanäpaq. Y 17 kaq versïculunam alli sientikunäpaq yanapaman, kënömi nin: ‘Shonqunkunachö llakikoqkunataqa manam despreciankitsu’. Tsëta cada leyirmi Jehovä kuyamanqanta yarpä.

Bibliachö nunakunapita yachakunqä y Dios noqapaq imëkata ruranqanta yarpanqämi Jehoväman mas markäkunäpaq o yärakunäpaq yanapaman. Y Dios änikunqankuna rasumpa cumplikänampaq kaqman creinqämi aguantanäpaq yanapaman”.