Yanapamänantsikpaq anciänukunata willashun

1. ¿Imatataq Jehovä rurashqa sirweqninkunata alläpa kuyarnin?

JEHOVÄQA sirweqninkunata alläpam kuyan, tsëmi üshankunata juk alli mitsikoq cuidanqannö sirweqninkunata cuidan. Sirweqninkunataqa Jesuspa yawarninwanmi rantishqa y anciänukunatam cuidayänampaq churashqa (Hëch. 20:28). Diosnintsikqa munan sirweqninkunata anciänukuna shumaq cuidayänantam. Tsëmi anciänukunaqa, Jesus mandakunqanta cäsukurnin Diosnintsikpa sirweqninkunata animayan y sirwir sïguiyänampaq yanapayan (Is. 32:1, 2).

2. ¿Pikunapaqtan Jehoväqa mas yarpachakun? (Ezequiel 34:15, 16).

² Jehoväqa llapan sirweqninkunapaqmi yarpachakun, peru masqa mana allikunata rurarir llakishqa këkaqkunapaqmi. Tsëmi mana allikunata rurarir llakishqa këkaqkunata yanapayänampaq anciänukunata churamushqa (leyi Ezequiel 34:15, 16). Tsëqa, ¿imatataq rurashwan? Diosnintsikqa munan pëman mañakunantsikta y anciänukunata willanantsiktam (Efes. 4:11, 12).

3. ¿Imanötan këchö yachakunqantsikqa llapantsikta yanapamäshun?

³ Këchöqa yachakushun mana allikunata rurarir llakikushqa, anciänukunawan Diosnintsik imanö yanapamanqantsiktam. Kë tapukuykunatam contestashun: ¿imëtan anciänukunata willashwan?, ¿imanirtan anciänukunata willashwan? Y ¿imanötan anciänukuna yanapamantsik? Këchö yachakunqantsikkunaqa Diospa kaqchö alli këkaqkunatapis yanapanqam. Yanapamäshunmi anciänukunata Jehovä churamunqanta maslla valoranapaq y yanapamänata wanarqa mana mantsakushpa anciänukunata willanapaq.

¿IMËTAN ANCIÄNUKUNATA WILLASHWAN?

4. Santiägu 5:14 a 16, 19 y 20 versïculukunachö ‘qeshyëkan’ nirqa, ¿rasumpa qeshyëkaqkunapaqku parlëkan? (Fötukunata rikäri).

⁴ Discïpulu Santiägum entienditsikurqan anciänukunawan Jehovä imanö yanapamanqantsikta. Kënömi nirqan: “¿Qamkunachö pillapis qeshyëkanku? Tsëqa, anciänukunata qayatsun” (leyi Santiägu 5:14-16, 19, 20). ‘Qeshyëkaq’ nirqa, Santiäguqa manam rasumpa qeshyëkaqpaqtsu parlëkarqan, sinöqa Diosnintsikwan yapë amïgu këta wanëkaqkunapaqmi. ¿Imanötan tsëta musyantsik? Santiäguqa manam doctorkunata qayatsun nirqantsu, sinöqa “anciänukunata qayatsun” nirqanmi. Tsënöllam nirqan jutsankunata Diosnintsik perdonariptin tsë qeshyëkaq nuna alliyärinqanta. Qeshyarninqa imanö sientikunqantsiktam doctorta willantsik y nimanqantsiktam rurantsik. Tsënöllam Dioswan yapë amïgu këta munarpis anciänukunata imanö sientikunqantsikta willanantsik y Bibliawan consejamanqantsikkunata cäsukunantsik.

5. ¿Imanötan musyashwan Diosnintsikpa rikëninchö imanö këkanqantsikta?

⁵ Santiägu librupa 5 kaq capïtulunqa nikämantsik Diosnintsik munanqannö mana sirwikanqantsikta cuentata qokurqa, yanapamänantsikpaq anciänukunata willanapaqmi. Peru anciänukunata willanapaqqa, manam mana allikunata rurëman ishkïtaraqqa shuyaränantsiktsu. Tsëpa rantinqa, jutsa rurëman manaraq ishkirmi yanapamänantsikpaq willakunantsik. Bibliachöqa clärum nimantsik Diosnintsikwan imanö këkanqantsikta alli cuidanantsikpaq. Capazchi höraqa, Jehoväpa rikëninchö mana alli këkarnimpis pensashwan alli këkanqantsikta (Sant. 1:22). Tsëmi pasarqan unë Sardis congregacionchö cristiänukunatapis. Pëkunaqa pensayarqan Diospa rikëninchö alli këkäyanqantam, peru Jesusqa nirqan mana alli këkäyanqantam (Apoc. 3:1, 2). ¿Imanötan musyashwan Diosnintsikpa rikëninchö imanö këkanqantsikta? Tsëpaqqa bautizakunqantsik witsan Diosnintsikta imanö sirwinqantsiktawanmi kanan witsan sirwikanqantsikta igualatsinantsik (Apoc. 2:4, 5). Y kënömi pensanantsik: “¿Kanampis unënöllaku Bibliäta leyi y leyinqäkunaman pensä? ¿Llapan reunionkunamanku ëwä y alliku preparakü? ¿Kanampis unënöku yachatsikoq seguïdu yarqü? ¿O juk cösaskunata rurëku, pukllëku o imëkayoq këku mas gustaman?”. Kë tapukuykunata contestanqantsikwanmi musyashun imanö këkanqantsikta. Y mana corregikurqa, mas peormanmi chäshun. Kikintsiklla corregikuyta mana puëdir o Jehovä chikinqankunata rurashqana karqa, anciänukunatam willanantsik yanapamänantsikpaq.

6. Juk cristiänu jutsata rurashqa karqa, ¿imatataq ruranman?

⁶ Wakin cristiänukunaqa alläpa jutsatam ruraskiyan, y mana arrepentikuyaptinqa congregacionpitam rakita puëdiyan. Tsënö jutsata ruraq cristiänuqa anciänukunatam willanan (1 Cor. 5: 11-13). Tsë cristiänuqa Dioswan amishtanampaqmi yanapayänanta wanan, tsëmi willakunan. Jehovä Diosnintsikqa tsë cristiänuta perdonanqa arrepentikunqanta ruranqankunawan rikätsikuptinran (Hëch. 26:20). Y juk formapaqa arrepentikushqa kanqanta rikätsikunqa anciänukunata rasumpa kaqta willarmi.

7. ¿Pikuna mastan wanayan anciänukuna yanapayänanta?

⁷ Anciänukunaqa manam jutsata rurashqakunallatatsu yanapayan, sinöqa mana alli munëninkunata vencita mana puëdeqkunatapis yanapayanmi (Hëch. 20:35). Këllaman pensarishun: capazchi manaraq Testïgu karqa drögata shoqurqëki, pornografïata rikarqëki o jukwan jukwan kakurqëki. Y tsë rurëkunataqa capazchi kanampis rurëta munankiraq. Tsëqa capazchi pensanki tsë munënikikunata vencita mana puëdinëkipaq kaqta. Tsënö kaptinqa, confiakunqëki anciänutam imanö sientikunqëkita cuentanëki. Tsë anciänum consejashunki imata ruranëkipaq kaqta, y yarpätsishunkim jutsa rurëman mana ishkiptikiqa Diosnintsik imëpis kuyashunqëkita (Ecl. 4:12). Mana allikunata rurëta munanqëkirëkur mana alli sientikuptikiqa, anciänukunam yarpätsiyäshunki Jehoväta rasumpa kuyarnin tsënö sientikunqëkita y kikikillaman mana confiakunqëkita (1 Cor. 10:12).

8. ¿Llapan pantanqantsiktaku anciänukunata willashwan?

⁸ Tsënö kaptimpis, manam llapan pantanqëkitatsu anciänukunata willanëki. Këllaman pensarishun: capaz juk wawqita o juk panita ofendirinkiman o pëkunawan alläpa cölerakunkiman. Tsënö pasakuptinqa, anciänukunata willanëkipa rantinmi Jesus consejakunqanta cuentaman churëkur tsë problëmata arreglanëki (Mat. 5:23, 24). Tsënöllam yachanëpaq kanëkipaq, pacienciakoq kanëkipaq y controlakuyta yachanëkipaq publicacionnintsikkunachö consëjukunata ashinëki. Peru tsëkunata rurëkarpis mejorëta mana puëdirqa, juk anciänutam willankiman yanapashunëkipaq. Apostol Pablupis, Filïpus cristiänukunaman cartakunqanchömi juk wawqita nirqan Evodiatawan Sintiquita yanapanampaq. Tsënöllam qamtapis juk anciänu yanapashunki (Filip. 4:2, 3).

¿IMANIRTAN ANCIÄNUKUNATA WILLASHWAN?

9. ¿Imanirtan penqakuykarpis jutsata ruranqantsikta anciänukunata willashwan? (Proverbius 28:13).

⁹ Mana alli munënintsikkuna vencimënintsikta munaptin o jutsata rurashqana karqa, penqakuykarpis anciänukunatam willanantsik. Y tsëta ruranapaqqa valientim kanantsik y Jehovä Diosnintsikmanmi confiakunantsik. Yarpänantsikmi kushishqa y alli sirwinantsikpaq anciänukunata Jehovä churamushqa kanqanta. Tsëmi yanapamänantsikpaq anciänukunata willanantsik. Pëkunata willarqa Jehoväman y mandakunqankunamanmi confiakuntsik, mana alli munënintsikta vencinapaq Jehovä yanapamänapaq kaqmanmi confiakuntsik (Sal. 94:18) y arrepentikushqaqa Jehovä perdonamänapaq kaqmanmi confiakuntsik (leyi Proverbius 28:13).

10. ¿Imatan pasamashwan jutsata rurarir mana willakushqa?

¹⁰ Yachakurinqantsiknöpis, yanapamänantsikpaq anciänukunata willanqantsikqa alläpa allim. Peru jutsata rurarir pakarätsikurqa o mana willakurqa, mas mana allimanmi chäshun. Pensarishun gobernanti Davidman. Pëqa jutsata rurarirmi willakurqantsu, tsëmi Diosnintsikpa rikëninchö mana alli këkanqanta musyarnin alläpa llakikurqan y qeshyarqan (Sal. 32:3-5). Imanömi accidentäkurir tiempunchö mana jampikurqa mas peorantsik, tsënöllam jutsata rurarir mana willakurpis mas sufrishun. Tsëta musyarmi Jehovä Diosnintsikqa corregikunantsikta munar anciänukunata willanantsikpaq nimantsik (Is. 1:5, 6, 18).

11. ¿Ima mastan pasakunman jutsata ruranqantsikta mana willakushqa?

¹¹ Jutsata rurarir mana willakushqaqa, wakinkunapaqpis mana allim kanqa. Jehovä Diosnintsikqa manam congregacionnintsikchö wawqi panikunata santu espïritunwan yanapanqanatsu y manam kushishqa kawakuyta puëdiyanqanatsu (Efes. 4:30). Y ¿imatataq rurashwan juk wawqi o juk pani jutsata rurashqa kanqanta musyarqa? Anciänukunata willanampaqmi ninantsik. Y ¿mana willakuptinqa? Juk tiempupa shuyärirmi, anciänukunata kikintsik willanantsik, tsëta ruranatam Jehoväqa munan. Peru mana willakurqa, jutsata ruranqampitam noqantsikpis culpayoq kashun (Lev. 5:1). Jehoväta rasumpa kuyarqa, rasumpa kaqtam willakushun. Tsëta rurarqa, congregacionnintsik limpiu kanampaqmi yanapakuntsik, y jutsa ruraqtapis Jehoväwan yapë amïgu kanampaqmi yanapëkantsik.

¿IMANÖTAN ANCIÄNUKUNA YANAPAMANTSIK?

12. ¿Imanötan anciänukunaqa Diosnintsikta sirwiyanqanchö mana alli këkaqkunata yanapayan?

¹² Bibliachöqa anciänukunata mandan Diosnintsikta sirwiyanqanchö mana alli këkaq wawqikunata y panikunata yanapayänampaqmi (1 Tes. 5:14). Jutsata rurashqa karqa, Jehovätam llakitsirqunki. Tsëmi anciänukunaqa yanapayäshunëkipaq imata pensanqëkita y imanö sientikunqëkita musyëta munar yachëllapa tapupäyäshunki (Prov. 20:5). Pëkuna tapupäyäshuptikiqa penqakuykarpis llapantam willanëki, tsëmi pëkunapaq mas fäcil kanqa yanapayäshunëkipaq. Manam pensanëkitsu parlakuyta mana yachanqëkita y ninqëkikuna mana alli kanampaq kaqta (Job 6:3). Anciänukunaqa manam juzgayäshunki. Tsëpa rantinqa, imanö kanqanta alli entiendiyänampaq y shumaq consejayäshunëkipaqmi ninqëkita shumaq wiyayäshunki (Prov. 18:13). Pëkunaqa allim musyayan wawqikunata o panikunata yanapëqa tiempupaqraq kanqanta. Y höraqa atska kutiran tsë wawqiwan o paniwan parlayanqa.

13. ¿Imanö mastan anciänukuna yanapamantsik? (Fötukunata rikäri).

¹³ Anciänukunaqa kuyëllapam parlapäyäshunki y manam llakitsiyäshunkitsu, tsëpa rantinqa qampaqmi Jehovä Diosnintsikman mañakayämunqa. Diosnintsikman mañakayämunqan imanö yanapashunqëkita cuentata qokurqa allim sientikunki. Tsënöllam anciänukunaqa, “Teyta Jehoväpa jutinchö aceitiwan” llushiyäshunki (Sant. 5:14-16). ¿Imatan tsë aceitiqa? Teyta Jehoväpa Palabranmi. Anciänukunaqa alli sientikunëkipaq y Teyta Jehoväpa amïgun yapë kanëkipaqmi Bibliawan shumaq consejayäshunki y consolayäshunki (Is. 57:18). Tsë consëjukunam alli kaqkunata ruranëkipaq yanapashunki. Tsënö consejayäshuptikiqa, Jehovä Diosnintsik kënö nikäshunqëkitanömi sientinki: ‘Këmi näniqa, këpa ëwë’ (Is. 30:21).

14. Gälatas 6:1 ninqannö, ¿imanötan anciänukunaqa ‘mana alliman chëkaqkunata’ corregiyan? (Fötukunata rikäri).

¹⁴ (Leyi Gälatas 6:1). Kë versïculuchöqa nin, pipis “mana alliman chëkaptinqa” anciänukuna corregiyänampaqmi. Mana alliman chëkan nirqa entienditsikun Jehovä Dios mandakunqankunata mana cäsukuyanqampaqmi. Juk parlakuychöqa, capaz imatapis shumaq mana pensar rurariyanman o alläpa jutsata rurariyanman. Tsënö kaptinqa, anciänukunam kuyëllapa y shumaqlla tsë wawqita o panita corregiyänan. Peru ¿ima ninantan ‘corregi’ o nötanchö ninqannöpis ‘kutitsi’ neq palabraqa? Tsë palabrakunapaqqa griëgu idiömachö entienditsikun sitiumpita yarqushqa tulluta o pakishqa tulluta sitiunman kutitsipaqmi. Imanömi juk doctor pakishqa tulluta o sitiumpita yarqushqa tulluta kutitsirqa alläpa mana nanatsishllapa shumaqlla kutitsin, tsënömi anciänukunapis pitapis corregirqa alläpa mana llakikunampaq kuyëllapa corregiyan. Tsënöllam Bibliachöqa anciänukunata mandan pitapis corregirqa, kikinkunapis ‘cuidakuyänampaq’; anciänukunaqa jutsasapa karmi höraqa mana allita rurariyanman. Tsëmi jutsa ruraqta corregiyanqan höraqa penqakatsiyänantsu ni yachaq tukuyänantsu, tsëpa rantinqa humildim kayänan y kuyëllapam corregiyänan (1 Pëd. 3:8).

15. Ima problëmapapis pasarqa, ¿imatataq rurashwan?

¹⁵ Congregacionnintsikchö anciänukunamanqa confiakunantsikmi. Pëkunaqa manam willanqantsikkunata jukkunata cuentayanqatsu, y Bibliawan consejamänantsikpaqmi alli yachakuyashqa. Tsënöllam imanö këkanqantsiktapis alkäbu këkäyanqa (Prov. 11:13; Gäl. 6:2). Rasunmi, anciänukunaqa jukläya jukläyam kayan y wakinkunaqa mas tiempupanam anciänu kayan. Tsënö kaptimpis, problëmakunapa pasarqa mëqanwampis parlëta puëdintsikmi. Peru gustamanqantsiknö mana consejamashqaqa, ¿jukta juktatsuraq anciänukunata willarnin purishwan? Tsëqa manam allitsu kanman. Tsëta rurarqa, munanqantsikllatam ashikashwan y manam Diospa Palabranwan consejamanqantsiktaqa chaskikuykashwantsu (2 Tim. 4:3). Juk anciänuta problëmantsikta willashqaqa, capazchi kënö tapumäshun: “¿Mëqan anciänuwampis tsë asuntupaq parlarqunkinaku? ¿Imatataq nishurqunki?”. Y capazchi manaraq consejamarnintsik willëkanqantsik asuntupaq juk anciänutaraq tapurita munanqa, tsëtaqa humildi karmi ruranqa (Prov. 13:10).

¿IMATATAQ CADA ÜNU RURANANTSIK?

16. ¿Imatataq cada ünu ruranantsik?

¹⁶ Anciänukunaqa cuidamarnintsik y consejamarnintsikpis manam imata o imanö ruranapaq kaqtaqa nimäshuntsu, tsëtaqa cada ünum decidinantsik. Jehoväta kuyarqa y kushitsita munarqa, cada junaqmi imata parlanapaq kaqta o ruranapaq kaqta decidishun (Rom. 14:12). Jehovämi yanapamäshun alli kaqta decidinantsikpaq y munanqannö sirwinantsikpaq. Tsëmi anciänukunaqa willanqantsik asuntupaq Jehovä imata pensanqanta musyanantsikpaq Bibliawan yanapamantsik, y entiendiskirqa kikintsiknam imata ruranapaqpis decidinantsik. Tsënöpam “alli pensëta” yachakuntsik (Heb. 5:14).

17. ¿Imatataq ruranantsik?

¹⁷ Jehovä Diosnintsik cuidamanqantsikpitaqa, ¡alläpam agradecikuntsik! Pëqa imëyaqpis kawakunantsikta munarmi ‘mas alli kaq mitsikoqpa’ o Jesuspa vïdanwan rantimarquntsik (Juan 10:11). Y cuidamänantsikpaq anciänukunata churamurmi kënö nir änikunqanta cumplimushqa: “Imatapis munanqänö ruraq mitsikoqkunatam qamkunaman churamushaq. Pëkunam yachaq kayänëkipaq y entiendikoq kayänëkipaq yanapayäshunki” (Jer. 3:15). Tsëqa, ¿imatataq ruranantsik? Diosnintsikpa rikëninchö mana alli këkarqa o jutsata rurashqa karqa, yanapamänantsikpaqmi anciänukunata willanantsik. ¡Yanapamänapaq Diosnintsik churamunqanta alli provechashun!