Edäyashqa wawqi panikunaqa allim yanapakuyan

Capazchi qampis, jövin kanqëki witsannö imëkata rurëta mana puëdir kë paninö sientikuykanki. Jehovä Diosnintsikta atska watakunapa alli sirwishqa karpis, capazchi jövin kanqëki witsan ruranqëkikunata yarparnin alläpa llakikunki. Peru ¿imatan yanapashunkiman alläpa mana llakikunëkipaq?

¿IMATA RURANËKITATAQ JEHOVÄ MUNAN?

Kënömi pensanëki: “¿Imata ruranätataq Jehovä munan?”. Deuteronomiu 6:5 textuchömi kënö nin: “Jehovä Diostam llapan shonquykikunawan, llapan kawënikikunawan y llapan kallpëkikunawan kuyayänëki”. ¿Imanirtan kë textuchö ninqanqa alläpa shumaq?

Kë textuchöqa Jehovä nikäshunki puëdinqëkimannölla sirwinëkipaqmi. Tsëta yarpanqëkim yanapashunki, qampitapis masta wakinkunata ruraqta rikarnin o unë ruranqëkikunata yarparnin alläpa mana llakikunëkipaq.

Këman pensari: jövin karninqa, llapan puëdinqëkimannöchi Jehoväta sirwirqëki. Tsënöllam kanan edäna këkarpis, unënö mana rurarpis llapan puëdinqëkimannö Jehoväta sirwikanki. Y alli pensashqaqa, jövin kanqëki witsan sirwinqëkinöllam kanampis sirwikanki.

EDÄNA KARPIS WAWQIKUNATA Y PANIKUNATAM YANAPËTA PUËDINKI

Edäna karnin, imëkatapis rurëta mana puëdinqëkita pensanëkipa rantin, yanapakuyta puëdinqëkiman pensë. Edäna karninqa, jövin kanqëki witsan rurëta mana puëdinqëkikunatam rurëta puëdinki. Këllaman pensarishun:

Jövin kanqëkipita Jehovä imanö yanapashunqëkita wakinkunata willë. Diospa unë sirweqninkuna niyanqankunata rikärishun.

Gobernanti Davidmi kënö nirqan: “Jövin kanqäpita awkinyanqäyaqpis manam rikarqötsu alli nunata Teyta Dios dejarinqanta, ni manam tsurinkunatapis mikuyta mañakur purikäyaqta rikarqötsu” (Sal. 37:25).

Josuënam kënö nirqan: “Kananqa wanukunäpaqnam këkä. Y qamkunaqa llapan shonquykikunawan y llapan kawënikikunawanmi musyayanki Jehovä Diosnintsik llapan äniyäshunqëkita cumplinqanta. Llapampis biennikikunapaqmi kashqa, y llapan äniyäshunqëkim cumplikashqa” (Jos. 23:14).

Davidwan Josuëqa tsënö niyarqan, atska watakunapana Jehoväta sirwishqa karnin y imëkakunapa pasashqa karmi. Tsënöllam qampis, Jehovä Diosnintsikta atska watakunapana sirwikanki y imëkakunapam pasarqunki. Tsëmi wakinkunata masraq yanapëta puëdinki.

Atska watapana Jehovä Diosnintsikta sirwikarqa, sirweqninkunata Jehovä imanö bendicinqanta wakinkunata cuentë. Mëtsika kutiraq rikarqunki sirweqninkunata Jehovä Diosnintsik yanapanqanta. Tsëta cuentaptikim animakuyanqa y qampis kushishqam sientikunki (Rom. 1:11, 12).

Tsënöllam wakinkunataqa animëta puëdinki, reunionkunaman puëdinqëki hörakuna ëwarnin. Reunionkunaman ëwaptikiqa, wakinkunam kushikuyanqa y qampis kushishqam sientikunki. Punta kaq pärrafuchö Connie jutiyoq panintsikmi kënö nin: “Reunionkunaman ëwarmi kushishqa sientikü. Kuyakoq turikunawan y nanakunawan juntu karmi problëmäkunatapis qonqarï. Y noqapis, kushishqa sientikuyänampaqmi imallatapis qararï. Pëkunawan juntum Diosnintsikta sirwita procurä”.

JEHOVÄ DIOSNINTSIKQA ALLÄPAM VALORASHUNKI

Bibliata leyirninqa tarintsik, Jehovä Diosnintsikta maslla sirwita munëkarpis mana puëdishqa kayanqantam, peru Jehovä Diosnintsikqa tsë nunakunata alläpam kuyarqan. Pensarishun Simeon jutiyoq nunaman. Pëqa israelïtam karqan y Jesus yurikunqan witsampaqqa awkinnam karqan. Pëqa templuman ëwarninqa, capazchi jövinkunata rikaq allipa trabajëkäyanqanta. Tsëta rikarqa, capazchi pensarqan pëtaqa edäna kaptin Diosnintsik manana valoranqanta. Peru rasumpa kaqchöqa, manam tsënötsu karqan; Jehovä Diosnintsikqa valorarqanmi. Tsëmi alli ruraq nuna kanqanta nirqan, y hasta tsurin Jesusta llullullaraq këkaptin reqinanta y Diospa Akrashqan kanampaq kaqta willakunampaqmi permitirqan (Lüc. 2:25-35). Tsëwanqa, ¿imatataq entiendintsik? Diosnintsikqa alläpam valorarqan edäna këkarpis Simeon ruranqankunata y pëman confiakunqanta, tsëmi santu espïritunwampis yanaparqan.

¿Y qampis puëdinqëkimannöku Jehoväta sirwikanki? Tsëqa segürum kanëki Jehovä Diosnintsik alläpa valorashunqëkita. Pëqa alläpam kushikun sirweqninkuna ‘puëdiyanqanmannö’ sirwiyaptin (2 Cor. 8:12).

Tsëmi qampis rurëta puëdinqëkikunallata ruranëki. Diosnintsiktaqa tukuynöpam sirwita puëdinki. Allim kanman juk rätullapis yachatsikoq yarqunqëki y wawqikunata y panikunata telëfunupa qayarinqëki o juk nötata qellqarir mandarinqëki. Pëkunapaq ichikllatapis ruranqëkiqa allim animanqa. Pëkunaqa Jehovä Diosnintsikta atska watakunapana sirwishqa kanqëkita musyarmi, qayarinqëkita o qellqarir mandarinqëkitaqa alläpa valorayanqa.

Purita alläpa mana puëdirpis, Jehovä Diosnintsiktaqa sirwita puëdinkim. ¿Imanötan rurankiman? Leyi “Wanutsikuyta pensëkaptinmi salvarqan” neq recuadruta. Tsëchömi tarinki, Africa oriental lädupita juk mayorna pani juk shipashta imanö yanapanqanta.

Qamqa mëtsika watapam Jehovä Diosnintsikman confiakurqunki y mana dejëpam sirwirqunki. Tsëmi wakinkunapaqqa juk ejemplu kanki y animëtam puëdinki. Yarpänëkim Hebrëus 6:10 textuchö kënö ninqanta: “Teyta Diosqa manam mana allita ruraqtsu, y manam rurayanqëkita y jutinta kuyar limpiu nunakunata sirwikäyanqëkita y sirwir sïguikäyanqëkita qonqantsu”.

WAKINKUNATA YANAPARNIN OCUPÄDU KAYË

Estudiaq nunakunam niyan jukkunata yanapaq edäna nunakunaqa alli saludyoq kayanqanta, mas alli pensayanqanta y mas watapa kawayanqanta.

Rasunmi, jukkunata yanaparpis qeshyapäkunkim; tsëtaqa Diosnintsikpa Gobiernunraqmi ushakätsinqa. Tsë tiempuchöqa manam jutsapis, awkinyëpis o chakwanyëpis ni wanuypis kanqanatsu (Rom. 5:12).

Tsënö kaptimpis, segürum kayänëki Jehovä Diosnintsikta mana dejëpa sirwiyanqëkiqa, Diosnintsik änikunqankunaman maslla confiakuyänëkipaq yanapayäshunqëkita, y capazchi mas alli saludyoq kayänëkipaqpis yanapayäshunki. Mayorna këkaq wawqilläkuna y panilläkuna: ama imëpis qonqayëtsu puëdiyanqëkimannö sirwiyanqëkipita Diosnintsik alläpa kuyayäshunqëkita y congregacionchö wawqikunapaq y panikunapaqpis alli ejemplu kayanqëkita.