Jehovä yachatsimanqantsikta alli provechashun

1. ¿Imakunata wananqantsiktataq Jehovä Diosnintsik musyan? (Mateu 5:3).

JEHOVÄ Diosnintsikqa kamamaqnintsik karmi musyan mikuyta, röpata y wayita wananqantsikta. Wallka tiempullapapis tsëkuna mana kapamashqaqa, alläpa mana allim kawakushwan. Tsënöllam Diosnintsikqa musyan, pëpita yachakuyta wananqantsikta (leyi Mateu 5:3). Rasumpa kushishqa këta munarqa, pëwan amïgu këta wananqantsiktam cuentachö katsinantsik y pëpitam yachakur sïguinantsik.

2. ¿Ima nitataq Jesus munëkarqan “Diosta wanayanqanta musyaqkuna” nirqa? Juk ejempluwan willakaramuy.

² ¿Ima nitataq Jesus munëkarqan, “Diosta wanayanqanta musyaqkuna” nirqa? Tsëta entiendinapaq, limushnata mañakoq nunaman pensarishun. Tsë nunaqa alläpa pobri karmi, imallatapis qarayänanta munarnin achachëchöpis, alalëchöpis, diapapis y paqaspapis juk esquïnachö jamaräkun; röpampis alläpa makwa y rakcham o qanram. Y mikunampaq mana kaptinmi alläpa uyu këkan. Tsëtanö rikarmi nunakunaqa mantsarnin witipäyantsu. Peru tsë nunaqa musyanmi, ichikllapis alli kanampaqqa jukkuna yanapayänantaraq wananqanta, tsëmi mañakun. Tsë nuna cuentam Diosta wanayanqanta musyaqkunapis alli musyayan, Diosnintsikpita yachakuyänampaqqa yanapayänantaraq wanayanqanta. Tsëmi Diosnintsik alistatsimunqan llapan yachatsikuykunata alli provechayan.

3. ¿Imatataq këchö yachakushun?

³ Këchöqa puntata yachakushun, Jesus yanapëkunampaq Feniciapita warmi rogakunqantam. Tsë warmi imanö kanqanta kimallata yachakurishun. Tsëmi yanapamäshun Diosnintsik yachatsimanqantsikkunata alli provechanapaq. Tsëpitanam yachakushun, Diosnintsikpita masllata yachakuyta munaq nunakunapita. Pëkunaqa kayan apostol Pëdru, apostol Pablu y gobernanti Davidmi.

¿IMATATAQ FENICIA WARMIPITA YACHAKUNTSIK?

4. ¿Imaqtan fenicia warmiqa Jesus kaqta ëwarqan?

⁴ Fenicia warmipa wamranqa ‘demoniuyoq karmi alläpa’ sufrikarqan, tsëmi wamranta alliyätsinanta munarnin Jesus kaqta ëwarqan (Mat. 15:21-28). Jesus kaqman chärirqa, qonqurikuykurmi rogakurqan yanapëkunampaq. Tsë warmi imanö kanqanta masllata yachakurishun.

5. ¿Imanötan Feniciapita warmi karqan, y Jesusqa imanötan yanaparqan? (Dibüjuta rikäri).

⁵ Feniciapita warmiqa humildim karqan. ¿Imanötan musyantsik? Tsë warmi rogakuptinmi Jesus kënö contestarqan: “Manam allitsu wamrakunapa tantanta chushchukunapaq jitëkuyqa”. ¿Chushchukunawan igualatsiptin tsë warmi cölerakurqanku? ¿Dejaskirku ëwakurqan? Y noqantsikqa, ¿imataraq rurashwan karqan chushchukunawan igualatsimashqa? ¿Dejaskirtsuraq ëwakushwan karqan? Feniciapita warmiqa humildim karqan y manam ëwakurqantsu. Tsëpa rantinqa, kutin kutinmi Jesusta rogarqan wamranta alliyëkatsinampaq. Pëqa confiakurqanmi Jesus alliyätsita puëdinampaq kaqman. Tsënö confiakunqanta cuentata qokurmi Jesusqa, ‘Israel nunakunallaman’ Diosnintsik mandamushqa kanqanta musyëkarpis, tsë warmipa wamrampita demoniuta qarqurirqan.

6. ¿Imatataq yachakuntsik fenicia warmipita?

⁶ Noqantsikpis yachakunantsikpaq Diosnintsik alistatsimunqankunata alli provechanapaqqa, Feniciapita warminömi humildi kanantsik, kutin kutin mañakunantsik y confiakunantsik. Humildi karqa, kutin kutinmi yanapëkamänantsikpaq Diosnintsikman mañakushun. Tsënöllam Jesusman y dirigimaqnintsikkunamampis confiakushun (Mat. 24:45-47). Humildi kashqa, kutin kutin mañakushqa y confiakushqaqa, Jehoväwan Jesusqa kushishqam yachakunantsikpaq yanapamäshun (igualaratsi Santiägu 1:5-7 textutawan). Jehovä Diosnintsikqa mikuyta, röpata y wayita alistamoq cuentam, yachakunantsikpaq imëkakunata alistatsimun. Peru ¿imatataq rurashwan tsëkunata alli provechanapaq? Tsëpaqqa yachakurishun Pëdrupita, Pablupita y Davidpita.

APOSTOL PËDRUNÖ DIOSNINTSIKPITA YACHAKUR SÏGUISHUN

7. ¿Imata ruranampaqtan apostol Pëdruta Jesus mandarqan, y ima mastataq apostol Pëdru rurarqan? (Hebrëus 5:14–6:1).

⁷ Judïukunapitaqa, apostol Pëdrum puntata cuentata qokurqan Jesusqa Diospa Akrashqan kanqanta, y musyarqanmi imëyaqpis kawakuyänampaq nunakunata yachatsinampaq, Diosnintsik mandamushqa kanqanta (Juan 6:66-68). Tsëmi Jesusqa ciëluta manaraq kutikurnin apostol Pëdruta kënö nirqan: “Üshalläkunata shumaq mitsi” (Juan 21:17). Apostol Pëdruqa Jesus mandanqanta allim cumplirqan, tsëmi Jehovä Diosnintsikqa Bibliachö ishkë cartakunata qellqanampaq nirqan. Tsënö karpis, apostol Pëdruqa, Diosnintsikpita maslla yachakuytam wanarqan, tsëmi apostol Pablu qellqanqan cartakunatapis alli estudiarqan. Peru alli estudiarpis, apostol Pëdruqa cuentatam qokurqan tsë cartachö qellqarëkaqkunaqa ‘wakin wakinqa mana fäcil entiendina’ kanqanta (2 Pëd. 3:15, 16). Peru mana entiendirpis, yachakurmi sïguirqan. Confiakurqanmi yachakunqankunata entiendinampaq y yachakunqannö kawanampaq Diosnintsik yanapanampaq kaqman (leyi Hebrëus 5:14–6:1).

8. ¿Imata ruranampaqtan apostol Pëdruta Jehovä mandarqan y Pëdruqa cäsukurqanku?

⁸ Apostol Pëdruqa allipam Jehoväman confiakurqan, tsëmi mandanqankunata cäsukurqan. Pensarishun Jöpi markachö këkaptin pasanqanman. Tsë markachö këkarmi, Pëdruqa suëñuykaqnö tikrarirqan y juk angelmi nirqan imëpis mana mikunqan animalkunapa ëtsanta mikunampaq. Judïukunaqa Ley mandakunqannömi tsë ëtsakunataqa mikuyaqtsu. Tsëmi apostol Pëdruqa kënö contestarqan: “Manam tsëtaqa imëpis rurashaqtsu Teytë. Diospa rikëninchö mana limpiu y melanëpaq kaqkunataqa, manam imëpis mikurqötsu”. Peru angelmi kënö nirqan: “Ama Teyta Dios limpiuyätsinqanta mana limpiupaq churar sïguinatsu” (Hëch. 10:9-15). Tsë suëñunqan pasarinqanllachömi, Corneliupa kimaq sirweqninkuna Pëdru kaqman chäriyarqan y Corneliu qayëkätsinqantam niyarqan. Tsë angel manaraq parlapashqa kaptinqa, Pëdruqa manachi ëwanmantsu karqan Corneliupa wayinman. Judïukunaqa, mana judïukunatam mana limpiutanö y melanëpaqtanö rikäyaq (Hëch. 10:28, 29). ¿Imatataq rurarqan apostol Pëdru? Mana judïu kaqkunatapis yachatsiyänanta Jehovä munanqanta entiendirirmi jinan höra Corneliu kaqta ëwarqan (Prov. 4:18). Corneliu kaqman chärirqa, kikin Corneliuta y wayinchö llapan kaqkunatam Diospita yachatsirqan. Y alläpachi kushikurqan Diospita yachatsinqanta chaskikuyanqanta, santu espïrituta chaskiyanqanta y bautizakuyanqanta rikarnin (Hëch. 10:44-48).

9. ¿Imakunachötan yanapamantsik Jehovä Diosnintsikpita maslla yachakunqantsik?

⁹ Noqantsikpis apostol Pëdrunömi Diosnintsikpa Palabrampitaqa mas fäcil entiendinan kaqkunata y mas sasa o aja entiendinan kaqkunatapis yachakur sïguinantsik. Peru tsëpaqqa, tiemputam wanantsik y alliran kallpachakunantsik. Peru alli yachakushqaqa, imëkachömi yanapamäshun. Këkunallaman pensarishun: alli yachakunqantsikqa yanapamäshun, Jehovä Diosnintsikta mas kuyanapaq y mas respetanapaqmi. Tsënöllam yanapamäshun, Jehovä Diosnintsik imanö kanqampita wakin nunakunata kushishqa parlapänapaq (Rom. 11:33; Apoc. 4:11). Y ¿ima mastataq Pëdrupita yachakuntsik? Dirigimaqnintsikkuna Bibliachö ninqankunata juknöpana entienditsimashqaqa, jinan höram cäsukunantsik. Tsëkunata rurashqaqa, Jehovä Diosnintsikqa manam imëpis dejamäshuntsu y sirwirnin sïguinatam permitimäshun.

APOSTOL PABLUNÖ UNË IMANÖ KANQANTSIKTA DEJASHUN

10. Colosensis 3:8 a 10 ninqannö, ¿imanö nuna kanatataq Diosnintsik munan?

¹⁰ Rakcha o qanra röpata dejareq cuentam, unë imanö kanqantsikta dejanantsik. Tsëmi apostol Pabluqa kënö nirqan: “Unë imanö kayanqëkita y unë rurayanqëkita dejayë”. Y tsëpitaqa, ¿imatataq ruranantsik? Limpiu röpata vistikoq cuentam Diosnintsik munanqannö kawakunantsik. Tsëmi apostol Pablu kënö nirqan: “Jukläya nunana kayë” (leyi Colosensis 3:8-10). Diosnintsik munanqannö nuna këqa manam fäciltsu, alliran kallpachakunantsik. Pensarishun apostol Pabluman. Pëqa jövin kanqampitam Dios munanqannö kawakuyta munarqan (Gäl. 1:14; Filip. 3:4, 5). Peru manam alliqa musyarqantsu, imanö adorayänanta Diosnintsik munanqanta. Këllaman pensarishun: Pabluqa manam musyarqantsu Jesus yachatsikunqankunata, y orgullösu nunam karqan. Tsëmi mana alli geniuyoq y “mana respetakoq” nuna karqan (1 Tim. 1:13).

11. ¿Imanö nuna kanampaqtan apostol Pablu kallpachakurqan?

¹¹ Apostol Pabluqa manaraq cristiänu karqa, imapitapis rasllam o sasllam cölerakoq. Tsëmi Bibliachöqa nin Jesuspa qateqninkunatapis alläpa chikinqanta y wanutsita munanqanta (Hëch. 9:1). Y cristiänu tikrarirqa, tsë mana alli geniunta dejanampaqmi kallpachakurqan (Efes. 4:22, 31). Peru tsënö kallpachakuykarpis juk kutiqa Bernabëwanmi ‘feyupa discutirqan’ (Hëch. 15:37-39). Peru tsë kutichö alläpa cölerakushqa karpis, apostol Pabluqa Diosnintsik munanqannö nuna këta munarmi, mas alli nuna kanampaq kallpachakur sïguirqan (1 Cor. 9:27).

12. ¿Imatataq apostol Pablu rurarqan mana alli geniunta dejanampaq?

¹² ¿Imatataq Pablu rurarqan mana alli geniunta dejanampaq y Dios munanqannö nuna kanampaq? Manam kikinllamantsu confiakurqan (Filip. 4:13). Tsëpa rantinqa, apostol Pëdrunömi Diosnintsik kallpanwan yanapëkanqanman confiakurqan (1 Pëd. 4:11). Peru tsënö confiakurpis, höra höraqa mana allikunatam rurareq y qelanäkureqmi. Y tsë hörakunaqa, ¿imatataq ruraq? Diosnintsik imanö yanapanqankunatam yarpaq. Tsëman yarpanqanmi yanaparqan kallpachakur sïguinampaq (Rom. 7:21-25).

13. ¿Imatataq apostol Pablupita yachakuntsik?

¹³ ¿Imatataq apostol Pablupita yachakuntsik? Atska watakunapana o juk ishkë watakunallaparaq Jehoväta sirwirpis, qanra o rakcha röpata jitareq cuenta y limpiu röpata churakoq cuentam, unë imanö kanqantsikta dejanantsik y Diosnintsik munanqannö kanapaq kallpachakunantsik. Peru höra höra alläpa cölerakurqa o lluta parlarirqa, manam pensanantsiktsu cambiëta manana puëdinapaq kaqtaqa. Tsëpa rantinqa, cada junaqmi kallpachakunantsik Jehovä munanqannö pensanantsikpaq y pë munanqannö imatapis ruranantsikpaq (Rom. 12:1, 2; Efes. 4:24). Y këtam imëpis yarpänantsik: Diosnintsik munanqannö nuna kanapaqqa, pëpitam seguïdu yachakunantsik. Tsëta rurar-ran Diosnintsik pensanqannö pensashun.

GOBERNANTI DAVIDNÖ JEHOVÄ CUIDAMÄNATA PERMITISHUN

14, 15. ¿Imanötan Jehovä Diosnintsikqa kanan witsan sirweqninkunata cuidan? (Salmus 27:5; rikäri fötuta).

¹⁴ ¿Ima mastataq rurashwan rasumpa kushishqa kanantsikpaq? Jehovä Diosnintsik cuidamänatam permitinantsik. Y ¿imakunatataq rurashwan cuidamänantsikpaq? Yachakurishun.

¹⁵ Gobernanti Davidqa, Jehovä Diosnintsik cuidanampaq kaqmanmi confiakurqan (leyi Salmus 27:5). Y kanan witsanqa, ¿imanötan Jehovä Diosnintsik sirweqninkunata cuidan? Pëman maslla markäkuyänampaq o yärakuyänampaq tukuynöpa yanaparninmi. Y chikimaqnintsikkuna ushakätsimënintsikta munar imëkata rurayaptimpis, mana ushakätsimänapaq kaqtam änimantsik (Sal. 34:7; Is. 54:17). Satanaspis, demoniukunapis y chikimaqnintsikkunapis poderösum kayan. Peru Jehovä Diosnintsik cuidamashqam pëpita rakimënintsikta puëdiyanqatsu, hasta wanutsimashqapis Jehovä Diosnintsikqa kawarkatsimäshunmi (1 Cor. 15:55-57; Apoc. 21:3, 4). Tsënöllam Jehovä Diosnintsikqa sirwirnin sïguinantsikpaq, cada junaq yarpachakunqantsikchöpis yanapamantsik (Prov. 12:25; Mat. 6:27-29). Jehovä Diosnintsikqa alläpa kuyamarnintsikmi kuyakoq sirweqninkunawan y hasta anciänukunawampis cuidamantsik (Is. 32:1, 2). Y reunionkunaman ëwarnimpis masran yachakuyta puëdintsik Jehovä Diosnintsik imanö cuidamanqantsikta (Heb. 10:24, 25).

16. ¿Imanötan Jehoväqa Davidta cuidarqan?

¹⁶ Jehovä mandakunqankunata David cäsukuptinqa, Jehoväqa yanaparqanmi allikunata decidinampaq y decidinqankunapita mana sufrinampaq (igualaratsi Proverbius 5:1, 2 textutawan). Peru David mana cäsukur mana allikunata rurarnin sufriptinqa, manam tsë sufrimientupita Jehovä librarqantsu (2 Sam. 12:9, 10). ¿Y imatataq David rurarqan nunakuna chikiyaptin y sufritsiyaptin? Jehovämanmi mañakurqan. Y Jehoväqa, ¿imanötan Davidta cuidarqan? Consolarqanmi, kuyanqantam nirqan y imëpis cuidanampaqmi änirqan (Sal. 23:1-6).

17. ¿Imatataq Davidpita yachakuntsik?

¹⁷ ¿Imatataq Davidpita yachakuntsik? Pënömi, imata decidinantsik kaptimpis Jehovä ninqankunamanraq alli pensanantsik. Peru mana allikunata decidirnin sufrirqa, manam pensanantsiktsu tsë sufrimientukunapita Jehovä libramänapaq kaqtaqa (Gäl. 6:7, 8). Y ¿imatataq rurashwan nunakuna chikimashqa y sufritsimashqa? Davidnömi, Jehoväman mañakunantsik y confiakunantsikmi tranquïlu kanapaq y mana yarpachakunapaq yanapamänapaq kaqman (Filip. 4:6, 7).

JEHOVÄ YANAPASHUNËKIPAQ KAQMAN CONFIAKUR SÏGUI

18. Kanan witsan nunakunaqa, ¿imanötan kayan? Y ¿imatataq rurashwan pëkunanö mana kanantsikpaq? (Fötukunata rikäri).

¹⁸ ¿Ima nintan 2026 watapaq textu? Kënömi nin: “Kushikuyätsun Diosta wanayanqanta musyaqkuna”. Kë textu ninqantaqa, kanan witsanqa masran cäsukunantsik. Kanan witsan nunakunaqa manam Diospita imatapis musyëta munayantsu o kikinkuna munayanqannömi Diosta adorayan o yachaq nunakuna niyanqankunatam masqa cäsukuyan. Tsëmi kushishqatsu kawakuyan. Noqantsikqa manam pëkunanö këta munantsiktsu. Tsëqa, ¿imatataq rurashwan? Bibliatam seguïdu yachakunantsik, Diosnintsik munanqannö kanapaqmi cada junaq kallpachakunantsik y Diosnintsik cuidamänatam permitinantsik.