¿Imanötan Jesus wanunqampita agradecikunkiman?

1, 2. Noqantsikrëkur Jesus wanushqa këkaptinqa, ¿imatataq rurashwan? (2 Corintius 5:14, 15; dibüjuta rikäri).

WAYI juchuptin o laqmaptin pampakashqa këkaptiki, juk nuna salvarishunkiman. ¿Imataraq tsë nunapaq rurankiman? Qamllata mana salvashqa kashuptikipis alläpachi agradecikunkiman y salvashunqëkitaqa manachi imëpis qonqankimantsu.

² Noqantsikpis punta kaq yachatsikuychö yachakunqantsiknömi, Adan churamanqantsik jutsapita pillapis libramänantsikta wanarqantsik. Y Jehovä Diosnintsikmi, kuyë Tsurimpa vïdanwan libramarquntsik. ¿Imakunachötan Jesus wanunqan yanapamantsik? 1) Jutsantsikpita Diosnintsik perdonamänapaq, 2) shamoq tiempuchö alli kawakuyta shuyaränapaq y 3) Diosnintsikwan amishtanapaqmi. Jesus wanushqa kanqanrëkurmi, shamoq tiempuchö alli kawakunapaq kaqta shuyarantsik. Jesusqa kuyamarnintsikmi noqantsikrëkur wanurqan. Pëqa, ciëlupita kë Patsaman manaraq shamurmi kuyamarqantsikna (Prov. 8:30, 31). Tsënö kuyamanqantsikpaq parlarmi apostol Pablu kënö nirqan: “Cristu kuyayämanqanmi obligayäman” (leyi 2 Corintius 5:14, 15). Jesus tsënö kuyëkämashqaqa ruranqantsikkunawanmi agradecikunantsik. Jesus wanunqantaqa manam qonqanantsiktsu.

3. Jesus wanunqampita agradecikunqëkiqa, ¿wakinkuna rurayanqanwan igualtsuraq kanqa?

³ Y qamqa, ¿imakunataraq rurankiman Jesus wanunqampita agradecikurnin? Imakunata ruranëki pishinqantam kikiki rikänëki y manam pensanëkitsu agradecikurnin ruranqëkikuna, wakinkuna rurayanqanwan igual kanantaqa. Tsëqa, ¿imatataq rurankiman Bibliata tsëraq yachakuykarqa o bautizakushqana karqa o Jehoväta sirwita dejashqa karqa? Imanö agradecikunëkipaq kaqta këchö yachakurishun.

BIBLIATA TSËRAQ ESTUDIËKARQA, ¿IMANÖTAN AGRADECIKUNKIMAN?

4. ¿Bibliata estudiëkaqkuna imakunata rurëkäyanqantataq Jehovä rikëkämun?

⁴ Bibliata estudiëkarqa yarpänëkim, amïgun kanëkita munarnin Jehovä yanapëkäshunqëkita (Juan 6:44; Hëch. 13:48). Bibliachöqa Diosnintsikpaq nin, ‘nunapa shonqun imanö kanqanta’ rikëkämunqantam. Tsënö ninqanwanmi entiendintsik, pëpita yachakunëkipaq kallpachakunqëkitapis rikëkämunqanta. Y pë munanqannö kawakunëkipaq cambiukunata ruraptikiqa, alläpam kushikun (Prov. 17:3; 27:11). Peru Jehoväpa amïgun kanëkipaqqa, Jesus wanunqanraqmi yanapashunki (Rom. 5:10, 11). Y tsëtaqa manam imëpis qonqanëkitsu.

5. ¿Imanötan Bibliata estudiëkaqkunaqa cäsukuyanman Filipensis 3:16 ninqanta?

⁵ Jesus wanunqampita agradecikurqa, ¿imakunatataq rurankiman? Filipensis cristiänukunata apostol Pablu consejanqantam cäsukunëki. Kënömi nirqan: “Diospa kaqchö imanö këkanqantsikmannö mas alliyar sïguishun” (Filip. 3:16). Juk parlakuychöqa, kanan rurëkanqëkinömi Jehovä Diosnintsikpita maslla yachakur sïguinëki. Y manam permitinëkitsu ni imapis ni pipis kawëman chätsikoq nänipita rakishunëkita (Mat. 7:14; Lüc. 9:62).

6. ¿Imatataq Bibliata estudiëkaq ruranman cambiukunata ruranan mana fäcil kaptinqa? (Deuteronomiu 30:11-14; fötuta rikäri).

⁶ ¿Y imatataq rurankiman Bibliachö yachakunqëkikunata creinëki mana fäcil kaptinqa? Tsë tëmapitam maslla yachakunëki y Jehovätam mañakunëki tsë tëmata alli entiendinëkipaq (Sal. 86:11). Y tsëkunata rurëkarpis creinëki mana fäcil kaptinqa, tsë tëmata yapëchöraq yachakunëkipaqmi dejarinëki; peru Bibliata yachakuytaqa manam dejanëkitsu. Y Biblia mandakunqankunata cumplinëki mana fäcil kaptinqa, ¿imatataq rurankiman? Yarpänëkim, jutsasapa kanqëkita Jehovä Diosnintsik musyanqanta y rurëta mana puëdinqëkikunata mana mañashunqëkita. Qamqa Jehovä mandakunqankunata cumplïta puëdinkim (leyi Deuteronomiu 30:11-14). Y Jehovämi yanapashunëkipaq änishunki (Is. 41:10, 13; 1 Cor. 10:13). Tsëmi cambiukunata rurëtaqa mantsanëkitsu. Cambiukunata rurëta mana puëdinëkipaq kaqman yarparäkunëkipa rantinqa, kuyashurniki Diosnintsik imëkakunata ruramunqanman y Tsurin wanunantapis permitinqanmanmi yarpänëki. Jehovä Diosnintsikta maslla kuyarqa, mandakunqantaqa fäcil-llam cumplïta puëdinki (1 Juan 5:3).a

7. Testïgu papäyoq o mamayoq jövinkunaqa, ¿imamantan alli pensayanman?

⁷ Jövin, ¿qamqa Bibliapita yachakuykankiku? Papänikiwan mamäniki Testïgu karqa capazchi Bibliapita yachëkätsiyäshunki. Teytakunaqa, masqa procurayan wamrankunata Bibliapita yachatsitam. Tsënö kaptimpis, Bibliachö kënö ninqantam yarpänëki: “Teyta Diosman witiyë, y pëqa qamkunamanmi witimunqa” (Sant. 4:8; 1 Crön. 28:9). Teyta Diosnintsik qamman witimunampaq o amïguyki kanampaqqa, puntataqa qammi pëpita yachakunëki. Jehovä Diosnintsikqa amïgun kanëkitam munan. Y amïgun kanëkitaqa munan manam familiëki Testïgu kaptinllatsu. Peru ¿imatataq Diosnintsik ruramushqa amïgun kanëkita munarnin? Tsurin wanunantam permitishqa. Tsëtaqa manam imëpis qonqanëkitsu (Rom. 5:1, 2). Tsënö këkaptinqa, allichi kanman Jesus wanunqanta yarpäna reunionman kë wata manaraq ëwarnin Jesus wanunqan qamta imanö yanapashunqëkiman alli pensanqëki. Tsënö pensanqëkim yanapashunki Diosnintsikta maslla sirwita munanëkipaq. Y Diosnintsikta maslla sirwirqa, Jesus wanunqampitam Diosnintsikta agradecikuykanki.b

BAUTIZAKUSHQANA KARQA, ¿IMANÖTAN AGRADECIKUNKIMAN?

8. Bautizakushqana cristiänukunaqa, ¿imakunatataq rurayashqa Jesus wanunqanman markäkurnin o yärakurnin?

⁸ Bautizakushqana karqa, Jesus wanunqanman markäkur o yärakurmi imëkata rurarqunki. Këkunallaman pensari: Jehoväpitam yachakurqunki, mandakunqankunatam cäsukurqunki, Jesus mandakunqanta cäsukurmi yachatsikurqunki, Jehoväta sirwiyänampaqmi jukkunata yanaparqunki y Jehovällatana sirwinëkipaqmi änikurqunki y bautizakurqunki. Capazchi Jehoväta sirwinqëkirëkur chikiyäshuptikipis alli aguantarqunki (2 Tim. 3:12). Tsënöqa aguantarqunki Jehovä Diosnintsikta kuyar y Jesus wanunqampita agradecikurmi (Heb. 12:2, 3).

9. Bautizakushqana karpis, ¿imapitataq cuidakunantsik?

⁹ Peru bautizakushqana karpis, allim cuidakunantsik. Capazchi tiempu pasanqanmannö Jesus wanunqanta alläpaqa valorashwannatsu. Tsëmi pasarqan unë witsanchö Ëfesuchö cristiänukunatapis. Pëkunaqa mana allikunapa pasarpis allim aguantashqa kayarqan, peru Jesusmi kënö consejarqan: “Tsënö kaptimpis, këchö pishipanqëkitam rikä: manam qallananchönönatsu kuyakoq kanki” (Apoc. 2:3, 4). ¿Imanirtan Jesus tsënö nirqan? Tiempu pasanqanmannömi, Diosnintsikta janan shonqullana sirwir qallëkushwan y manam voluntäwanqa rurashwannatsu. Capazchi Diosnintsikman mañakurpis, reunionkunaman ëwarpis o yachatsikoq yarqurpis ruranantsik kaptinllana o yachakashqa karllana rurëkashwan. Y manam Jehoväta rasumpa kuyarqa rurëkashwantsu. Tsëqa, ¿imatataq rurashwan Jehoväta puntatanö mana kuyëkanqantsikta cuentata qokurqa?

10. ¿Imanötan 1 Timoteu 4:13 y 15 textuchö këkaq consëjuta cäsukushwan?

¹⁰ Apostol Pablum Timoteuta consejarqan Diosnintsikta imanö adorëkanqanman alli pensanampaq, y maslla sirwinampaqmi animarqan (leyi 1 Timoteu 4:13, 15). ¿Imanötan Timoteuta Pablu consejanqanta noqantsikpis rurashwan? Allim pensanantsik Jehovä Diosnintsikta imanö sirwikanqantsikman, y kushishqalla sirwir sïguinapaqmi kallpachakunantsik (Rom. 12:11; Biblia de estudiupa nötanchö “Que el espíritu los llene de fervor” neqta leyi). ¿Imakunatataq rurashwan? Këkunallaman pensarishun: reunionkunaman ëwarqa atentu wiyakunapaqmi kallpachakunantsik, reunionkunapaqmi mas alli preparakunantsik y Bibliata yachakunqantsik höra japallantsik kanapaq y yachakunqantsikman alli pensanapaqmi tiemputa rakinantsik. Tsëkunata rurashqaqa, imanömi ninaman yantata mas churashqa mas prendin, tsënömi Jesus wanunqampita y Jehovä noqantsikpaq imëkata ruramunqankunapita masraq agradecikushun. Tsënöllam alli kanman, Jesus wanunqanta yarpäna reunionpaq semänakuna pishikaptin, Jehoväta sirwinqantsikpita imëka bendicionkunata chaskinqantsikman alli pensanqantsik. Tsëmi yanapamäshun Jesus wanunqanta maslla valoranapaq; musyanqantsiknöpis Jesus wanunqanraqmi yanapamantsik Jehoväpa amïgun kanantsikpaq.

11, 12. Diosnintsikta sirwinapaq gänasnintsik mana kaptinqa, ¿Jehovä Diosnintsik santu espïritunwan mana yanapëkämanqantsiktatsuraq pensashwan? (Fötuta rikäri).

¹¹ Diosnintsikta sirwinantsikpaq höra höra gänasnintsik mana kaptinqa, ama llakikushuntsu ni ama pensashuntsu santu espïritunwan Jehovä mana yanapëkämanqantsiktaqa. Apostol Pablupaqpis höra höraqa manam gänasnin karqantsu Diosnintsikpita yachatsikunampaq. Tsëmi kënö nirqan: “Mana munëkar rurarpis, tsëta ruranäpaqmi carguta chaskirqö” (1 Cor. 9:17). ¿Imanirtan tsënö nirqan?

¹² Apostol Pablupaqa höra höraqa manam yachatsikunampaq gänasnin karqantsu. Peru gänasnin mana kaptimpis, yachatsikuytaqa manam dejarqantsu. Noqantsikpis pënömi ruranantsik. Diosnintsikta sirwitaqa manam dejanantsiktsu. Y tsëpaqqa, yanapamänapaqmi Jehoväman mañakunantsik. Palabranchömi kënö nimantsik: “Teyta Diosmi pëpaq alli kanqannö, rurëta munayänëkipaq y rurayänëkipaq kallpayoq kayänëkipaq yanapayäshunki” (Filip. 2:13). Diosnintsikta sirwirmi ocupädu këkänantsik. Tsëkunata ruranqantsikmi yanapamäshun Diosnintsikta gänas gänaslla sirwir sïguinapaq.

13. ¿Imatataq rurashwan creikunqantsikchö imanö këkanqantsikta musyanapaq?

¹³ 2 Corintius 13:5 textuchömi kënö nin: “Creikuyanqëkichö imanö këkäyanqëkita imëpis alli rikäyë. Imanö këkäyanqëkita imëpis rikëkäyë”. Kë textu ninqannömi Jehovä Diosnintsikta sirwikanqantsikchö imanö këkanqantsikta musyanapaq höra höra kënö pensanantsik: “¿Gänas gänasllaku Jehovä Diosnintsikta sirwikä o qelanëkäku? ¿Jamanqä hörakuna imata rikarpis, imata pukllarpis o imata rurarpis Jehovä chikinqankunapita cuidaküku? ¿Kallpachakuykäku wawqikunawan y panikunawan yamë y juknölla kawakunäpaq?” (Sal. 97:10; Mat. 6:33; Efes. 4:2, 3). Tsëkunamanqa pensëta puëdintsik, Jesus wanunqanta yarpäna witsanmi. Jehoväwan Jesus noqantsikpaq imëkakunata rurayämunqankunaman alli pensanqantsikmi yanapamäshun agradecikoq kanapaq y noqantsikrëkur Jesus wanunqanta valorarnin Diosnintsikta sirwita mana dejanapaq.c

JEHOVÄTA SIRWITA DEJASHQA KARQA, ¿IMANÖTAN AGRADECIKUNKIMAN?

14. ¿Imanirtan wakin wawqikuna y panikunaqa Jehoväta sirwita dejayashqa?

¹⁴ Wakin wawqikuna o panikunaqa pöcu tiempullaraq o atska watakunapana Jehoväta sirwikarmi dejariyashqa. ¿Imanir-raq dejayashqa? Capazchi wakinkunaqa “kë vïdachö imëkapaq” yarpachakurnin (Lüc. 21:34). O wakinkunaqa wawqikunawan o panikunawan ofendinakushqa karnin o llakitsinakushqa karnin (Sant. 3:2). O capazchi wakinkunaqa jutsata rurashqa karnin willakuyta mantsapakurnin. Y qamqa, ¿imanirtan Jehoväta dejarqunki? ¿Imatataq rurankiman Jehoväta yapë sirwinëkipaq? ¿Yanapashunkimantsuraq Jesus wanunqanman pensanqëki?

15. ¿Imatataq Jehoväqa ruran sirwita dejashqa cristiänukunapaq? (Ezequiel 34:11, 12, 16).

¹⁵ Jehovä Diosnintsikqa manam qonqantsu pëta sirwita dejashqakunata. Tsëmi pëkunataqa, oqrakashqa üshanta duëñun asheqnö ashin. Y tarïkurqa, kutikamunampaqmi tukuynöpa yanapan (leyi Ezequiel 34:11, 12, 16). Y qamtaqa, ¿ashikäshunkitsuraq? ¡Awmi! ¿Imanirtan ashikäshunki? Jehoväqa musyanmi kuyëkanqëkitaraq; pëta kuyarmi kë revistatapis leyikanki. Y yarpë, shonquykichö imanö kanqëkita musyarmi sirweqnin kanëkipaqpis akrashurqëki. Jehovä Diosnintsikqa kanampis musyëkanmi shonquykichö imanö kanqëkita, tsëmi sirweqninkunawan juntu kanëkipaq yapë kutimunëkita munan.

16. ¿Imatan Jehoväta sirwita dejashqakunata yanapanqa yapë Jehoväta sirwiyänampaq? (Fötuta rikäri).

¹⁶ Kutikamunëkitam Jehoväqa munan neq follëtuchömi kënö nin: “Jehovämi yanapashunki pëman kutinëkipaq. Jina yarpachakïnikikunata vencinëkipaq, mana allita rurayäshunqëkipita llakishqalla mana kakunëkipaq y jutsata rurashqa karqa limpiu concienciayoqna kanëkipaqmi yanapashunki. Këkunata ruraptikiqa yanapashunkim markanwan Jehoväta yapë sirwinëkipaq”. Tsënöllam yarpänëki, anciänukunapis alläpa kuyayäshunqëkita. Pëkunaqa, “fuerti vientupita y fuerti tamyapita tsapakoq machënö[mi]” kayan (Is. 32:2). ¿Qamqa Jehoväta yapë sirwita munankiku? ¿Imatataq rurankiman sirwir qallanëkipaq? (Is. 1:18; 1 Pëd. 2:25). Allim kanman reunionkunaman ëwar qallanqëki y Jehoväta yapë sirwita munanqëkita juk anciänuta willarinqëki. Capazchi tsë anciänuqa, juk tiempupa Bibliapita pillapis yachatsishunëkipaq patsätsimunqa. Jesus wanunqampita agradecikuyta munar ruranqëkikunataqa, Jehovä musyëkanmi y yanapashunkim.

QAMQA, ¿IMATA RURANËKIPAQTAN PENSËKANKI?

17, 18. ¿Imatataq rurashwan Jesus wanunqanta yarpäna witsanchö?

¹⁷ Jesusmi kënö nirqan: “Nunakunata alläpa kuyarmi Teyta Diosqa japallan Tsurinta pëkunarëkur entregarqan. Pëman markäkoqkuna o yärakoqkuna mana ushakäyänampaq, sinöqa imëyaqpis kawëta tariyänampaq” (Juan 3:16). Jehovä Diosnintsikqa Jesus wanunqanta välitsirmi jutsapita y wanuypita libramantsik. Tsëtaqa manam imëpis qonqanantsiktsu (Rom. 3:23, 24; 2 Cor. 6:1). Tsëmi alli kanman Jesus wanunqanta yarpäna witsanchö, Jehoväwan Jesus alläpa kuyamanqantsikman y imanö agradecikunapaq kaqman pensanqantsik.

¹⁸ Y qamqa, ¿imataraq ruranki Jesus wanunqampita agradecikurnin? Capazchi ruranqëkikunaqa wakinkuna rurayanqanwan igualtsu kanqa. Peru yarpänëkim, Jesus wanunqampita agradecikurnin entëru Patsachö wawqikuna y panikuna rurayanqanta bendicinqannölla, qam ruranqëkitapis Jehovä bendicimunampaq kaqta (2 Cor. 5:15).