¿Imanötan Jesus wanunqan yanapamantsik?

1, 2. ¿Imanirtan pillapis salvamänataraq wanantsik? (Romänus 7:22-24; dibüjuta rikäri).

KËMAN pensarishun: juk wayi juchurinman o laqmarinman y rurinchöqa juk nuna pampakashqa kawëkar quedarinman. ¿Imataraq tsë nuna ruranman salvayänampaq? Qayëkachanmanchi yanapëkuyänampaq y musyariyaptinqa salvayänantachi shuyaranman.

² Noqantsikpis, wayi juchuptin pampakashqa cuentam këkantsik. Adanmi Teyta Diosta mana cäsukurnin jutsasapa tikrarirqan, y llapantsikpis pëpita yurishqa karmi jutsasapallana kantsik. Y manam kikintsikllaqa tsë jutsapita librakuyta puëdintsiktsu. Sinöqa pillapis libramänataraqmi wanantsik. Tsëtam apostol Pablu romänu cristiänukunaman cartakurnin entienditsikurqan (leyi Romänus 7:22-24). Tsë cartachömi Pabluqa rogakurqan ‘wanuyman chëkätseq cuerpupita’ salvëkuyänampaq. Pabluqa manam Adan jutsata ruranqampita librakuyta puëdirqantsu, y imë höra karpis wanunampaq kaqtam musyarqan (Rom. 6:23). Y noqantsikpis pënömi sientikuntsik. Pillapis Adan ruranqan jutsapita libramänataraqmi wanantsik.

3. ¿Imanötan Jesus wanunqan yanapamantsik?

³ Apostol Pabluqa musyarqanmi pï salvanampaq kaqta. Tsëmi, “¿piraq salvamanqa wanuyman o wañuyman chëkätsimaq cuerpupita?” niskir kënö nirqan: “¡Teyta Diostam agradecikü! Pëmi Señornintsik Jesucristurëkur salvamanqa” (Rom. 7:25). Pabluqa nikarqan, Jesuspa vïdanwan Jehovä Diosnintsik salvanqampaqmi. Tsëqa, ¿imanötan Jesus wanunqan yanapamantsik? 1) Jutsantsikpita perdonashqa kanapaq, 2) shamoq tiempuchö alli saludyoq y kushishqa kawakunapaq y 3) Jehovä Diosnintsikwan amishtanapaqmi. Tsëkunapitam këchö yachakushun. Yachakunqantsikmannömi Jehovä Diosnintsikta salvamanqantsikpita mas kuyashun y Jesustapis noqantsikrëkur wanunqampita agradecikushun (Rom. 15:13; Col. 1:14).

JUTSANTSIKPITA DIOSNINTSIK PERDONAMÄNAPAQMI YANAPAMANTSIK

4, 5. ¿Imanirtan llapantsikpis Jesus salvamänata wanarquntsik? (Eclesiastes 7:20).

⁴ Llapantsikpis Diosnintsik perdonamänatam wanantsik, y tsëpaqqa Jesus wanunqanmi yanapamantsik. Jutsasapa karmi höraqa parlanqantsikwan o ruranqantsikwan jutsata rurarintsik (leyi Eclesiastes 7:20). Wakin jutsakunaqa alläpa grävim kayan. Këllaman pensarishun: Moises qellqanqan Leychömi mandakoq, adulteriu jutsata ruraqkunata o pitapis wanutseqtaqa wanutsiyänampaq (Lev. 20:10; Nüm. 35:30, 31). Peru wakin jutsakunaqa manam alläpa grävitsu kaq, tsënö karpis jutsam kaq. Tsëmi Davidqa kënö nirqan: “Imatapis parlanäpaqqa alliraqmi pensashaq” (Sal. 39:1). Yachakurinqantsiknöpis llapantsikmi parlanqantsikkunawampis jutsata rurantsik (Sant. 3:2).

⁵ Alli pensashqaqa, parlanqantsikwan y ruranqantsikwampis mëraq jutsata rurarquntsik. Y tsëkunata yarparqa, alläpachi llakikuntsik o penqakuntsik. Tsëmi Bibliachöqa kënö nin: “‘Manam jutsantsik kantsu’ nirqa, kikintsiktam engañakuykantsik, y manam alli kaq yachatsikuykuna shonquntsikchötsu këkan” (1 Juan 1:8).

6, 7. ¿Imatataq Jehovä rurashqa jutsantsikkunapita perdonamänantsikpaq? (Dibüjuta rikäri).

⁶ Jehovä Diosnintsikqa, jutsantsikkunapita perdonamänapaqmi Tsurin Jesus wanunanta permitirqan (Efes. 1:7). Tsëqa, ¿munanqantsik höra jutsata rurakunapaq kaqtatsuraq pensashwan? Manam (Is. 59:2).

⁷ Moises qellqanqan Leychöqa mandakurqan israelïtakuna jutsata rurarqa, perdonashqa kayänampaq animalkunata pishtëkur rupatsiyänampaqmi (Lev. 4:27-31; 17:11). Tsë sacrificiuta rurayanqanqa rikätsikurqan nunakunarëkur Jesus wanunampaq kaqta y Jesus wanunqanrëkur atska bendicionkunata chaskinapaq kaqtam. Jehovä Diosnintsikqa Jesus wanunqanta välitsirmi jutsantsikkunapita perdonamantsik. Tsëtam apostol Pablupis Corintuchö këkaq cristiänukunata entienditsirqan. Manaraq cristiänu karnin imëka jutsata rurashqa kayanqanta niskirmi kënö nirqan: “Señor Jesucristupa jutinchö y Diosnintsikpa santu espïritunwanmi limpiuyätsishqa kayarqunki, Diospaq rakishqa kayarqunki y allita ruraqnö rikashqa kayarqunki” (1 Cor. 6:9-11).

8. Jesus wanunqanta yarpäna reunionman kë wata manaraq ëwarnin, ¿imamantan pensashwan?

⁸ Allim kanman Jesus wanunqanta yarpäna reunionman kë wata manaraq ëwarnin Jehovä perdonamanqantsik imanö yanapamanqantsikman pensanqantsik. Jutsata ruranqantsikpita arrepentikushqam, Jehoväqa Jesus wanunqanta välitsir perdonamarquntsik, tsënö perdonamashqantsik kaptinmi, jutsata ruranqantsikta yarpar llakikuntsiknatsu. Peru tsënö karpis, capazchi creishwantsu Jehovä perdonamanqantsikta. O capazchi kënö pensashwan: “Jehovä perdonamashqa kaptimpis, noqaqa manam perdonamänanta merëcïtsu”. Peru këman pensari: ¿pillatan derëchuyoq perdonamänantsikpaq? Jehovä Diosnintsikllam. ¿Y pitataq churashqa juzgamänantsikpaq? Tsurin Jesustam. Y noqantsikqa manam derëchuyoqtsu kantsik pita perdonanampaq o mana perdonanampaq kaqta ninapaq. Tsëmi Bibliachöqa cläru kënö nimantsik: “Aktsichö [purishqaqa], [...] Jesuspa yawarninmi llapan jutsantsikpita limpiamantsik” (1 Juan 1:6, 7). Bibliachö tsënö ninqantaqa, Jehovä wakin yachatsimanqantsikkunata creinqantsiknöllam creinantsik. Jehovä Diosnintsikqa Jesus wanunqanta välitsirmi perdonamantsik, y Palabranchöpis “perdonakoq” kanqantam nimantsik (Sal. 86:5).

JESUS WANUNQANQA YANAPAMANTSIK SHAMOQ TIEMPUCHÖ ALLI SALUDYOQ Y KUSHISHQA KAWAKUNAPAQMI

9. Bibliachö ‘jutsa’ nirqa, ¿imakunapaqtan parlëkan? (Salmus 51:5).

⁹ Bibliachö ‘jutsa’ nirqa manam mana allikunata ruranqantsikllapaqtsu parlëkan, sinöqa mamantsikpa pachanchö këkarllana jutsasapa tikranqantsikpaqpis nikanmi (leyi Salmus 51:5). Tsënö jutsasapallana yurikurmi mana allikunata rurantsik, mana allikunata pensantsik y hasta alli nuna kar o mana alli nuna karpis qeshyapäkuntsik, awkinyantsik, chakwanyantsik y wanuntsik. Y llullu wamrakunapis mana allikunata manaraq rurashqa këkarmi qeshyayan y wanuyan. Tsënöqa kantsik, Adan jutsata rurashqa kanqampita llapantsikpis jutsasapa karmi.

10. ¿Imanötan Adanwan Ëva sientikuyarqan jutsasapa tikrarirnin?

¹⁰ Pensarishun Adanwan Ëva jutsasapa tikrarir imanö sientikuyanqanman. Pëkunaqa Diospa leynintam “shonqunkunachö qellqashqa” cuenta katsiyarqan y tsë leyta mana cäsukuyanqampitam mana alli sientikur qallëkuyarqan (Rom. 2:15). Tsëmi penqakur cuerpunkunata tsapäkuyarqan, y mana allita rurashqa kayanqanta musyarmi Teyta Jehoväpitapis tsinkakuyarqan o ratakuyarqan (Gen. 3:7, 8). Jutsata rurayanqan junaqpitam alläpa yarpachakuyarqan, mana alli sientikuyarqan y penqakuyarqan. Y tsënö sientikuykarllam wanukuyarqampis (Gen. 3:16-19).

11. ¿Imanötan kawakuntsik jutsasapa karnin?

¹¹ Noqantsikpis jutsasapa karmi Adanwan Ëvanö yarpachakuntsik, llakikuntsik, penqakuntsik, qeshyapäkuntsik y sufrintsik. Mas alli kanantsikpaq imëkata ruranqantsikpis manam alläpaqa yanapamantsiktsu. Tsëmi Bibliachöqa nimantsik nunakuna rurayanqanqa imapaqpis mana välinqanta (Rom. 8:20). Këllaman pensarishun: nunakunaqa imëkatam rurayashqa kë Patsata cuidayänampaq, nunakuna mana wanutsinakuyänampaq, pobrikuna mana kayänampaq y guërra mana kanampaq. Y rasumpa kaqchöqa, imëkata rurarpis manam arreglëta puëdiyashqatsu. Peru Jesus wanunqanqa llapantsiktam yanapamäshun kushishqa y alli kawakunantsikpaq.

12. ¿Imanö kawakuytataq shuyarantsik Jesuspa vïdanwan Jehovä libramashqantsik kaptin?

¹² Libramänantsikpaq Jesus wanushqa kaptinmi, imëka sufrimientupitapis librina kawakuyta shuyarantsik (Rom. 8:21). Shumaq Patsachöqa llapantsikpis jutsannaqnam kashun, mananam qeshyashunnatsu, mananam jutsata ruranqantsikta yarpar llakikushunnatsu, yarpachakushunnatsu ni penqakushunnatsu. Tsënöllam Jesus gobernamuptinqa, kë Patsatapis shumaq cuidëta yachashun y tranquïluna kawakushun (Is. 9:6, 7).

13. Jesus wanunqanta yarpäna reunionman kë wata manaraq ëwarnin, ¿imaman mastan pensashwan?

¹³ ¿Imanöraq jutsannaqna karnin kawakushun? Llapan junaqkunam kushishqa shärikamushun y manam yarpachakushunnatsu noqantsikpaq ni familiantsikpaqpis mikuy pishinampaq kaqta, ni qeshyanapaq kaqta ni wanunapaq kaqta. Diosnintsik änimanqantsikkunata shuyaranqantsikqa, barcuta tsaraq anclanömi yanapamantsik kushishqa sientikunapaq (Heb. 6:18, 19). Imanömi barcuta yaku mana apakunampaq ancla tsaran, tsënömi Diosnintsik änimanqantsikkunaman pensanqantsikpis Diosnintsikman mas confiakunapaq y imëka mana allikunapa pasarpis alli aguantanapaq yanapamantsik. Segürum këkantsik llapan shonquntsikwan sirwirnin sïguishqaqa, Jehovä Diosnintsik bendicimänapaq kaqta (Heb. 11:6). Señornintsik Jesucristu salvamänantsikpaq wanushqa kaptinmi, kanan witsampis Diosnintsik consolamantsik, y shamoq tiempuchö alli kawakunapaq kaqtapis shuyarantsik.

JESUS WANUNQANQA YANAPAMANTSIK DIOSNINTSIKWAN AMISHTANAPAQMI

14. ¿Imatan nunakunata pasarqan Adanwan Ëva jutsata ruraskiyaptin?

¹⁴ Adanwan Ëva rurayanqan jutsaqa, nunakunatam Diosnintsikpita chipyëpa rakirirqan (Col. 1:21). Tsëmi Bibliachöqa nin jutsaqa Diosnintsikpa chikeqnin tikratsimanqantsikta (Rom. 8:7, 8). ¿Imanirtan chikeqnin tikrantsik? Jutsasapa karmi, peru Jehovä Diosnintsikqa llapantapis allillata ruraqmi. Pëqa jutsa rurëtaqa alläpam chikin. Tsëmi Bibliachöqa Diosnintsikpaq kënö nin: “Nawiki alläpa limpiu kaptinmi, mana allikunataqa rikëta munankitsu, y mana alli rurëkunataqa alläpam chikinki” (Hab. 1:13). Rikärinqantsiknöpis jutsaqa chipyëpam Diosnintsikpita rakiramarquntsik. Y Diosnintsikwan amishtanapaqqa, Jesus wanunqanraqmi yanapamantsik.

15. ¿Imanötan Jesus wanunqan nunakunata yanapan Dioswan amishtayänampaq?

¹⁵ Bibliachöqa nin, Jesus wanunqanqa ‘Dioswan amishtayänampaq’ nunakunata yanapanqantam (1 Juan 2:2). Peru ¿imanötan Jesus wanunqanqa nunakunata yanapan Jehoväwan amishtayänampaq o yapë amïgu kayänampaq? Jehoväqa Jesus wanunqanta välitsirmi nunakunawan amishtan o yapë amïgun kayänanta permitin (Rom. 3:23-26). Y Jesus manaraq wanuptinmi Jehoväqa unë sirweqninkunatapis amïgunkunatanöna rikarqan (Gen. 15:1, 6). ¿Imanirtan Jesus manaraq wanuptinqa amïgun këta puëdiyarqanna? Jehoväqa segürum karqan nunakunarëkur Jesus wanunampaq kaqta (Is. 46:10). Y yachakurinqantsiknömi Jesus wanunqanqa llapan nunakunata yanapan Dioswan amishtayänampaq o yapë amïgu kayänampaq.

16. Jesus wanunqanta yarpäna reunionman kë wata manaraq ëwarnin, ¿ima masmantan pensashwan? (Dibüjuta rikäri).

¹⁶ ¿Y imanötan Jehoväwan amishtanqantsik yanapamantsik? Jesus yachatsimanqantsiknöpis, Jehovä Diosnintsiktam Papä o ‘Teyta’ nïta puëdintsik (Mat. 6:9). Y amïgun kanqantsiktapis capazchi seguïdu nintsik. Peru Teyta o amïgu nirpis, jutsasapa kanqantsikta yarparmi respëtuwan ninantsik y humildim kanantsik. Jehovä Diospa amïgunqa këta puëdintsik manam kikintsik imatapis ruranqantsikpitatsu, sinöqa Jesus wanunqanrëkurmi. Tsurin wanunampaq Jehovä Diosnintsik patsätsimushqa kaptinran pëwanqa amishtëta puëdintsik (Col. 1:19, 20). Tsënöpam jutsasapa këkarpis Jehovä Diosnintsikwanqa alli amïgu këta puëdintsik.

JESUS WANUNQANQA YANAPAMANTSIK JEHOVÄ LLAKIPÄKOQ KANQANTA ENTIENDINAPAQMI

17. ¿Imanötan Jesus wanunqan yanapamantsik Jehovä Diosnintsik alläpa llakipäkoq kanqanta entiendinapaq? (Efesius 2:4, 5).

¹⁷ Noqantsikrëkur Jesus wanushqa kaptinmi entiendintsik, Jehovä Diosnintsik “alläpa llakipäkoq” kanqanta. ¿Imatataq llakipäkoq karnin ruramushqa? Jutsata ruranqantsikpita ‘wanushqanö këkashqam kawanapaq yanapamarquntsik’ (leyi Efesius 2:4, 5). ‘Imëyaqpis kawakuyta’ munaqkunaqa wayi ishkiptin pampakashqa cuentam sientikuyan y yanapayänantam wanayan (Hëch. 13:48). Tsëmi Jehoväman yanapëkunampaq rogakuyan. Y Jehoväqa Gobiernumpita yachatsirmi Pëta y Tsurinta reqiyänampaq yanapan (Juan 17:3). Satanasqa Adantawan Ëvata engañarirqa, Diosnintsik munanqankunata manana ruranampaq kaqtachi pensarqan, peru manam musyarqantsu Diosnintsik imata ruranampaq kaqtaqa.

18. Jesus wanunqanman pensarqa, ¿ima mastataq yarpänantsik?

¹⁸ Jesus wanunqan imanö yanapamanqantsikman pensarpis, yarpänantsikmi salvamänallapaq mana shamushqa kanqanta. Jesusqa mas shamurqan Eden huertachö Satanas ulikunqanta o llullakunqanta Jehovä Diosnintsik cläru rikätsikunampaqmi (Gen. 3:1-5, 15). ¿Imakunachötan Jesus wanunqan yanapakun? Jehovä Diosnintsikpa jutin chipyëpa respetashqa y limpiu kanampaq, jutsapita y wanuypita libramänapaq y Diosnintsik kuyakoq kanqanta entiendinapaqmi. Tsënöllam Jehovä Diosnintsikqa jutsasapa këkashqapis permitimantsik Satanas ulikoq o llullakoq kanqanta rikätsikunapaq (Prov. 27:11). ¡Alläpam agradecikuntsik Jesus wanunqampita! Peru ¿imatataq rurashwan agradecikurnin? Tsëtam qateqninchö yachakushun.