¿Bibliachöqa ima nintan alläpa achachëpaq, alalëpaq, fuerti tamyapaq y shamoq tiempupaq?

“Alläpa achachë, alalë y fuerti tamyaqa mana aguantëpaqmi. Ichik tiempullachönam Patsachöqa ni imapis kanqanatsu” (The Guardian).

Kanan witsanqa höra höram alläpa achachan, alalan y fuerti tamyan, tsënö kanampaqqa kikin nunakunallam culpayoq kayan. Mëtsikaq cientïficukunapis tsënö kanqantam niyan. Alläpa achachaptin, alalaptin y fuerti tamyaptinmi mëtsëchö desgraciakuna pasakun. Wakinllata rikärishun:

• Kananqa alläpam achachan, usyan y fuerti tamyan, tsërëkurmi mëtsë markakunaman yaku juntan y jirkakunachöpis nina prendikar montikunata rupar ushakätsin.

• Articu niyanqanchö raju y juk sitiukunachö rajukunam ushakëkan.

• Lamar yakum alläpa atskayëkan.

Entëru Patsachömi höraqa alläpa achachan, alalan y fuerti tamyan. The New York Times periödicuchömi 193 nacionkunachö pasëkanqampaq kënö nin: “Patsaqa ushakëkanmi y auxiliuta mañakuykaq cuentam këkan”. Alläpa achachaptin, alalaptin y fuerti tamyaptinmi nunakunaqa sufrikäyan y wanuykäyan, tsëmi Organización Mundial de la Salud niyanqampita kënö niyan: “Alläpa achachë, alalë y fuerti tamyaqa nunakunapaq peligrösum”.

Imëka mana allikuna kaptimpis, shamoq tiempuchö mas allina kawakunapaq kaqta musyanqantsikmi yanapamäshun alläpa mana yarpachakunapaq. Bibliachöqa willakun kanan witsan ima pasakunampaq kaqta y shamoq tiempuchö Dios änikunqankunata cumplimunampaq kaqtam.

¿Bibliaqa willakurqannaku alläpa achachë, alalë y fuerti tamya kanampaq kaqta?

Awmi. Bibliachöqa willakurqannam kanan witsan alläpa achachë, alalë y fuerti tamya kanampaq.

Bibliachö willakunqan: “Ushanan tiempuchöqa alläpa mana alli y mana aguantëpaqnö tiempukunam kanqa. Nunakunam kayanqa kikinkunallata kuyakoq, qellëta kuyaq [y] jukkunata dejaq […]. Manam acuerduman chëta munayanqatsu, […] traicionakoqmi kayanqa y manam ima niyanqantapis cäsukuyanqatsu” (2 Timoteu 3:1-4).

Bibliachö willakunqannömi nunakunaqa mana alli portakuyan y manam kë Patsatapis cuidëta yachayantsu. Gobiernukuna y empresariukunaqa manam nunakunapaq ni wamrakunapaq yarpachakuyantsu, tsëpa rantinqa mas qellëllatam ganëta munayan. Y Patsata cuidayänampaq imëkata rurar juntu trabajarpis manam imachöpis acuerdutsu kayan.

Bibliachö ninqannöpis nunakuna kë Patsata cuidayänanta y alli portakuyänantaqa manam shuyaränantsiktsu. Tsëpa rantinqa nunakunapa portakuyninkunam “mana allipita mas mana alliman” chanqa (2 Timoteu 3:13).

¿Imanirtan següru këkantsik Dios kë Patsata altsamunampaq kaqta?

Bibliachömi nin Teyta Jehoväqaa Patsapaq y nunakunapaq alläpa yarpachakunqanta. Tsëpaqqa Bibliachö kima textukunata rikärishun:

1. 1. Diosqa Patsata “manam mana kaqllapaqtsu” kamarqan, “sinöqa nunakuna tsëchö kawayänampaqmi” (Isaïas 45:18).

   Diosqa änikunqankunatam cumplimunqa (Isaïas 55:11). Manam permitinqatsu nunakuna kë Patsata ushakätsiyänanta.

2. 2. “Alli shonquyoq nunakunapaqmi kë patsa herenciankuna kanqa. Tsëchömi imëpis yamë y tranquïlu kawakuyanqa. […] Allita ruraq nunakunapaqqa kë patsam herenciankuna kanqa, y tsëchömi imëyaqpis alli kawakuyanqa” (Salmus 37:11, 29).

   Diosqa änikun kë patsachö nunakuna imëyaqpis yamë kawakuyänampaqmi.

3. 3. “Mana allita ruraq nunakunaqa ushakäyanqam” (Proverbius 2:22).

   Diosqa änikun, mana alli nunakunata y Patsata mana cuidaq nunakunata ushakätsinampaqmi.

¿Imataraq Diosqa shamoq tiempuchö ruramunqa?

¿Imanötan Diosqa kë Patsapaq änikunqankunata cumplimunqa? Änikunqankunataqa cumplimunqa kë Patsachö Gobiernun gobernamuptinmi (Mateu 6:10). Tsë Gobiernuqa ciëlupitam gobernamunqa. Y Patsata altsanampaqqa manam gobiernukunawan ima acuerdutapis ruranqatsu. Entëru Patsachömi Diospa Gobiernunlla gobernamunqa (Daniel 2:44).

¡Patsa altsakänampaq kaqta musyanqantsikqa alläpa kushikuypaqmi! (Salmus 96:10-13). Jehovä Gobiernunwan imakunata ruramunampaq kaqta rikärishun:

• Jehovä kamanqankunata nunakuna malogrëkäyanqanqa altsakanqam

  Bibliachö ima ninqan: “Tsë witsanqa tsunyaq sitiuchö y tsaki patsachöpis alläpam kushikuyanqa.Imapis mana kanqan pampakunachöpis azafran planta wëtanqannöran wëtayanqa, nunakunaqa alläpam kushikuyanqa” (Isaïas 35:1).

  Shamoq tiempu imanö kanampaq kaqta musyanqantsik: Nunakuna kë Patsata tukuynöpa malogrëkäyanqantaqa Jehovämi altsamunqa.

• Manam alläpa achachë, alalë y fuerti tamya kanqanatsu

  Bibliachö ima ninqan: Jehovä “alläpa vientuta päratsiptinmi, laqcheqsëkaq lamarpis päran” (Salmus 107:29).

  Shamoq tiempu imanö kanampaq kaqta musyanqantsik: Jehoväqa imëkatam controlëta puëdin. Alläpa achachë, alalë y fuerti tamyaqa manam kanqanatsu y nunakunapis manam sufriyanqanatsu.

• Patsata alli cuidanapaqmi yachakushun

  Bibliachö ima ninqan: “Mana yachaqtapis yachaqtam tikratsishqëki y munanqänö kawakunëkipaqmi yanapashqëki” (Salmus 32:8).

  Shamoq tiempu imanö kanampaq kaqta musyanqantsik: Jehoväqa mandakurqan nunakuna Patsata alli cuidayänampaqmi (Genesis 1:28; 2:15). Pëmi yachatsimäshun kamanqankunata imanö cuidanapaq y mananam kë Patsataqa malograshunnatsu.