2023 watachö entëru Patsachö alläpa achachan | ¿Ima nintan Bibliachö?

Entëru Patsachömi imëpitapis mas achachëkan, tsëmi imëka desgraciakuna pasëkan. Willakayämunqanta rikäri:

• “174 watapanam entëru Patsachö imanö achachanqanta rikëkäyan, y kë juniu killachöqa mana nunca achanqannömi entëru Patsachö alläpa achashqa” (Oficina Nacional de Administración Oceánica y Atmosférica, Departamento de Comercio de Estados Unidos, 13 de juliu 2023).

• “Italiachö, Espäñachö, Franciachö, Alemaniachö y Poloniachömi mana aguantëpaqnö achachëkan, y Sicilia y Cerdëña islakunachönäqa masraqmi achachanqa (48 ºC niyanqanman capaz chanqa). Euröpa nacionkunachöqa manachi imëpis tsënöqa achachëkamushqatsu” (Agencia Espacial Europea, 13 de juliu 2023).

• “Mas achachaptinmi mas seguïdu, mas feyupa y imëkata apëpa tamyamunqa” (Stefan Uhlenbrook, Sección de Hidrología, Recursos Hídricos y Criosfera de la Organización Meteorológica Mundial niyanqanchö director, 17 de juliu 2023).

¿Yarpachakunkiku tiempuntsik alläpa feyupa cambianqanta wiyarnin? Tsëpaq Bibliachö ima ninqanta këchö yachakuy.

¿Bibliachö willakurqannaku tiempuntsik alläpa feyupa cambianampaq kaqta?

Awmi. Alläpa achachänampaq kaqta y tiempuntsik alläpa feyupa cambianampaq kaqtaqa Bibliachö willakurqannam. Jesusmi nirqan ‘imëka espantëpaqkuna’ o ‘mantsakëpaqkuna’ pasanampaq kaqta (Lücas 21:11). Pïmë nunakunam alläpa mantsakäyan imëpitapis mas achaptin, y kë Patsata nunakuna ushakätsiyänantam mantsayan.

¿Kë Patsa ushakäkunqatsuraq?

Manam, para siempri kawakunapaqmi kë Patsataqa Diosnintsik kamashqa, y manam permitinqatsu nunakuna ushakätsiyänanta (Salmus 115:16; Eclesiastes 1:4). Diosnintsikqa änikushqa “Patsata ushakëkätseqkunata” ushakätsinampaqmi (Apocalipsis 11:18).

Bibliachömi willakun Diosnintsikqa kë Patsata imëkapita cuidëta puëdinqanta, y manam permitinqatsu ni ima ushakätsinanta.

• “Alläpa vientuta [Dios] päratsiptinmi, laqcheqsëkaq lamarpis päran” (Salmus 107:29). Diosnintsikpaqa podernin kanmi imëka desgraciakuna pasananta manana permitinampaq, y pëqa puëdinmi imëka mana allikuna pasanqanta altsëta, tsënöpa nunakuna manana sufriyänampaq.

• “Teyta Dios qam patsata bendiciptikim, imëkapis shumaq wayun” (Salmus 65:9). Diosnintsikqa kë Patsatam juk shumaq huertaman tikratsinqa.

Tiempuntsik imanö alliyänampaq kaqta Bibliachö willakunqanta masllata musyëta munarqa, “¿Quién salvará el planeta?” neqta leyi.